રાજકોટમાં ફી મુદ્દે સ્કૂલોની ફરી દાદાગીરી

• SNK સ્કૂલ ફી ન ભરનાર વિદ્યાર્થીઓના ઓનલાઈન ભણાવવાની ના પાડી
  બી.કે. જસાણી કોલેજે 300 સ્ટુડન્ટસને ફી ભરવા નોટીસ ફટકારી
  PB સ્કૂલની એડવાન્સ ફી માંગણી મુદ્દે વાલીઓની કલેક્ટરને રજુઆત
  જસાણી કોલેજ દ્વારા ફી નહિ ભરનાર વિદ્યાર્થીઓને NOC ન આપવાની ધમકી આપવામાં આવી
  PB સ્કૂલની એડવાન્સ ફી માંગણી મુદ્દે વાલીઓની કલેક્ટરને રજુઆત

ખાસ-ખબર સંવાદદાતા
રાજકોટ શહેરની સ્વનિર્ભર શાળાઓ કોરોનાકાળ પૂરો થતા વાલીઓ ઉપર ફી માટે દબાણ લાવીને જાત જાતની મુશ્કેલીઓ ઉભી કરી રહ્યા છે અને વાલીઓને ઘરે નોટિસો પણ મોકલવામાં આવી રહી છે.
રાજકોટ શહેરમાં વધુ એક ખાનગી શાળાએ ફી મામલે વાલીઓ સાથે દાદાગીરી કરતા હોવાનું સામે આવ્યું છે. શહેરની નામાંકિત એસ.એન.કે. સ્કૂલે ફી ન ભરી તે વિદ્યાર્થીઓના ઓનલાઈન ક્લાસ શરુ ન કરતા વાલીઓમાં ભારે નારાજગી વ્યાપી છે. શાળાએ એક સાથે એડવાન્સ ફી રૂપિયા 30,000ની ઉઘરાણી શરુ કરતા મામલો ગરમાયો હતો અને તેને લીધે સોમવારે સવારે વાલીઓ સ્કૂલ પર પહોંચ્યા હતા. બીજી તરફ બી.કે. જસાણી કોલેજે 300 વિદ્યાર્થીઓને ફી ભરવા નોટિસ ફટકારતા વિરોધ દર્શાવ્યો હતો.
કોરોનાકાળમાં મસમોટી ફી લેતી આ ખાનગી સ્કૂલમાં ભણતા વિદ્યાર્થીઓના વાલીઓ જગજાહેર પરિપત્રમાં ધોરણ 7થી 9ના વિદ્યાર્થીઓના ઓનલાઈન ક્લાસ 14મી જૂન એટલે કે સોમવારથી શરુ થયા. 13 જૂન સુધીમાં જેઓએ ત્રણ માસની ફી ન ભરી તેમના ક્લાસ બંધ કરી દેવાયાનો આક્ષેપ કરવામાં આવી રહ્યો છે. સાથે જ ફી માફી ઈચ્છતા વાલીઓને તેમના વિદ્યાર્થીઓને અન્ય શાળામાં સ્થળાંતર કરવાની ગર્ભિત ધમકી પણ આપી છે.
શાળા દ્વારા મોકલવામાં આવેલ પરિપત્રમાં જ્યાં સુધી FRC કોઈ નિર્ણય નહીં લે, ત્યાં સુધી તે ફી જ લેવામાં આવશે ચુકાદો આવી જશે પછી, તે મુજબ ફીની રકમનું એડ્જસ્ટમેન્ટ કરવામાં આવશે. તેવો ઉલ્લેખ કરવામાં આવ્યો છે. 14 જૂનથી શરૂ થતા વર્ગો માટેની ફી ચૂકવણીની અંતિમ તારીખ રવિવાર 13 જૂન સવારે 11:00 વાગ્યા સુધી હોવાનો સ્પષ્ટ ઉલ્લેખ કરવામાં આવ્યો છે. આ જ રીતે રાજકોટના રેલનગરમાં આવેલી PB સ્કૂલની એડવાન્સ ફી માંગણી મુદ્દે વાલીઓની કલેક્ટરને રજુઆત કરવા પહોંચ્યા હતા.
વાલીઓએ આ મુદ્દે જણાવ્યું હતું કે, હાલ બાળકોનું ઓનલાઈન શિક્ષણ ચાલે છે. નેટનો ખર્ચો અમે ઉપાડીએ, ઓનલાઇન શિક્ષક સરખું સમજાવે નહીં તો એ કામ પણ અમારે કરવું પડે છે. ઉપરથી સ્કૂલ અમને એડવાન્સમાં ફી ભરવાની વાત કરે છે. અને જો ફી ન ભરી તો શાળા દ્વારા આગલા વર્ષનું પરિણામ અટકાવી ફી દેવાનું દબાણ કરવામાં આવે છે, માટે અમે આજે કલેકટરને રજુઆત કરવા પહોચ્યા છીએ.