ખાસ-ખબર ન્યૂઝ જૂનાગઢ
જુનાગઢ જિલ્લા કલેકટર અને જિલ્લા મેજિસ્ટ્રેટ અને અધ્યક્ષ જુનાગઢ જીમખાનાની પ્રેરણાથી જિલ્લા વહીવટી તંત્ર અને જીમખાનાના સંયુક્ત ઉપક્રમે તા. 22માર્ચથી ઓપન બેડમિન્ટન ટુર્નામેન્ટનો શુભારંભ કરવામાં આવ્યો હતો. બે દિવસી ચાલેલી આ ટુર્નામેન્ટમાં બહોળી સંખ્યામાં વિવિધ કચેરીના સરકારી અધિકારીઓ અને કર્મચારીઓ અને જીમખાનાના સભ્યોએ ભાગ લીધો હતો તેમજ વિજેતાઓને ટ્રોફી અને સર્ટિફિકેટ આપવામાં આવ્યા હતા.
જિલ્લા કલેકટર અનિલ કુમાર રાણાવસીયા દ્વારા ટોસ ઉછાળીને ટુર્નામેન્ટનો શુભારંભ કરવામાં આવ્યો હતો. આ તકે તેઓએ પણ બેડમિન્ટન રમ્યા હતા અને સ્પર્ધકોનો ઉત્સાહ વધાર્યો હતો. તેમજ વિજેતા સ્પર્ધકોને ઇનામ વિતરણ કરવામાં આવ્યું હતું . આ પ્રકારના આયોજન થકી સરકારી કચેરીઓમાં કામ કરતા કર્મયોગીઓમાં નવા ઉત્સાહનો સંચાર થાય અને તેઓની કાર્યશક્તિની સાથે સ્વાસ્થ્ય સુધરે તેવો ઉમદા ઉદેશ્ય રહેલો છે. જિલ્લા કલેકટરે આ પ્રકારના આયોજનની પ્રશંસા કરી હતી. આ કાર્યક્રમમાં સ્ટેન્ડિંગ કમિટીના ચેરમેન પલ્લવીબેન ઠાકર, નાયબ કલેકટર ચરણસિંહ ગોહિલ, ડેપ્યુટી મ્યુનિસિપલ કમિશનર અજય ઝાપડા, જિલ્લા યુવા વિકાસ અધિકારી નીતાબેન વાળા સહિતના અધિકારીઓ અને સ્પર્ધકો હાજર રહ્યા હતા.
