કૉમનવેલ્થ ગેમ્સમાં બે વખતની ચેમ્પિયન સંજીતા ચાનૂ ઉપર ચાર વર્ષનો પ્રતિબંધ

કૉમનવેલ્થ ગેમ્સમાં બે વખત ચેમ્પિયન બનનારી ભારતીય વેઈટલિફ્ટર સંજીતા ચાનૂ ડૉપ ટેસ્ટમાં પોઝિટીવ આવતાં ચાર વર્ષનો પ્રતિબંધ લગાવવામાં આવ્યો છે. સંજીતા પાછલા વર્ષે સપ્ટેમ્બર-ઑક્ટોબરમાં ગુજરાતમાં રમાયેલી નેશનલ ગેમ્સ દરમિયાન પરિક્ષણમાં પ્રતિબંધક દવાઓ લેતાં પકડાઈ હતી.

ભારતીય વેઈટલિફ્ટિંગ મહાસંઘના પ્રમુખ સહદેવ યાદવે કહ્યું કે, સંજીતાને પ્રતિબંધિત કરવામાં આવી છે. તેના પર આ પ્રતિબંધ નાડાએ લગાવ્યો છે. સંજીતા માટે આ મોટો ઝટકો છે. આ ઉપરાંત તેણે નેશનલ ગેમ્સમાં જીતેલો સિલ્વર મેડલ પણ પરત લઈ લેવામાં આવશે.

સંજીતાએ 2014માં ગ્લાસ્ગો કૉમનવેલ્થ ગેમ્સમાં 48 કિ.ગ્રા. કેટેગરીમાં ગોલ્ડ મેડલ જીત્યો હતો. આવી જ રીતે 2018માં તે ફરી ચેમ્પિયન બની હતી. સંજીતા પાસે હવે અપીલ કરવાની તક રહેશે પરંતુ તે અપીલ કરે તેવી શક્યતા ઓછી છે.