રાજકોટમાંથી કાર ભાડે લઈ, ભાડાનું બુચ મારી, કાર પડાવી લેવાનું કારસ્તાન

રાજકોટ-જામનગરની બેલડીએ 1.82 કરોડની 26 કાર પડાવી લીધાની ફરિયાદ
ક્રાઇમ બ્રાન્ચની ટીમે બંને ભેજાબાજોની ધરપકડ કરી મુદ્દામાલ કબજે કરવા તજવીજ હાથ ધરી
ખાસ-ખબર ન્યૂઝ રાજકોટ, તા.23

રાજકોટમાંથી સેલ્ફ ડ્રાયવીંગ સાથે કાર ભાડે લઈ ભાડું નહીં ચૂકવી કાર બારોબાર વેચી નાખવાના કૌભાંડનો પર્દાફાશ ક્રાઇમ બ્રાન્ચએ કર્યો છે ત્રણ વેપારીની 1.82 કરોડની 26 કારનું કૌભાંડ સામે આવતા ડીસીબીની ટીમે બે શખ્સોની ધરપકડ કરી તમામ કાર કબજે કરવા તજવીજ હાથ ધરી છે.

રાજકોટના રેલનગરમાં જાનકી વાટિકા સોસાયટીમાં રહેતાં પીન્ટુભાઇ રાજેશભાઈ ચાવડા ઉ.27એ રાજકોટની ખોડલધામ સોસાયટીના કાનજી ઉર્ફે આકાશ ઉર્ફે અકી ગોગન પટેલ અને જામનગરના બિલાલ હશનશા શાહમદાર સામે બી. ડિવિઝન પોલીસમાં છેતરપીંડી અંગે નોંધાવેલી ફરિયાદમાં જણાવ્યું હતું કે તે મોરબી રોડ જકાતનાકા પાસે મહાદેવ સેલ્ફ ડ્રાઈવીંગ નામની ઓફિસ આવેલ છે અને ફોરવ્હીલ સેલ્ફ ડ્રાઈવીંગમાં ભાડે આપવાનો ધંધો કરે છે. તેની સાથે જયકિશનભાઈ ભટ્ટ, શીવમભાઇ ભટ્ટ, કૌશીકભાઇ ગાંગાણી, દેવાંગભાઈ હરસોડા, પ્રતીક પટેલ ભાગીદાર છે. તેમની પાસે ગ્રુપની કુલ 20 ગાડીઓ છે એકાદ વર્ષ પહેલા કાનજી ઉર્ફે આકાશ ઉર્ફે અકીનો ફેસબુક મારફતે પાર્ટનર જયકિશનભાઈને સંપર્ક થયેલ હતો. કાનજી કયારેક કયારેક ગાડીઓની જરૂર હોય તો સંપર્ક કરતો અને તેને ગાડીઓ ભાડેથી આપતા અને તે પોતાનુ કમીશન રાખી ગાડીઓ તેના કસ્ટમરને સેલ્ફ ડ્રાઇવીંગથી ભાડેથી આપતો હતો. બે મહિના પહેલા કાનજીએ ફોન કરી મારી પાસે એક પાર્ટી આવેલ છે તેને પાંચ દિવસ માટે તેને એક નાની સારી ગાડી જોય છે. પાર્ટી વિશે પૂછતાં તેને કહેલ કે, બિલાલભાઈ શાહમદાર નામના શખ્સને ગાડી જોઈએ છે. જેથી જયકિશનએ કહેલ કે, સારૂ અમારી પાસે કિયા સેલટોસ ગાડી છે અને એક દિવસનું ભાડુ રૂ.3 હજાર જણાવતાં કાનજીએ હા પાડી રાત્રીના આરોપી ઓફીસે આવેલ અને ગાડી ભાડેથી સેલ્ફ ડ્રાઇવીંગમાં પાંચ દિવસ માટે આપેલી હતી પાંચ દિવસનું ભાડુ રૂ.3 હજાર લેખે રૂ.15 હજાર એડવાન્સ લીધેલ હતુ. ત્યારબાદ પાંચ દિવસ પુરા થતા હોય જેથી કાનજીને ફોન કરતાં તેણે આ ગાડી ગમી ગયેલ છે અને હજુ પાંચ દિવસ ગાડી જોય છે તેમ વાત કરેલી અને ઓફીસે આવી બીજા પાંચ દિવસનું ભાડુ રૂ.15 હજાર આપેલ હતાં. તેમજ તે પાર્ટીને બીજી એક ગાડી જોય છે તેમ વાત કરેલી જેથી ટોયોટા કોરોલા હતી. જે ગાડી પાંચ દિવસ માટે સેલ્ફ ડ્રાઇવીંગથી ભાડેથી પાંચ દિવસના રૂ.9 હજાર તેણે આપેલા હતાં.

ત્યારબાદ કિયા ગાડી કાનજીએ પંદરમાં દિવસે પરત કરેલી અને તેનું ભાડુ આપી દીધેલ હતુ અને ટોયોટા કોરોલા ગાડી દિવસ 10 રાખી તેનું ભાડુ પણ આપી દિધેલ હતુ ત્યારબાદ બંને આરોપી રેગ્યુલર ધંધાનુ ગાડીનુ ભાડુ સમયસર આપી દેતા હોય જેથી તેઓ ઉપર વિશ્ર્વાસ બેસી ગયેલ હતો ત્યારબાદ કાનજીએ બિલાલને ગાડીઓ આપવા ગાડીઓનું અલગ અલગ ભાડુ નકકી કરી આર્ટિગા, થાર, ફોચ્ર્યુનર, વર્ના, સ્કોર્પિયો, કિયા, બ્રેઝા સહિતની 14 કાર રૂ.2 હજારથી રૂ.4500ના ભાડે ઓફિસથી લઇ ગયેલ હતાં જે ગાડીઓનુ ભાડુ તથા ગાડીઓ પરત આપેલ નથી જે ગાડીઓનુ ભાડુ કાનજી સમયસર ચુકવતા ન હોય જેથી વારંવાર ભાડુ ચુકવવા તેમજ ગાડીઓ પરત આપવા માટે કહેતા ખોટા વાયદાઓ કરી સમય પસાર કરતા હોય અને કહેલ કે, તમામ ગાડીઓ જામનગર વાળા બિલાલને ભાડે આપેલ છે, ત્યાંથી ભાડુ આવશે એટલે હું આપને ચુકવી આપીશ તેમ જણાવતા પરંતુ બંને શખ્સોએ તમામ ગાડીઓનુ ભાડુ ચુકવેલ ન હોય અને ગાડીઓ પણ પરત ન આપી વિશ્વાસઘાત અને છેતરપીંડી કરેલ હતી.

ઉપરાંત આરોપીઓએ વધું ગાડી ભાડે આપવાનું કહેતાં ફરિયાદીના મિત્ર વિલપુલભાઇ કરશનભાઇ રાતડીયાએ ગ્રીનલેન્ડ ચોકડીએથી 12 મોંઘી ગાડીઓ આકાશ અને બિલાલને ભાડેથી આપેલ હોય અને તેઓને પણ ભાડુ ન ચૂકવી ગાડી પણ પરત આપેલ ન હોય અને તેઓની સાથે પણ છેંતરપિંડી કરેલ હોવાનુ જાણવા મળેલ હતું જેથી આરોપીઓ કાનજી ઉર્ફે આકાશ અને બિલાલ શાહમદારે વિશ્વાસ કેળવીને 1,81,50,000ની કુલ 26 ગાડીઓ પરત ન આપી છેતરપીંડી આચરી હતી બનાવ અંગેની ફરીયાદ પરથી ક્રાઇમ બ્રાન્ચના પીઆઈ એમ.આર. ગોંડલીયાની રાહબરીમાં ટીમે તપાસ હાથ ધરી મોરબીમાંથી બંને આરોપીની ધરપકડ કરી મોંઘી મોટી કારોનો કાફલો પકડી પાડી આરોપીઓની વિશેષ તપાસ હાથ ધરી છે.