કેન્દ્રીય મંત્રી મનસુખ માંડવિયાની અધ્યક્ષતામાં જૂનાગઢ ખાતે મહત્વપૂર્ણ ’દિશા’ બેઠક યોજાઈ

ખાસ-ખબર ન્યૂઝ ઈં જૂનાગઢ, તા.17

જૂનાગઢ કલેક્ટર કચેરી ખાતે કેન્દ્રીય મંત્રી મનસુખભાઈ માંડવીયા અને સાંસદ રાજેશ ચુડાસમાની અધ્યક્ષતામાં ડિસ્ટ્રીકટ ડેવલપમેન્ટ કોઓર્ડીનેશન એન્ડ મોનિટરિંગ કમિટી (દિશા) ની મહત્વપૂર્ણ બેઠક યોજાઈ હતી. આ બેઠકમાં કેન્દ્ર અને રાજ્ય સરકાર દ્વારા જિલ્લામાં અમલમાં મૂકાયેલી વિવિધ કલ્યાણકારી યોજનાઓની વિસ્તૃત સમીક્ષા કરવામાં આવી હતી. જેમાં નેશનલ હાઈવે ઓથોરિટી હેઠળના માર્ગોની મરામત, સોઈલ હેલ્થ કાર્ડ, મનરેગાના કામો, પ્રધાનમંત્રી આવાસ યોજના (ગ્રામીણ અને શહેરી), વિકાસલક્ષી કામો અને સ્વામિત્વ યોજના સહિતની યોજનાઓની વિગતવાર ચર્ચા થઈ હતી. અધિકારીઓ સાથે ફાળવેલા લક્ષ્યાંક, પૂર્ણ થયેલા અને પ્રગતિ હેઠળના કામોની ભૌતિક સિદ્ધિઓ અંગે વિસ્તૃત માહિતી મેળવવામાં આવી હતી. કેન્દ્રીય મંત્રીએ અધિકારીઓને સ્પષ્ટ તાકીદ કરી હતી કે દરેક કામ સમય મર્યાદા અને ગુણવત્તા સાથે પૂર્ણ થવું જોઈએ. તેમણે અધિકારીઓને તેમના વિવેકાધીન અધિકારનો ઉપયોગ કરીને વિવેકપૂર્ણ અને નાગરિકોની સુખાકારીમાં વધારો કરે તેવા નિર્ણયો લેવા જણાવ્યું હતું. આ બેઠકમાં જિલ્લા પંચાયત પ્રમુખ, ધારાસભ્યો સંજયભાઈ કોરડીયા, અરવિંદ લાડાણી, ભગવાનજીભાઈ કરગઠિયા, જિલ્લા કલેકટર, જિલ્લા વિકાસ અધિકારી અનેએસપી સહિત વિવિધ વિભાગના અધિકારીઓ ઉપસ્થિત રહ્યા હતા.