દિલ્હીમાં મુખ્યમંત્રી અને પૂર્વ મુખ્યમંત્રી વચ્ચે શાબ્દિક યુદ્ધ શરૂ: રેખા ગુપ્તાએ કર્યો પલટવાર

દિલ્હીમાં નવી સરકાર બન્યાને માંડ એક દિવસ થયો છે અને મુખ્યમંત્રી અને પૂર્વ મુખ્યમંત્રી વચ્ચે શાબ્દિક યુદ્ધ શરૂ થયું છે. જ્યારે ભૂતપૂર્વ સીએમ આતિશીએ મહિલાઓને 2500 રૂપિયા આપવાના વચન પર સરકારને ઘેરી હતી, ત્યારે હવે રેખા ગુપ્તાએ તેના પર પલટવાર કર્યો છે.

કેન્દ્રશાસિત પ્રદેશ દિલ્હીમાં નવી સરકારની રચનાને એક દિવસ જ થયો છે અને મુખ્યમંત્રી અને પૂર્વ મુખ્યમંત્રી વચ્ચે શાબ્દિક યુદ્ધ શરૂ થયું છે. દિલ્હીના ભૂતપૂર્વ મુખ્યમંત્રી આતિશીએ સરકારને પહેલા મંત્રીમંડળમાં મહિલાઓને દર મહિને 2500 રૂપિયા આપવાની યોજના પસાર કરવાના વચનની યાદ અપાવી અને તેના પર સવાલ ઉઠાવ્યા. હવે CM રેખા ગુપ્તાએ તેમના પર વળતો પ્રહાર કર્યો છે.

CM રેખા ગુપ્તાએ કહ્યું છે કે સરકાર અમરારી છે, એજન્ડા અમારો છે, અમને કામ કરવા દો. દિલ્હીના મુખ્યમંત્રીએ કહ્યું છે કે જનતાને જે પણ વચનો આપવામાં આવ્યા હતા, તે બધા વચનો પૂરા કરવામાં આવશે. તેમણે કહ્યું કે અમે અમારી પહેલી જ કેબિનેટ બેઠકમાં આયુષ્માન યોજનાને મંજૂરી આપી દીધી છે. આ યોજનાના અમલીકરણ માટે આગળની કાર્યવાહી કરવામાં આવી રહી છે. તેમને મહિલાઓને 2500 રૂપિયા આપવાના વચન પર આતિશીની ટિપ્પણી અંગે પણ એક પ્રશ્ન પૂછવામાં આવ્યો હતો. આ પ્રશ્નના જવાબમાં રેખા ગુપ્તાએ કહ્યું કે સરકાર અમારી છે, એજન્ડા અમારો છે તો અમને જ કામ કારવા દો . દરેક બાબતમાં કંઈ કહેવાની જરૂર નથી. જ્યારે તેમની સરકાર સત્તામાં હતી, ત્યારે તેમણે તે કર્યું.

અગાઉ, દિલ્હીના મુખ્યમંત્રીનો કાર્યભાર સંભાળ્યા બાદ, રેખા ગુપ્તા રાષ્ટ્રપતિ ભવન પહોંચી અને રાષ્ટ્રપતિ દ્રૌપદી મુર્મુને મળ્યા. રેખા ગુપ્તા ઉપરાષ્ટ્રપતિ જગદીપ ધનખર અને વડા પ્રધાન નરેન્દ્ર મોદીને પણ મળવાના છે. નોંધનીય છે કે ભૂતપૂર્વ CM આતિશીએ એક પોસ્ટર બહાર પાડીને CM રેખા ગુપ્તાને પૂછ્યું હતું કે મહિલાઓને 2500 રૂપિયા ક્યારે મળશે.

રેખા ગુપ્તા કેબિનેટની એક દિવસ પહેલા યોજાયેલી પહેલી બેઠકનો ઉલ્લેખ કરતા આતિશીએ કહ્યું કે ગઈકાલે પહેલી કેબિનેટ બેઠક મળી હતી પરંતુ તેમાં મહિલાઓને 2500 રૂપિયા આપવાની યોજનાને મંજૂરી આપવામાં આવી ન હતી. મુખ્યમંત્રી પર કટાક્ષ કરતા તેમણે કહ્યું કે રેખા ગુપ્તાએ પીએમ મોદીની ગેરંટી ખોટી સાબિત કરી છે. પીએમ મોદીના નિવેદનને યાદ કરતા આતિશીએ કહ્યું કે તેમણે (પીએમ મોદીએ) કહ્યું હતું કે મહિલાઓને 2500 રૂપિયા આપવાની યોજના પહેલી કેબિનેટ બેઠકમાં પસાર કરવામાં આવશે. અમે પૂછવા માંગીએ છીએ કે દિલ્હીની મહિલાઓને 2500 રૂપિયા ક્યારે મળશે ?

દિલ્હી વિધાનસભાનું પહેલું સત્ર 24 ફેબ્રુઆરીથી શરૂ થશે
દિલ્હી ચૂંટણી પછી, નવી રચાયેલી વિધાનસભાનું પહેલું સત્ર 24 ફેબ્રુઆરીથી શરૂ થશે. આ માહિતી ભાજપના ભૂતપૂર્વ પ્રદેશ પ્રમુખ અને પાછલી વિધાનસભામાં ભાજપ ધારાસભ્ય પક્ષના નેતા વિજેન્દ્ર ગુપ્તાએ આપી છે. તેમણે માહિતી આપી છે કે નવી રચાયેલી દિલ્હી વિધાનસભાનું આ પહેલું સત્ર ચાર દિવસ સુધી ચાલશે જેમાં ગૃહ ત્રણ દિવસ – 24, 25 અને 27 ફેબ્રુઆરી સુધી મળશે. ઉલ્લેખનીય છે કે ચૂંટણી પછીના પ્રથમ સત્રમાં, સ્પીકરની પસંદગી કરવામાં આવે છે અને નવા ચૂંટાયેલા ધારાસભ્યોને સભ્ય તરીકે શપથ લેવડાવાય છે.