RTO અધિકારી ખપેડેની કડક કાર્યવાહી
ખાસ-ખબર સંવાદદાતા
તાજેતરમાં જ રાજકોટ જિલ્લા આરટીઓ તંત્ર દ્વારા વાહન વ્યવહારના બાકીદારો પર તૂટી પડવા માટે નિર્દેશ અપાયા હતા. અત્રે ઉલ્લેખનીય છે કે છેલ્લા ઘણા સમયથી કરોડો રૂપિયાનો બાકીવેરો વાહનમાલિકો ભરતા ન હતા. આવા બાકીદારોને અનેક વખત નોટીસો ફટકારવા છતાં પણ લેણાની વસુલાત નહી થતા ફરી એકવાર રાજકોટ જીલ્લા આરટીઓ તંત્રએ કાયદાનું શસ્ત્ર ઉગામ્યુ છે અને 546 જેટલા બાકીદારોને આખરી નોટીસો ફટકારી તાકીદે બાકીવેરો જમા કરાવી દેવા તાકીદ કરવામાં આવેલ છે. આ અંગેની વધુ વિગતો આપતા રાજકોટ જીલ્લા આરટીઓ અધિકારી કે.એમ.ખપેડે જણાવેલ હતું કે છેલ્લા ઘણા સમયથી બાકી વાહનવેરો નહી ભરતા 546 વાહનમાલિકોને નોટીસો ફટકારવામાં આવેલ છે જેમાં શૈક્ષણિક 9 બસ, ટેક્ષી 105, મેકસી 156 બસો 12, ગુડઝ વાહનો 141 અને હેવીવાહનો 123 ને રૂા.18.83 ક્રોડનો બાકીવેરો વસુલવા માટે નોટીસો ફટકારવામાં આવી છે. આમ જીલ્લા આરટીઓ તંત્રએ કુલ 546 વાહનધારકોને બાકીવેરો તાત્કાલીક ભરી જવા નોટીસો આપવામાં આવી છે. વધુમાં આરટીઓ અધિકારી ખપેડે જણાવ્યું હતું કે અગાઉ વારંવાર નોટીસો આપવા છતાં આજ સુધી બાકીવેરો નહી ભરનાર 70 જેટલા વાહન માલિકોને ફરી એકવાર બાકીવેરો જમા કરાવી દેવા માટે તાકીદ કરવામાં આવે છે.
- Advertisement -
11 મહિનામાં 62 હજારને ઘરે બેઠા લાઇસન્સ મળ્યા
રાજકોટ આરટીઓ કચેરીમાં 1 જાન્યુઆરીથી 30 નવેમ્બર સુધીમાં 62 હજારથી વધુ લાઇસન્સ તથા વાહનને લગતી કામગીરી ઓનલાઇન કરવામાં આવી હતી. જેથી અરજદારોને આરટીઓ કચેરી સુધીના ધક્કામાંથી મુક્તિ મળી છે. આ અંગે માહિતી આપતા આર. ટી. અધિકારી કેતન ખપેડે જણાવ્યું હતું કે, વર્ષ 2023માં રાજકોટ આર.ટી.ઓ.ની આ ફેસલેસ કામગીરી થકી 62837 જેટલી જુદી જુદી કામગીરીનો લાભ ઓનલાઇન ઘરે બેઠા લોકોએ લીધો છે. જેમાં લાઇસન્સને લગતી કુલ 35153 તેમજ વાહનને લગતી 27684 જેટલી અરજીનો નિકાલ કરવામાં આવ્યો છે. ખપેડે જણાવ્યું હતું કે, લાઇસન્સમાં રિન્યૂઅલ, ડુપ્લિકેટ તેમજ લાઇસન્સની વિગતો ફેરફાર સંબંધી સૌથી વધુ અરજીઓ આવતી હોય છે. જ્યારે વાહનોમાં મુખ્યત્વે વાહનોમાં નામ ટ્રાન્સફર, લોન, આર.સી. બુક, એન.ઓ.સી.,વિવિધ પરમિટ સંબંધી સેવાઓનો લાભ અરજદારો ઘર બેઠા મેળવે છે. મોટા ભાગે આધારકાર્ડ અને જરૂરી કાગળો ઓનલાઇન સબમિટ કરી અપાતા આ સેવાઓ માટે અરજદારે કચેરી સુધી ધક્કો ખાવો પડતો નથી.
