પોલીસ ક્યાં? મોરબીના ઘુંટુ ગામ પાસે દેશી દારૂના અડ્ડા પર ગ્રામજનોની જનતા રેડ

ઘુંટુ ગામે દિન પ્રતિદિન ફૂલતું ફાલતું દેશી દારૂનું દુષણ, નિષ્ક્રિય પોલીસ ક્યારે જાગશે?

વિવેકાનંદ યુવા સમિતિ અને જાગૃત નાગરિકોએ દરોડો પાડીને દેશી દારૂના જથ્થા સાથે એક શખ્સને ઝડપી પોલીસના હવાલે કર્યો
ખાસ-ખબર સંવાદદાતા
મોરબી તાલુકાના ઘુંટુ ગામે છેલ્લા ઘણા સમયથી દેશી દારૂનું મનફાવે તેમ બેરોકટોકપણે વેચાણ થઈ રહ્યું છે. મોરબી તાલુકા પોલીસ સુષુપ્ત અવસ્થામાં હોય તેવું ગ્રામજનો મહેસૂસ કરી રહ્યા છે. ગામમાં અવારનવાર દારૂ પીને ફટકા બનેલા લોકોને જાહેરમાં તમાસો કરતાં ગ્રામજનો જોઈ રહ્યા છે પરંતુ પોલીસ ચોપડે સબ સલામતના ગાણા ગવાઈ રહ્યા છે ત્યારે તાલુકા પોલીસના કામગીરીના દાવા વચ્ચે ઘુંટુ ગામે દેશી દારૂના અડ્ડા પર વિવેકાનંદ યુવા સમિતિની આગેવાની હેઠળ ગ્રામજનોએ જનતા રેડ કરતા ખળભળાટ મચી જવા પામ્યો છે. મોરબી તાલુકાના ઘુંટુ ગામમાં છેલ્લા ઘણા સમયથી દેશી દારૂનું બેરોકટોકપણે વેચાણ કરવામાં આવતું હોય ગામના અનેક યુવાનો દેશી દારૂના રવાડે ચડી જતા આ મામલે ઘુંટુ ગામે ચાલતી વિવેકાનંદ યુવા સમિતિ દ્વારા સરપંચને મૌખિક રજૂઆતો કરવામાં આવી હતી પરંતુ આ મામલે સરપંચ દ્વારા કોઈ પગલાં ભરવામાં ન આવતા દેશી દારૂના ધંધાર્થીઓએ બેખોફ બનીને સરાજાહેર દારૂના અડ્ડા ચાલુ રાખ્યા હતા. આ દરમિયાન ઘુંટુ ગામે સક્રિય વિવેકાનંદ યુવા સમિતિની આગેવાની હેઠળ ગામના જાગૃત લોકોએ ઘુંટુ ગામ નજીક આવેલ કેનાલ પાસે દેશી દારૂના અડ્ડા પર જનતા રેડ કરીને દેશી દારૂના જથ્થા સાથે એક શખ્સને ઝડપી પાડીને તાલુકા પોલીસના હવાલે કર્યો હતો ત્યારે સવાલ એ થાય છે કે મોરબી તાલુકા પોલીસની ફરજ નથી કે આવા અડ્ડાઓ બંધ કરાવે? તાલુકા પોલીસ એટલી નિષ્ક્રિય છે કે ગામમાં દેશી દારૂ બંધ કરાવવા માટે જનતાને રેડ કરવા મજબૂર થવું પડે ? તો વહેલી તકે ઘુંટુ ગામે ધમધમતા દેશી દારૂના અડ્ડાઓ પર પોલીસ દ્વારા કાર્યવાહી કરવામાં આવે તેવું ગામ લોકો ઈચ્છી રહ્યા છે.

ગામમાંથી તમામ દુષણો નાબુદ થાય તે માટે વિવેકાનંદ યુવા સમિતિ હંમેશા ખડેપગે રહેશે
આ અંગે ઘુંટુ ગામની વિવેકાનંદ યુવા સમિતિના સભ્યો સાથે વાત કરતા તેઓએ જણાવ્યું હતું કે, ઘુંટુ ગામમાં
દેશી દારૂ સહિતના દૂષણોનું પ્રમાણ ખૂબ વધ્યું છે અને આજની યુવાપેઢી પણ આ નશાના રવાડે ચડીને તેની
જીંદગી બરબાદ કરી રહી છે ત્યારે ગામમાંથી આવા દૂષણોની સંપૂર્ણપણે નાબૂદી થાય તેના માટે વિવેકાનંદ યુવા
સમિતિ હરહંમેશ કાર્યરત રહેશે અને ગામના કોઈપણ વિકાસકાર્યોમાં અમારી સમિતિ હંમેશા ખડેપગે રહેશે.

ઘુંટુ ગામે લોકોએ જનતા રેડ પાડી દેશી દારૂ વેંચતા શખ્સને પકડી પાડ્યો તેનો વિડીયો જોવા અહીં ક્લિક કરો…