ગાદલા નીચેથી દેશી બનાવટની બે પિસ્ટલ તેમજ એક કોથળીમાંથી સાત કારતૂસ મળી
ખાસ-ખબર સંવાદદાતા
વિધાનસભાની ચૂંટણી શાંતિપૂર્ણ માહોલમાં યોજાય તે માટે પોલીસ શહેરભરમાં સતત ચેકિંગ કરી રહી છે. ત્યારે બે હથિયાર સાથે પકડાયેલા શખ્સે માતાના પ્રેમીનો કાંટો કાઢવા માટે હથિયાર લઇ આવ્યાનું પોલીસ તપાસમાં ખુલ્યું છે. નવા થોરાળા-1માં રહેતા અવેશ અયુબ ઓડિયા નામના શખ્સના ઘરે ગેરકાયદે હથિયાર રાખ્યા હોવાની માહિતી મળી હતી. જે માહિતીના આધારે થોરાળા પોલીસે સોમવારે બપોરે બાતમી મુજબના સ્થળે દરોડો પાડ્યો હતો. દરોડા દરમિયાન અવેશ ઓડિયા ઘરમાંથી મળી આવ્યો હતો. જ્યારે તેના ઘરની તલાશી લેતા સેટીમાં રહેલા ગાદલા નીચેથી દેશી બનાવટની બે પિસ્ટલ તેમજ એક કોથળીમાં સાત કારતૂસ મળી આવ્યા હતા. જે ચેક કરતા ત્રણ જીવતા કારતૂસ હતા અને ચાર ફૂટેલા કારતૂસ હોવાનું જાણવા મળ્યું હતું. નાનપણમાં મારામારી સહિતના ગુનામાં સંડોવાયેલા અયુબ ઓડિયા પાસેથી રૂ.1 લાખની કિંમતના બે હથિયાર અને જીવતા-ફૂટેલા કારતૂસ કબજે કર્યા છે.
- Advertisement -
થોરાળા પોલીસ મથકના પીઆઇ એલ.કે.જેઠવાએ વિગતો આપતા જણાવ્યું કે, અયુબની માતા કોઇની સાથે રિલેશનશિપથી રહે છે. જે વાતથી અયુબ નારાજ હોય તેનો કાંટો કાઢવાનું નક્કી કર્યું હતું. ત્યારે અગાઉ જેલમાં પરિચયમાં આવેલા મધ્યપ્રદેશનો શખ્સ પેરોલ પર બહાર આવ્યો હોવાની જાણ થતા અયુબે તેનો સંપર્ક
કર્યો હતો.
