એવો પાઠ ભણાવીશું કે તમારી આવનારી પેઢીઓ રમખાણો કરવાનું ભૂલી જશે: યોગી આદિત્યનાથ

મૌલાના ભૂલી ગયા છે કે અહીં સત્તામાં કોણ છે?

બરેલીમાં નમાજ બાદ બબાલ

પોલીસ પર પથ્થરમારો, યોગી લાલઘુમ

ખાસ-ખબર ન્યૂઝ રાજકોટ

શુક્રવારે ઉત્તર પ્રદેશના બરેલીમાં ‘આઈ લવ મોહમ્મદ’ ના નારા અંગે થયેલા વિરોધ પ્રદર્શન બાદ, પોલીસ હરકતમાં આવી ગઈ છે. ઇત્તેહાદ-એ-મિલ્લત કાઉન્સિલના પ્રમુખ તૌકીર રઝા સહિત 50 લોકોની અટકાયત કરવામાં આવી છે. છ કેસ પણ દાખલ કરવામાં આવ્યા છે. આ દરમિયાન, સીએમ યોગીએ એક કાર્યક્રમમાં કહ્યું, ‘મૌલાના ભૂલી ગયા છે કે સત્તામાં કોણ છે. તેઓ માનતા હતા કે ધમકી આપીશું અને જબરદસ્તી જામ કરી દઈશું. અમે કહ્યું કે જામ નહીં થાય. કર્ફ્યૂ પણ લાદવામાં આવશે નહીં. એવો પાઠ ભણાવીશું કે તમારી આવનારી પેઢી રમખાણો કરવાનું ભૂલી જશે.’ હકીકતમાં, શુક્રવારે મૌલાના તૌકીર રઝાના આગ્રહથી ભીડ રસ્તા પર ઉતરી આવી હતી. જ્યારે પોલીસે તેમને રોક્યા, ત્યારે તેઓએ પથ્થરમારો શરૂ કર્યો. ત્યારબાદ પોલીસે તેમનો પીછો કર્યો અને માર માર્યો. આ દરમિયાન, લખનઉના રસ્તાઓ પર નવા બિલબોર્ડ લગાવવામાં આવ્યા છે. જેના પર “આઈ લવ શ્રી યોગી આદિત્યનાથ જી” અને “આઈ લવ બુલડોઝર્સ” લખેલા છે. આ દરમિયાન બારાબંકીમાં, ગઈકાલે મોડી રાત્રે “આઈ લવ મોહમ્મદ” ના નારાવાળા પોસ્ટરો ફાડી નાખવામાં આવતા હોબાળો મચી ગયો. મોટી પોલીસ ફોર્સ પહોંચી ગઈ અને પરિસ્થિતિને કાબૂમાં લીધી.