મોરબીમાંથી ત્રણ બાઈકની ચોરી કરનાર શખ્સ જૂનાં ઘુંટુ રોડ પરથી ઝડપાયો

બી ડિવિઝન પોલીસે ત્રણ બાઈક ચોરીના ગુનાનો ભેદ ઉકેલીને ત્રણ બાઈક કબ્જે કર્યા
ખાસ-ખબર સંવાદદાતા
મોરબી સીટી બી ડિવિઝન પોલીસે સામાંકાંઠા વિસ્તારમાં થયેલી ત્રણ મોટર સાયકલની ચોરીનો ભેદ ઉકેલી નાખ્યો છે અને સામાકાંઠા વિસ્તારમાંથી બાઈકોની ચોરી કરનાર શખ્સને ત્રણ ચોરાઉ બાઈક સાથે ઝડપી પાડીને ધોરણસરની કાર્યવાહી હાથ ધરી છે.
મોરબી સિટી બી ડિવિઝન પોલીસની ટીમ જુના ઘુંટુ રોડ ઉપર શંકાસ્પદ શખ્સો તેમજ ચોરીના મોટરસાયકલો બાબતે વાહન ચેકીંગમાં હોય તે દરમિયાન એક શંકાસ્પદ બાઈક ચાલક આવતા તેને અટકાવી તેની પાસે રહેલા બાઈકના નંબરને પોકેટકોપમાં સર્ચ કરી વાહન માલીકનો સંપર્ક કરતા પોતાનુ બાઈક ચોરી થયેલ હોવાનુ અને આ બાબતે મોરબી સીટી બી ડિવિઝન પોલીસ સ્ટેશનમાં ફરીયાદ લખાવેલ હોવાનુ ખુલ્યું હતું જેથી બાઈકચાલક આરોપી ગજુભાઈ જાલમભાઈ દેવરાની પૂછપરછ કરતા તેણે અન્ય બે બાઇકની પણ ચોરી કરીને છુપાવી રાખેલ હોવાની કબુલાત આપતા પોલીસે આરોપીને ઝડપી પાડીને ત્રણેય બાઈકને કબ્જે કરી ધોરણસરની કાર્યવાહી હાથ ધરી છે.