શાસ્ત્રી મેદાન પાસે બાતમી આધારે દરોડો : 2.96 લાખનો મુદ્દામાલ કબજે
ખાસ-ખબર ન્યૂઝ રાજકોટ
- Advertisement -
રાજકોટ એસઓજીએ બાતમી આધારે 24 કિલો ગાંજાના જથ્થા સાથે બે શખ્સને ઝડપી લીધા હતા. પોલીસે ગાંજો અને બાઇક સહિત કુલ રૂ.2,95,690નો મુદ્દામાલ જપ્ત કરી બંનેને રિમાન્ડ પર લેવા તજવીજ કરી હતી ખેપિયો ઓરિસ્સાથી ગાંજો લાવ્યો હોવાની કબૂલાત આપી હતી.
રાજકોટના નાના મવા રોડ પરના ગોવિંદ રત્ન બંગલો સામે રહેતા કાર્તિક ઉર્ફે ભોલો કાનજી ગોહેલે ઉ.33એ ગાંજાનો જથ્થો મંગાવ્યો છે અને તેનો માણસ ગાંજો લઇને સોમવારે રાજકોટ આવી પહોંચશે તેવી ચોક્કસ માહિતી મળતાં એસઓજીના પીઆઇ એસ.એમ.જાડેજા સહિતની ટીમે કાર્તિક પર વોચ ગોઠવી હતી દરમિયાન સોમવારે સવારે કાર્તિક બાઇક લઇને નીકળ્યો હતો અને ત્રિકોણબાગ પાસેથી એક શખ્સને બાઇકમાં બેસાડ્યો હતો બંને શખ્સ શાસ્ત્રી મેદાન પાસે પહોંચ્યા તે સાથે જ પીઆઇ જાડેજા સહિતની ટીમે બંનેને આંતરી જડતી લેતા બંને પાસેથી 2,40,690નો 24.069 કિલોગ્રામ ગાંજો મળી આવ્યો હતો. પોલીસે ગાંજો, બાઇક અને બે મોબાઇલ સહિત કુલ રૂ.2,95,690નો મુદ્દામાલ જપ્ત કરી કાર્તિક અને તેના સાગરીત કોઠારિયા રેલવે સ્ટેશનની સામે રહેતા જીવા હાથિયા ચુડાસમા ઉ.42ની ધરપકડ કરી હતી પોલીસની પ્રાથમિક પૂછતાછમાં અગાઉ કાર્તિક દારૂના ગુનામાં ક્રાઇમ બ્રાંચના ચોપડે ચડી ચૂક્યો છે.
કાર્તિકે ગાંજો ખરીદવા માટે 15 હજાર એક ખેપના આપી જીવાને ઓરિસ્સા મોકલ્યો હતો રાજકોટથી જીવો ઓરિસ્સા ટ્રેનમાં ગયો હતો અને ત્યાંથી ગાંજો ખરીદી વડોદરા પહોંચ્યો હતો. વડોદરાથી બસમાં બેસી રાજકોટ આવ્યો હતો અને કાર્તિક તેને સલામત સ્થળે લઇ જાય તે પહેલાં પોલીસ પહોંચી ગઇ હતી. પોલીસે ઓરિસ્સાના શખ્સને ઝડપી લેવા એક ટીમને રવાના કરી છે કાર્તિક ગોહેલ મવડીના રામધણ વિસ્તારમાં માદક પદાર્થની પડીકી બનાવી તેનું વેચાણ કરતો હતો. ઓરિસ્સાથી ગાંજો આવ્યા બાદ તેની પણ પડીકી બનાવી વેચાણ કરવાનું હતું, પરંતુ તે પહેલાં પોલીસ પહોંચી ગઇ હતી.
