મીડિયા ક્લબ આયોજીત ક્રિકેટ ટૂર્નામેન્ટ: રોમાંચક ફાઇનલ મુકાબલામાં અબતક સામે ઇલેક્ટ્રોનિકસ મીડિયાની જીત

છેલ્લા બોલ સુધી રોમાંચક રહેલા ફાઇનલના જંગમાં ઇલેક્ટ્રોનિક્સ મીડિયા 7 રને વિજય થયું

નવનીત-જીતની આક્રમક બેટીંગના સહારે ઇલેક્ટ્રોનીક્સ મીડિયાએ 164 રનનો સ્કોર ખડક્યો: જીત કક્કડ અણનમ 62 રન અને 3 વિકેટ મેળવી મેન ઓફ ધ મેચ બન્યો

ખાસ-ખબર સંવાદદાતા
દર વર્ષે મીડિયા કર્મીઓની ભાગદોડભરી જીંદગી અને સ્ટ્રેસથી મુક્ત થવા ક્રિકેટ ટૂર્નામેન્ટનું આયોજન કરવામાં આવે છે. જેમાં આ વર્ષે અબતક અને ઇલેક્ટ્રોનીક્સ મીડિયા વચ્ચે ફાઇનલનો મહાજંગ ખેલાયો હતો. જેમાં અતિ રોમાંચક અને કસોકસ વચ્ચે ઇલેક્ટ્રોનીક્સ મીડિયાની અબતક સામે ભવ્ય જીત થઇ હતી. અબતક મીડિયા અને ઇલેક્ટ્રોનીક્સ મીડિયાએ સમગ્ર ટૂર્નામેન્ટ દરમિયાન ખૂબ જ સુંદર દેખાવ કરીને ફાઇનલમાં પહોંચી હતી. રવિવારે રાજકોટના ઇન્ટરનેશનલ ક્રિકેટ સ્ટેડિયમ માધવરાવ સિંધીયા ખાતે સાંજે 6:00 કલાકે મેચનો પ્રારંભ થયો હતો. સૌરાષ્ટ્ર-કચ્છના ઇન્કમટેક્સના ચીફ કમિશનર બી.એલ. મીણાના હસ્તે ટોસ ઉછાળવામાં આવ્યો હતો. જેમાં અબતકે ટોસ જીતીને પ્રથમ બોલીંગ કરવાનો નિર્ણય લીધો હતો. પ્રથમ બેટીંગ કરતા ઇલેક્ટ્રોનીક્સ મીડિયાએ નિર્ધારિત 20 ઓવરમાં 8 વિકેટ ગુમાવીને 164 રન બનાવ્યાં હતા. જવાબમાં અબતકે ખૂબ જ સાહસિક રમત રમતા નિર્ધારિત 20 ઓવરમાં 7 વિકેટ ગુમાવીને 157 રન બનાવ્યાં હતા. અબતક જીતથી થોડું દૂર રહ્યુ હતું.

અતિ રોમાંચક અને કસાકસીભર્યાં મેચમાં ઇલેક્ટ્રોનીક્સ મિડીયાનો 7 રને વિજય થયો હતો. ફાઇનલ મેચ દરમિયાન અનેક મહાનુભાવો ઉપસ્થિત રહ્યાં હતાં. જેમાં રાજકોટના મેયર ડો.પ્રદિપ ડવ, અબતક મિડીયાના મેનેજીંગ તંત્રી સતીષકુમાર મહેતા, મ્યુનિસિપલ ફાઇનાન્સ બોર્ડના પૂર્વ ચેરમેન ધનસુખભાઇ ભંડરી, ભાજપ ઓબીસી સેલના પ્રમુખ ઉદયભાઇ કાનગડ, ધારાસભ્ય ગોવિંદભાઇ પટેલ, ક્રાઇમ બ્રાન્ચના પી.આઇ. જે.વી.ધોળા, પ્રદેશ કોંગ્રેસ સમિતિના મહામંત્રી મહેશભાઇ રાજપૂત, પૂર્વ કોર્પોરેટર ઘનશ્યામસિંહ જાડેજા, ભાજપ મહિલા અગ્રણી કાશ્મિરાબેન નથવાણી, રાજકોટ ગોલ્ડ ડિલર્સ એસોસિએશનના પ્રમુખ ભાયાભાઇ સાહોલીયા, વોટર વર્ક્સના સમિતિના ચેરમેન દેવાંગભાઇ માંકડ સહિતનાઓ ઉપસ્થિત રહ્યા હતા. ફાઇનલ મેચ ખૂબ જ રોમાંચક રહ્યો હતો. રાજકોટની ક્રિકેટપ્રેમી જનતા પણ આ મેચ નિહાળવા ઉમટી પડી હતી. મેચમાં છેલ્લી ઓવર સુધી રસાકસી જોવા મળી હતી. પ્રથમ બેટીંગ કરતા ઇલેક્ટ્રોનીક્સ મિડીયાએ 20 ઓવરમાં 8 વિકેટ ગુમાવીને 164 રન બનાવ્યાં હતાં. અબતકના બોલરોએ ધારદાર બોલીંગ કરતા પ્રથમ ઓવરમાં જ ભાવેશ લશકરીને આઉટ કર્યો હતો. ત્યારબાદ પાંચમી ઓવર ઇલેક્ટ્રોનીક્સ મિડીયાએ બીજી વિકેટ પણ ગુમાવી દીધી હતી. ઇલેક્ટ્રોનીક્સ મિડીયા તરફથી જીત કક્કડે 62 રન બનાવ્યાં હતા અને 3 વિકેટ ઝડપી હતી. તેને મેન ઓફ ધ મેચ જાહેર કરવામાં આવ્યા હતા. નવનીત લશ્કરીએ પણ જીતનો સાથ દેતાં 25 બોલમાં આક્રમક 55 રન ફટકાર્યા હતાં. અબતકના બોલરોનું પણ શ્રેષ્ઠ પ્રદર્શન જોવા મળ્યું હતું. અબતક તરફથી સંજય, તેજસ અને મોનિલે બે-બે જ્યારે આશિષ નાગે એક વિકેટ ઝડપી હતી.
165 રન ચેસ કરવા ઉતરેલી અબતકની શરૂઆત સારી રહી ન હતી. ઇનિંગની બીજી જ ઓવરમાં અબતકે વિકેટ ગુમાવી હતી. ત્યારબાદ તુષારભાઇ રાચ્છે ઇનિંગ સંભાળી હતી અને 21 રન ફટકાર્યા હતા. મેચમાં અનેક ઉતાર-ચઢાવ આવ્યા હતા. છેલ્લી ઓવર સુધી મેચ રોમાંચક રહ્યો હતો. તેજસ ચૌહાણે 44, આશિષ નાગે 27 અને રોહિત ડાંગરે મહત્વપૂર્ણ 24 રન બનાવ્યાં હતાં. ઇલેક્ટ્રોનિક્સ મિડીયા તરફથી ચેતન, નવનીત અને ગૌતમે એક-એક વિકેટ ઝડપી હતી જ્યારે જીત કક્કડે મહત્વની ત્રણ વિકેટ ઝડપી હતી.
મેચ બાદ બંને ટીમનો ઇનામ વિતરણનો કાર્યક્રમ યોજાયો હતો. વિજેતા ઇલેક્ટ્રોનિક્સ મિડીયાને ટ્રોફી અને 51,000નું રોકડ પુરસ્કાર તેમજ રનર્સઅપ ટીમને ટ્રોફી તેમજ 31,000નું રોકડ પુરસ્કાર એનાયત કરવામાં આવ્યું હતું. તદ્ઉપરાંત પ્રદેશ કોંગ્રેસ સમિતિના મહામંત્રી મહેશ રાજપૂત દ્વારા વિજેતા ટીમને 21,000 તેમજ રનર્સઅપને 11,000નો ચેક આપવામાં આવ્યો હતો. રાજકોટ ગોલ્ડ ડિલર્સ એસોસિએશનના પ્રમુખ ભાયાભાઇ દ્વારા વિજેતા ટીમને 5,000 તેમજ રનર્સઅપ ટીમને 2,500નું રોકડ પુરસ્કાર આપવામાં આવ્યું હતું.

હેડલાઇન અને કાઠિયાવાડ પોસ્ટની સ્પોન્સરશિપથી ઝગમગી ઉઠી ટૂર્નામેન્ટ
મીડિયા ક્રિકેટ ટુર્નામેન્ટ લગભગ પચીસેક વર્ષથી થાય છે. પરંતુ કોઇ અખબાર કે મીડિયા હાઉસે આ ટુર્નામેન્ટની સ્પોન્સરશિપ આપી હોય તેવી ઘટના આ વર્ષે ઇતિહાસમાં પ્રથમ વખત બની હતી. હેડલાઇન દૈનિક આ ટુર્નામેન્ટનું મેઇન સ્પોન્સર હતું. તેમનાં માલિક નિખિલભાઇ પોપટ તરફથી અનન્ય સહયોગ મળ્યો હતો. બીજી તરફ કાઠિયાવાડ પોસ્ટ દૈનિક તરફથી પણ કો-સ્પોન્સર તરીકે ઉમદા સહયોગ મળ્યો હતો. કાઠિયાવાડ પોસ્ટનાં તંત્રી નીરજ વ્યાસે આખી ટુનામેન્ટનાં આયોજનમાં પણ ઊંડો રસ લીધો હોત.

પિન્કી રાચ્છની અવનવી વાનગીઓ ખેલાડીઓને દાઢે વળગી
દર વર્ષે મિડીયા ક્રિકેટ ટૂર્નામેન્ટના તમામ મેચમાં પિન્કીબેન રાચ્છ દ્વારા મેચ દરમિયાન ખેલાડીઓને હાઇજેનીંક ફૂડ પીરસવામાં આવે છે. તેઓ વર્ષોથી રમાતી આ ટૂર્નામેન્ટમાં પોતાનું યોગદાન આપે છે અને તમામ ખેલાડીઓને પિન્કીબેન રાચ્છની અવનવી વાનગીઓ દાઢે વળગે છે.

ક્રિકેટ ટૂર્નામેન્ટને સફળ બનાવવા માટે આયોજકો દ્વારા સુંદર કામગીરી

દર વર્ષે મિડીયા કર્મીઓની સતત ભાગદોડવાળી જીંદગી અને સ્ટ્રેસ હળવો કરવા માટે મિડીયા ક્લબના તુષાર રાચ્છ અને કિન્નર આચાર્યનું શ્રેષ્ઠ આયોજન વચ્ચે ક્રિકેટ ટૂર્નામેન્ટનું આયોજન કરવામાં આવે છે. બંનેની સુઝબુજ અને અન્ય તમામ મિડીયા ક્લબના સભ્યોના સાથ-સહકારથી આ ક્રિકેટ ટૂર્નામેન્ટ દર વર્ષે ભવ્ય રીતે રમાય છે અને તેમાં ઇનામોની પણ વણઝાર કરવામાં આવે છે. આ ટૂર્નામેન્ટ સફળ બનાવવા તુષાર રાચ્છ અને કિન્નર આચાર્ય જહેમત ઉઠાવી હતી. આ વર્ષે રમાનારી ઇન્ટરપ્રેસ ક્રિકેટ ટૂર્નામેન્ટમાં ફાઇનલ વિજેતા ઇલેક્ટ્રોનિકસ મિડીયાને રૂ.51,000 અને ટ્રોફી તેમજ રનર્સઅપ અબતકને રૂ.31,000 તેમજ ટ્રોફી આપી સન્માનીત કરવામાં આવ્યા હતા.