અયોધ્યાનો ચુકાદો આપનાર પાંચ જજને પ્રાણ પ્રતિષ્ઠા મહોત્સવમાં પધારવા માટે ખાસ આમંત્રણ

-50 જાણીતા વકીલો-જજને આમંત્રણ અપાયા

રામજન્મભૂમિ બાબરી મસ્જિદ મામલે ચુકાદો આપનાર બંધારણિય બેંચમાં સામેલ રહેલા 5 જજ હવે રામલલાની પ્રાણ પ્રતિષ્ઠાના સાક્ષી બનશે. રામજન્મભૂમિ મામલે ચુકાદો આપનાર બેંચનું નેતૃત્વ તત્કાલીની ચીફ જસ્ટિસ રંજન ગોગોઈએ કર્યું હતું. આ ઉપરાંત પૂર્વ CJI એસએ બોબડે, હાલના CJI ડીવાય ચંદ્રચૂડ, જસ્ટિસ અશોક ભૂષણ અને જસ્ટિસ એસ અબ્દુલ નઝીર પણ બેંચનો ભાગ હતા.

લો ટુડેના રિપોર્ટ મુજબ દેશભરના જાણીતા 50 વકીલો તેમજ જજોએ પ્રાણ પ્રતિષ્ઠાના આયોજનમાં બોલાવવામાં આવ્યા છે. જેમાં અનેક પૂર્વ ચીફ જસ્ટિસ અને જાણીતા વકીલ પણ સામેલ છે.ખાસ કરીને 9 નવેમ્બર, 2019નાં રોજ રામજન્મભૂમિ મામલે ચુકાદો આપનાર જજની હાજરી મહત્વની રહેશે. કોર્ટે વિવાદિત ભૂમિનો સંપૂર્ણ ભાગ રામલલા બિરાજમાનને આપવાનો ચુકાદો આપ્યો હતો.

આ ઉપરાંત મુસ્લિમ પક્ષને અયોધ્યામાં બીજી જગ્યાએ 5 એકર જમીન મસ્જિદ બનાવવા આપવાનો આદેશ આપ્યો હતો. હિન્દુ પક્ષનો દાવો હતો કે અયોધ્યામાં જે જગ્યાએ બાબરી મસ્જિદ હતી ત્યાં જ ભગવાન રામનો જન્મ થયો હતો. બાબરી મસ્જિદ ત્યાં રહેલા પ્રાચીન રામ મંદિરને તોડીને બનાવવામાં આવી હતી. એવામાં તે જ જગ્યાએ જ રામ મંદિર બનવું જોઈએ. કોર્ટે આ દાવાને યોગ્ય ગણાવ્યો હતો.