મડિટેશન

રાજકોટની ઋચા ગોસ્વામી ‘મડઆર્ટ’ દ્વારા ઘરોને કરે છે સુશોભીત

ખાસ-ખબર સંવાદદાતા
વર્ષો જૂની કચ્છની પરંપરાગત હસ્તકલાનો આજે પણ દેશભરમાં ટ્રેન્ડ છે ત્યારે ખાસ કરીને ‘મડઆર્ટ’ દિવાલો પર સુંદરતા લાવે છે. ‘મડઆર્ટ’ મુખ્યત્વે રબારી સમાજની મહિલાઓ દ્વારા કરવામાં આવે છે અને આ કળા ખાસ કરી કચ્છમાં વધુ જોવા મળે છે. પરંતુ હવે આ કળા રાજકોટમાં પણ મોટાપાયે જોવા મળી રહી છે. રાજકોટમાં રહેતાં ઋચાબેન ગોસ્વામી છેલ્લાં 19 વર્ષથી ‘મડઆર્ટ’ કરી રહ્યા છે. તેમણે પોતાની આ આર્ટનું નામ ‘મડિટેશન’ રાખ્યું છે. તેમનું કહેવું છે કે આ વર્ક ખૂબ જ ધ્યાનપૂર્વક અને એકચિત્તે કરવામાં આવે છે જેથી આ વર્કનું નામ મડિટેશન રાખ્યું છે.
આ અંગે વધુ માહિતી આપતાં ઋચા ગોસ્વામીએ જણાવ્યું કે ‘મડઆર્ટ’ દ્વારા ઘરની દિવાલોને સુશોભીત કરવામાં આવે છે. 10 વર્ષ જૂની માટીને પ્રોસેસ કરી આ મડવર્ક કરવામાં આવે છે. ઘરની દિવાલો, લાકડાના ગણપતિ, પ્લાયવુડ પર મડવર્ક કરવામાં આવે છે. ઘરની દીવાલો પર તમારા ઘરને તેમજ મનપસંદ કલર સાથે માટીનું લીંપણ દીવાલો પર કરવામાં આવે છે. જેમાં આભલા, મીના સહિતની ડેકોરેટીવ વસ્તુઓનો ઉપયોગ કરી ઘરને સુશોભિત કરવામાં આવે છે. આ સાથે આ વર્ક ટકાઉ પણ છે એટલું જ નહીં પરંતુ આ વર્ક દરેક ઋતુ સામે રક્ષણ પણ આપે છે. ઉનાળામાં ઘરની દિવાલને તપવા નથી દેતું અને શિયાળામાં ઘરમાં ગરમાવો પણ રહે છે.
કચ્છમાં રબારી સમાજ ગામડાઓની સીમમાં રહે છે ત્યારે કઠોર આબોહવાથી રક્ષણ મેળવવા ભૂંગા તરીકે ઓળખાતા કોમી અથવા પારિવારીક ઘરોમાં કચ્છીઓ વસવાટ કરે છે. કચ્છના વિવિધ સમુદાયના કારીગરો પોતાની અલગ-અલગ શૈલીમાં આ વર્ક કરતાં હોય છે. કિચડનું લીંપણ કરી તેમાં અરીસા, આભલા, મીના લગાડી ભૂંગાને સજાવવામાં આવે છે. અત્યારે પણ અનેક લોકો આ પ્રણાલીને વળગી રહ્યા છે. મુસ્લિમ સમુદાયના કારીગરો લીંપણ કામના ગ્રાફીક અને આકર્ષક ભૌમિતિક પદ્ધતિઓથી આજે પણ વળગી રહ્યા છે ત્યારે ઋચા ગોસ્વામીએ પણ આ કળાને શરૂઆતમાં વેડિંગ ડેકોર, ન્યુઝ પેપર આર્ટ, પેપર ક્વિલિંગ, પેપર આર્ટ, જૂટ આર્ટ, હેન્ડમેડ કસ્ટમાઈઝ જવેલરી, મીણબતી આર્ટ, ગ્લાસ પેઈન્ટીંગ, થ્રેડ આર્ટ સહિત વિવિધ વસ્તુઓ પર અજમાવી છે ત્યારે આ કળા હવે પૂરા રાજકોટમાં વખણાય છે અને લોકો હવે પોતાના ઘરોને સુશોભિત કરવા ‘મડઆર્ટ’ તરફ વળ્યા છે. આમ આ વર્ષો જૂની સંસ્કૃતી કળા આજે પણ જીવંત છે જેને લોકો આજે પસંદ કરતા થયા છે.