ટંકારા બેઠક પર ફરજમાં મુકાયેલા કર્મચારીઓને ચૂંટણી કાર્યની તાલીમ અપાઈ

ખાસ-ખબર સંવાદદાતા
આગામી 1 લી ડિસેમ્બરે યોજાનારી વિધાનસભાની ચૂંટણી શાંત વાતાવરણ અને વ્યવસ્થાના ભાગરૂપે પાર પાડવા ટંકારા તાલુકા વહીવટી તંત્ર ઉંધા માથે થયુ છે. ચૂંટણી ફરજમાં મુકાયેલા સ્ટાફને ગુરૂવારે બીજા તબક્કાની તાલીમ આપવામાં આવી હતી. આગામી વિધાનસભાની ચૂંટણીના મતદાન આડે હવે માંડ અઠવાડિયુ બચ્ચુ છે ત્યારે રાજકીય પક્ષોના ઉમેદવારો મતદાતાઓને રીઝવવા ઉંધા માથે થયા છે. તેવી રીતે તંત્ર માટે પણ ચૂંટણી પૂર્ણ કરવાની અગ્નિ પરીક્ષા છે. તાલુકાનું વહીવટી તંત્ર ચૂંટણી જાહેર થયા બાદ ખાંડા ખખડાવી પંચની પ્રક્રિયામાં ઉત્તિર્ણ થવા ચૂંટણી પંચની ગાઈડલાઈન પ્રમાણે લડવા તૈનાત થઈ મેદાને ઉતરી પડ્યું છે. ટંકારા બેઠકમાં લગભગ ત્રણસો બુથ ઉપર મતદાન થવાનુ હોય તંત્ર દ્વારા ચૂંટણી ફરજ માટે કર્મચારીઓના હુકમ બજાવી પ્રથમ તાલીમ પણ આટોપી લીધા બાદ ચૂંટણીમાં તૈનાત કરાયેલા પ્રિસાઈડીંગ અને પોલીંગ સ્ટાફને ગુરૂવારે બીજા તબક્કાની તાલીમ ટંકારાની આર્ય વિદ્યાલયના કેમ્પસમાં આપવામાં આવી હતી અને હજુ બાકી રહેલા કર્મચારીઓને તાલીમ આપી બુથ પર જતા પૂર્વે તમામ કર્મચારીઓને ચૂંટણી પ્રક્રિયા પૂર્ણ કરવા માટે સંપૂર્ણ સજ્જ કરવામાં આવશે. તાલીમ કાર્યક્રમ પૂર્ણ થયે મતદાન મથકે બુથ પર જનારા સહિત ચૂંટણી ફરજ પર નિમાયેલા તમામ કર્મચારીઓ અધિકારીઓને મતદાન દિવસના પૂર્વ દિન તા. 30 નવેમ્બરે ડિસ્પેચ કેન્દ્ર પર બોલાવી ચૂંટણી સાહિત્ય સાથે ક્યાં કર્મચારીને કયા મતદાન મથક પર ફરજ બજાવવાની છે એ હુકમો આપી ઈવીએમ સાથે આગલે દિવસે રવાના કરવા સુધીનું લેશન તંત્રએ કરી લીધું હોવાનું જાણવા મળેલ છે.