રાતીયા રિઝર્વ ફોરેસ્ટમાંથી રેતી ચોરી કરનાર ત્રણ શખ્સ ઝડપાયા

વનવિભાગ દ્વારા રૂ.54 હજારનો દંડ ફટકારાયો, કાયદેસર કાર્યવાહી હાથ ધરી
ખાસ-ખબર ન્યૂઝ પોરબંદર

પોરબંદર જિલ્લાના રાતીયા વિસ્તારમાં આવેલા રિઝર્વ ફોરેસ્ટમાં ગેરકાયદેસર પ્રવેશ કરીને રેતી ચોરી કરનારા ત્રણ શખ્સોની વન વિભાગ દ્વારા ધરપકડ કરવામાં આવી છે. આરોપીઓ બળદગાડામાં દરિયાઈ રેતી ભરાવતાં હતા ત્યારે તેમની વિરુદ્ધ કાર્યવાહી હાથ ધરાઈ હતી. ગુનો નોંધ્યા બાદ ત્રણે શખ્સો પાસેથી કુલ રૂ. 54,000 નો દંડ વસૂલવામાં આવ્યો છે. પોરબંદર વન વિભાગના નાયબ વન સંરક્ષક પ્રસાદ રવિ રાધાકૃષ્ણ તથા એસીએફ રાજલબેન પાઠકના માર્ગદર્શન હેઠળ રાણાવાવ રેન્જના આરએફઓ મલય મણિયારની ટીમે 4 જૂન, 2025ના રોજ સંયુક્ત પેટ્રોલિંગ હાથ ધર્યું હતું.
પેટ્રોલિંગ દરમિયાન રાતીયા બીટના રાતીયા નેશ સ્મશાનની બાજુમાં આવેલા રિઝર્વ ફોરેસ્ટ વિસ્તારમાં બળદગાડા સાથે ત્રણ શખ્સો ગેરકાયદેસર પ્રવેશી રેતી ભરી જતા હોવાનું જણાયું હતું. જેના આધારે ભારતીય વન અધિનિયમ, 1927 મુજબ તાત્કાલિક કાર્યવાહી કરી રાતીયા નેશના અરજણ વિરા કરમટા, હાજા નાથા મોરી અને નથુ સાજણ કોડીયાતર વિરુદ્ધ ગુનો નોંધવામાં આવ્યો હતો. આ ત્રણેય શખ્સો પાસેથી રૂ. 54,000 દંડ પેટે વસૂલ કરવામાં આવ્યો છે તેમજ ધોરણસરની કાયદેસર કાર્યવાહી ચાલુ રાખવામાં આવી છે. વનવિભાગ દ્વારા જાહેર જનતાને અપીલ કરવામાં આવી છે કે, રિઝર્વ ફોરેસ્ટમાં કોઈપણ પ્રકારની ગેરકાયદેસર પ્રવૃત્તિ કરતા પહેલા કાયદાકીય જોગવાઈઓની જાણકારી રાખવી જરૂરી છે, નહીં તો સખત કાર્યવાહી ભોગવવી પડી શકે છે.