ભાવનગરમાં ડુંગળીની હરાજી બંધ: વડોદરામાં અનાજનો જથ્થો અટવાયો: સુરતમાં પેટ્રોલ-ડીઝલનો પર્યાપ્ત પ્રમાણમાં જથ્થો ઉપલબ્ધ
ખાસ-ખબર સંવાદદાતા
ભારતીય ન્યાય સંહિતાના હિટ એન્ડ રન પર કરવામાં આવેલી નવી જોગવાઈનો હાલ ગુજરાત સહિત દેશભરમાં વિરોધ થઈ રહ્યો છે. આ નવા નિયમ મુજબ જો રોડ પર કોઈ હિટ એન્ડ રનની ઘટના બને તો વાહન ચાલકને 10 વર્ષની સજા થશે. આ સિવાય તેણે દંડ પણ ભરવો પડશે. જેને લઈ ગુજરાત સહિત દેશભરમાં ટ્રક ચાલકોની હળતાળની વચ્ચે રાજ્યના અનેક વિસ્તારોમાં તેની અસર થઈ છે. વિગતો મુજબ ભાવનગરમાં ડુંગળીની હરાજી બંધ છે તો વડોદરામાં ટ્રક ચાલકોની હડતાળને લઈ અનાજનો જથ્થો અટવાય તેવી વેપારીઓને ચિંતા છે. જોકે ટ્રક ચાલકોની હડતાળની સુરતમાં નહીવત અસર જોવા મળી છે. સુરતમાં પેટ્રોલ-ડીઝલનો પુરતા પ્રમાણમાં જથ્થો ઉપલબ્ધ હોવાનું પણ સામે આવ્યું છે.
- Advertisement -
ટ્રક ચાલકોની હડતાળ વચ્ચે ભાવનગર માર્કેટિંગ યાર્ડમાં ડુંગળીની હરાજી બંધ છે. આ તરફ યાર્ડમાં ડુંગળીની હરાજી બંધ રહેતા ખેડૂતોમાં રોષ જોવા મળી રહ્યો છે. આ તરફ ટ્રક ચાલકોની હડતાળને લઈ વડોદરામાં અનાજનો જથ્થો અટવાય તેવી વેપારીઓને ચિંતા છે. હાલમાં માલ પુરતા પ્રમાણમાં ન મળે તો હાલાકી થઈ શકે છે. હડતાળ લાંબી ચાલે તો રાજ્ય બહારથી આવતુ અનાજ અટકી શકે છે. ખાદ્ય સામગ્રીમાં કેટલિક ચીજ વસ્તુઓ બહારથી આવે છે તેથી હડતાળના કારણે બહારથી આવતા અનાજને અસર થશે. રાજ્ય સહિત દેશભરમાં ચાલતી ટ્રક ચાલકોની હડતાળની સુરતમાં નહીવત અસર જોવા મળી છે. વિગતો મુજબ ડિલરોમાં પેટ્રોલ-ડિઝલનો જથ્થો અટવાવાની ચિંતા છે. પણ રાહતની વાત એ છે કે, સુરતમાં પેટ્રોલ-ડીઝલનો જથ્થો પુરતા પ્રમાણમાં ઉપલબ્ધ છે.
સાબરકાંઠામાં શાકભાજીના ભાવમાં 60%નો કડાકો
દેશભરમાં ટ્રક ચાલકો દ્વારા હીટ એન્ડ રનના કાયદાની જોગવાઇને લઇને હડતાળ કરવામાં આવી રહી છે. હીટ એન્ડ રનના કાયદામાં અકસ્માત કરનાર વ્યક્તિ ભાગી જાય તો તેને 10 વર્ષની સજા અને 7 લાખ રૂપિયા સુધીના દંડની જોગવાઈ કરવામાં આવી છે. જેના વિરોધના પગલે ટ્રક ચાલકો વિરોધ નોંધાવી રહ્યાં છે. ટ્રક ચાલકોની હડતાળની અસર ગુજરાતમાં પણ જોવા મળી છે. સાબરકાંઠા શાકમાર્કેટમાં હડતાળના પગલે શાકભાજીનો ભરાવો થયો છે. જેના કારણે શાકભાજીના ભાવ ગગડ્યા છે. શાકભાજીના ભાવમાં 60 ટકા જેટલો ઘટાડો જોવા મળી રહ્યો છે.
