‘અમિત શાહે કેનેડામાં હિંસા કરાવી’: જસ્ટિન ટ્રુડોની સરકારનો વિકૃત બકવાસ

ખાલિસ્તાનીઓ પર એક્શનનો ઓર્ડર શાહે આપેલો, ભારત-કેનેડા મિટિંગની ગુપ્ત માહિતી લીક કરી

ખાસ-ખબર ન્યૂઝ નવી દિલ્હી, તા.30

ટ્રુડો સરકારના એક મંત્રીએ કહ્યું કે અમિત શાહે કેનેડામાં શીખ અલગતાવાદીઓ સામે કાર્યવાહી કરવાનો આદેશ આપ્યો હતો. રોઇટર્સના અહેવાલ મુજબ કેનેડાના નાયબ વિદેશ મંત્રી ડેવિડ મોરિસને મંગળવારે સંસદીય પેનલમાં આ નિવેદન આપ્યું હતું.

મોરિસને સંસદીય પેનલને કહ્યું કે, તેણે અમેરિકન અખબાર વોશિંગ્ટન પોસ્ટને કહ્યું છે કે, ભારતના ગૃહમંત્રી આ મામલામાં સામેલ છે. મોરિસને કહ્યું કે તેમણે જ ભારત-કેનેડા બેઠક સાથે જોડાયેલી માહિતી અમેરિકન અખબારને આપી હતી. મોરિસને કહ્યું,, વોશિંગ્ટન પોસ્ટના એક પત્રકારે મને ફોન કર્યો અને પૂછ્યું કે શું આ (અમિત શાહ) એ જ વ્યક્તિ છે. મેં કહ્યું હા, તે એ જ વ્યક્તિ છે. જો કે, આ સમયગાળા દરમિયાન મોરિસને વધુ માહિતી કે પુરાવા આપ્યા ન હતા. આ પહેલીવાર છે જ્યારે કેનેડિયન અધિકારીએ ખુલ્લેઆમ ભારત સરકારના મંત્રીનું નામ લીધું છે.
અગાઉ 16 ઓક્ટોબરે જસ્ટિન ટ્રુડોએ એક કમિશન સમક્ષ કહ્યું હતું કે ગયા વર્ષે સપ્ટેમ્બર 2023માં જ્યારે તેણે હરદીપ સિંહ નિજ્જરની હત્યામાં ભારતીય એજન્ટોની સંડોવણીનો આરોપ લગાવ્યો હતો, ત્યારે તેમની પાસે માત્ર ગુપ્ત માહિતી હતી. કોઈ નક્કર પુરાવા નહોતા.

14 ઓક્ટોબરે અમેરિકન મીડિયા હાઉસ વોશિંગ્ટન પોસ્ટે કેનેડાના અધિકારીઓને ટાંકીને દાવો કર્યો હતો કે ગૃહમંત્રી અમિત શાહ અને ભારતીય ગુપ્તચર એજન્સી છઅઠએ સંયુક્ત રીતે કેનેડામાં ગુપ્ત માહિતી એકત્ર કરવા અને ખાલિસ્તાની આતંકવાદીઓને હુમલો કરવાની મંજૂરી આપી હતી. ભારતીય વિદેશ મંત્રાલય અને કેનેડામાં ભારતીય હાઈ કમિશને આ બાબતે તાત્કાલિક કોઈ ટિપ્પણી કરી ન હતી. જો કે, ભારત સરકારે અગાઉના કેનેડાના આવા તમામ આરોપોને પાયાવિહોણા ગણાવીને કોઈપણ રીતે સામેલ થવાનો ઈન્કાર કર્યો છે. કેનેડિયન અખબાર સીબીસી ન્યૂઝ અનુસાર, ડેવિડ મોરિસન મંગળવારે જાહેર સુરક્ષા અને રાષ્ટ્રીય સુરક્ષા સમિતિ સમક્ષ જુબાની આપવા આવ્યા હતા. આ કમિટી સાથે સંકળાયેલા એમપી રાકલ ડેન્ચોએ મોરિસનને પૂછ્યું કે આ માહિતી વોશિંગ્ટન પોસ્ટ સુધી કેવી રીતે પહોંચી?

આ અંગે મોરિસને કહ્યું-મેં જાણીજોઈને વોશિંગ્ટન પોસ્ટ પસંદ કર્યું. હકીકતમાં, અમને એવું અખબાર જોઈતું હતું જે આંતરરાષ્ટ્રીય હોય અને અમારી (કેનેડિયન) કહાની કહી શકે. આ માટે મેં એક એવા પત્રકારને પસંદ કર્યો કે જેમને આ બાબતનો લાંબો અનુભવ હતો અને આ વિષય પર અગાઉ પણ ઘણી વખત લખ્યું હતું. કેનેડા અને ભારત વચ્ચે તાજેતરનો વિવાદ 13 ઓક્ટોબરે શરૂ થયો હતો. કેનેડાએ ભારતને પત્ર મોકલ્યો હતો. એવું કહેવામાં આવ્યું હતું કે ભારતીય હાઈ કમિશનર સંજય કુમાર વર્મા અને અન્ય રાજદ્વારીઓ એક કેસમાં શંકાસ્પદ છે.
ભારતે તેના રાજદ્વારીઓને શંકાસ્પદ ગણાવવાનો વિરોધ કર્યો હતો અને કેનેડાના રાજદૂતને બોલાવ્યા હતા. થોડા કલાકો પછી ભારતે સંજય કુમાર વર્મા અને અન્ય રાજદ્વારીઓને પાછા બોલાવ્યા. આ પછી કેનેડાએ પણ ભારતમાંથી તેના 6 રાજદૂતોને પરત ફરવાનો આદેશ આપ્યો હતો.
બીજા દિવસે કેનેડાના વડાપ્રધાન જસ્ટિન ટ્રુડોએ ભારત સરકારના એજન્ટો પર ગુપ્ત માહિતી એકત્ર કરવાનો, ટાર્ગેટ કિલિંગ કરવાનો, કેનેડિયન નાગરિકોને ધમકાવવાનો અને હિંસામાં સામેલ કરવાનો આરોપ મૂક્યો હતો.