મૂળ રાજસ્થાનનો શખ્સ સ્થાનિક શખ્સની મદદથી નશાનો કાળો કારોબાર કરતો હતો
ખાસ-ખબર સંવાદદાતા
મોરબીમાં નશીલા પદાર્થ ગાંજાના વેચાણની સાથે સાથે સમયાંતરે મેફેડ્રોન ડ્રગ્સ પણ પકડાઈ રહ્યું છે ત્યારે ગઈકાલે એસઓજી ટીમે મોરબી તાલુકાના લાલપર ગામેથી નશાનો કાળો કારોબાર કરતા રાજસ્થાની શખ્સને રૂ. 1.94 લાખના મેફેડ્રોન સાથે ઝડપી પાડીને એક સ્થાનિક તેમજ રાજસ્થાનના દાઉદ ઇબ્રાહિમ નામના શખ્સની સંડોવણીને ખુલ્લી પાડી હતી.
આ અંગે મળતી માહિતી મુજબ મોરબી પોલીસની સ્પેશિયલ ઓપરેશન ગ્રુપની ટીમને બાતમી મળી હતી કે, મોરબી તાલુકાના લાલપર ગામે મૂળ રાજસ્થાનનો વતની શખ્સ યુવાધનને નશાની લતે ચડાવવા મેફેડ્રોન નામના ડ્રગ્સનું વેચાણ કરી રહ્યો છે જે બાતમીને આધારે મોરબી એસઓજી ટીમે દરોડો પાડીને આરોપી હકીમ રોડાજી આંકી નામના શખ્સને ઝડપી લઇને આ શખ્સના કબ્જામાંથી રૂ. 1.94 લાખની કિંમતનું 19.4 ગ્રામ મેફેડ્રોન ડ્રગ્સ, રૂપીયા 85,000 રોકડા, એક વજન કાંટો અને એક મોબાઈલ ફોન મળી કુલ રૂ. 2.80 લાખનો મુદામાલ કબ્જે કર્યો હતો. આ આરોપીની પૂછપરછમાં આરોપીએ મેફેડ્રોન ડ્રગ્સના આ ગોરખધંધામાં રાજસ્થાનના દાઉદ ઇબ્રાહિમ બેલીમ તેમજ મોરબી ત્રાજપરના જીતેન્દ્ર રામજી પ્રજાપતિની સંડોવણી હોવાનું કબુલતા એસઓજી ટીમે ત્રણેય આરોપીઓ વિરુદ્ધ મોરબી તાલુકા પોલીસ મથકમાં એનડીપીએસ એક્ટ મુજબ ગુન્હો દાખલ કરાવ્યો હતો.
