દોષારોપણનું સ્વરૂપ, ગુનાની ગંભીરતા, પ્રથમ દર્શનીય ટેકો આપતા પુરાવાનું સ્વરૂપ, સાહેદો સાથે ચેડાં થવાની સંભાવના ધ્યાને લેવી જોઈએ: સુરેશ ફળદુ
ખાસ-ખબર ન્યૂઝ રાજકોટ, તા.6
પૂરા ગુજરાતને હચમચાવી દેનાર અને સ્વજનોના હૃદયદ્રાવક કરુણ રુદનથી દેશની જનતાને આંસુ લાવી દેનાર ઘટના કે જેમાં છાપાના સમાચારના આધારે નામદાર ગુજરાત હાઈકોર્ટે રજાના દિવસે સુઓમોટો રીટ દાખલ કરી બીજે જ દિવસે પોલીસ કમિશનર તથા મ્યુનિસિપલ કમિશનર સહિત તંત્રોને આડે હાથ લઈ સાડા ચાર કલાક જેનું હિયરીંગ ચાલેલ હોય તેવી રાજકોટ મુકામેની ટી.આર.પી. અગ્નિકાંડની ઘટનામાં 27ના ભોગ લેનાર ગુનાના કામે પકડાયેલ આરોપી અશોકસિંહ જગદીશસિંહ જાડેજા તથા કિરીટસિંહ જગદીશસિંહ જાડેજાનાઓએ રેગ્યુલર જામીન પર મુક્ત થવા સેશન્સ અદાલતમાં કરેલી જામીન અરજીઓ ચાલી જતાં બંને જામીન અરજીઓ રાજકોટના મહે. એડી. સેશન્સ જજ એસ. ડી. સુથારે નામંજૂર કરતો હુકમ ફરમાવેલો છે.
- Advertisement -
કેસની હકીકત જોઈએ તો ટી.આર.પી. ગેમઝોનના સંચાલકો આરોપી ધવલ કોર્પોરેશનના પ્રોપરાઈટર ધવલ ભરતભાઈ ઠક્કર તથા રેસ વે એન્ટરપ્રાઈઝના ભાગીદારો અશોકસિંહ જગદીશસિંહ જાડેજા, કિરીટસિંહ જગદીશસિંહ જાડેજા, પ્રકાશચંદ્ર કનૈયાલાલ હીરણ, યુવરાજસિંહ હરીસિંહ સોલંકી, રાહુલ લલીતભાઈ રાઠોડ તથા તપાસમાં ખુલવા પામે તે તમામ સામે 50 મીટર પહોળુ અને 60 મીટર લાંબુ અને બેથી ત્રણ માળ જેટલું ઉંચુ લોખંડ તથા પતરાનું ફેબ્રીકેશનનું માળખુ ઉભુ કરી ગેમઝોન બનાવી તેમાં આગ લાગવાની ઘટના બને તો પહોંચી વળી આગ રોકી મનુષ્ય જીવનને બચાવી શકાય તેવા કોઈ અસરકારક ફાયરના સાધનો રાખ્યા વગર કે અગ્નિશમન વિભાગની એન.ઓ.સી. કે પ્રમાણપત્ર મેળવ્યા વગર જોખમી જગ્યામાં ગેમઝોન ચલાવી તેમાં આગ લાગવાનો બનાવ બને તો ગંભીર ઈજાથી લઈ માનવ મૃત્યુ થવાની શતપ્રતિશત સંભાવના હોવાની જાણકારી હોવા છતાં ગેમ ઝોન ચાલુ રાખી 27 માનવો મૃત્યુ નિપજાવી મહાવ્યથાઓ સાથે આ ગેમઝોનમાંથી નાસી ભાગી નીકળેલ ન હોય તો તેઓના પણ મૃત્યુ સંભવ હતા તેવા જોખમમાં નાખી ગુનો કર્યા અન્વયે રાજકોટ તાલુકા પોલીસ સ્ટેશનના સર્વેલન્સ પી.એસ.આઈ. પ્રજ્ઞેશકુમાર ભીખાભાઈ ત્રાજીયાએ ફરિયાદ આપેલી હતી.
ઉપરોક્ત ગુનાના કામે ધરપકડ પામેલ આરોપી અશોકસિંહ જાડેજા તથા કિરીટસિંહ જાડેજાએ રેગ્યુલર જામીન ઉપર મુક્ત થવા રાજકોટની સેશન્સ અદાલતમાં જામીન અરજીઓ કરી તેઓ નિર્દોષ હોવાનું અને સીધી કે આડકતરી રીતે સંડોવાયેલ ન હોવાનું, યોગદાન નહીં હોવાનું અને સ્લીપીંગ પાર્ટનર હોવાનું અને અશોકસિંહ આંધળા તથા બહેરા હોવાનું કરેલી રજૂઆતો સામે સ્પે. પી.પી. તથા એડી. સ્પે. પી.પી. દ્વારા દલીલો કરેલી અને ભોગ બનનાર પરિવાર વતી વિગતવાર વાંધા રજૂ કરી
એડવોકેટ સુરેશ ફળદુ સહિતનાઓએ રજૂઆત કરેલી કે અરજદારોના પ્રથમથી જ એફ.આઈ.આર.માં નામ છે, સબ ચલતા હૈની જેમ આ કિસ્સો મેન મેઈડ ટ્રેજેડીનો કિસ્સો છે, ટી.આર.પી. ગેમઝોનમાં બીઝનેશ ઉપર સંપૂર્ણ કંટ્રોલ અરજદારોનો હતો, અરજદારો જમીન માલીક કમ પેઢીના ભાગીદાર કમ એક પેઢીને ભાડા કરાર કરી આપી તેમાં ગેરકાયદેસર બાંધકામ તથા ફેબ્રીકેશન ઉભું કરી બેરોકટોક ગેરકાયદેસર ધંધાઓ 2021થી અરજદારો ચાલવા દેતા હતા તે વખતે અરજદારોના જ્ઞાનમાં હતું કે અગ્નિશામક વસ્તુઓ સ્થળ પર નથી કે તેનો પરવાનો નથી કે જરૂરી લાયસન્સો નથી, ગેમઝોનમાં એક્ઝિટ ગેઈટ નથી, ગેમઝોનમાં બાળકો તથા તેના સંબંધીઓ અંદર છે તેવા સમયે વેલ્ડીંગ કરવાથી તેનો તિખારો નીચે રહેલી ઝડપથી અગ્નિ પકડી લે તેવી વસ્તુ ઉપર પડવાથી આગ લાગી શકે અને માનવ જિંદગીનો અંત આવી શકે તેવા જ્ઞાન સાથે નફાખોરીના હેતુથી રહેણાંકની જગ્યા ઉપર કોમર્શિયલ બિઝનેશ ચલાવતા હતા. ગેરકાયદેસર બાંધકામ હટાવવા નોટીસો બાદ પણ હટાવવામાં આવેલ હોવાનું અને વર્ષ દિવસ પહેલા આગની ઘટના ઘટેલ હોવા છતાં ફાયર સેફ્ટી અંગેના પરવાના લીધા વગર માનવ જિંંદગી જોખમાય તેમ હોવાની દરેક બાબતો અરજદારોના જ્ઞાનમાં હતી ત્યાં તેઓની ઓફીસ હતી, તેઓનું મોનીટરીંગ હતું. ગુનાના કામે પ્રીપેરેશન એક્ટ અને નોલેઝની આરોપીઓની હાજી છે લોકોએ જીવ ગુમાવવા પડે તેવા જ્ઞાન સાથે આરોપીઓએ ગુનો આચરેલ છે. એક અરજદારે આંધળા બહેરા હોવાનો બચાવ લીધેલો પરંતુ ગુનો દાખલ થયા પહેલાં તેઓ સહી કરતા હતા અને ગુનો દાખલ થયા બાદથી સહાનુભૂતિ મેળવવા અંગુઠો કરતા હોય આંધળા બહેરાની માનવતા સામે 27 લોકોના મૃત્યુની ઘટનામાં માનવતાનું પનુ કઈ બાજુ ભારે છે તે લક્ષે લેવું જોઈએ. આ તબક્કે દોષારોપણનું સ્વરૂપ ગુનાની ગંભીરતા પ્રથમ દર્શનીય ટેકો આપતા પુરાવાનું સ્વરૂપ સાહેદો સાથે ચેડા થવાની સંભાવના હોય અને આ કોઈ કુદરતી નહીં પરંતુ માનવસર્જિત ટી.આર.પી. ગેમઝોનમાં અગ્નિકાંડનો બનાવ બનવા પામેલ હોય 27 લોકોએ આરોપીઓના કારણે જીવ ગુમાવેલા હોય પરિવારના માળા વેરવિખેર થઈ ગયેલ હોય ત્યારે બંને આરોપીઓની જામીન અરજી નામંજૂર કરવી જોઈએ, લંબાણપૂર્વકની દલીલો કરવામાં આવી હતી.
તમામ પક્ષેની રજૂઆતો, ત.ક. અધિકારીના સોગંદનામા, ભોગ બનનાર પક્ષોના વાંધાઓ તેમજ સ્પે. પી.પી., એડી. સ્પે. પી.પી. અને ભોગ બનનાર પરિવારપક્ષેના વકીલની રજૂઆતો લક્ષે લઈ બંને અરજદારોની રેગ્યુલર જામીન અરજી નામંજૂર કરતો હુકમ ફરમાવવામાં આવેલો છે. ઉપરોક્ત કામમાં ભોગ બનનાર પ્રદિપસિંહ ચૌહાણ પરિવાર વતી રાજકોટ બાર એસોસિએશન વતી ઉપપ્રમુખ સુરેશ ફળદુ, સ્પે. પી.પી. તુષાર ગોકાણી, એડી. સ્પે. પી.પી. નીતેશ કથીરીયા તથા અન્ય એક ભોગ બનનાર વતી એન. આર. જાડેજાનાઓએ હાજરી રહી કાર્યવાહી કરેલી હતી.
