જિલ્લા કલેકટર અરૂણ મહેશ બાબુનું નીતિ આયોગ, વડાપ્રધાન કાર્યાલય સમક્ષ પ્રેઝન્ટેશન
નીતિ આયોગ અને વડાપ્રધાન કાર્યાલય સાથે આજે તમામ રાજ્યોના મુખ્ય સચિવો અને જિલ્લા કલેકટરોની વર્ચ્યુઅલ કોન્ફરન્સ યોજાઈ હતી. ગુજરાતમાંથી રાજ્યના આયોજનના સચિવ રાકેશ શંકર તથા રાજકોટ કલેકટર અરૂણ મહેશ બાબુ જોડાયા હતા. આ કોન્ફરન્સમાં આયોજન સચિવ રાકેશ શંકર દ્વારા ગુજરાત રાજ્ય તરફથી ‘જિલ્લો: વિકાસના આધારબિંદુ’ એ વિષય પર પ્રેઝન્ટેશન આપવામાં આવ્યું હતું. જ્યારે રાજકોટ જિલ્લા કલેકટર અરૂણ મહેશ બાબુએ ‘રાજકોટમાં આર્થિક આયોજનના સાધન તરીકે પીએમ ગતિશક્તિ પોર્ટલનો ઉપયોગ’ એ વિષય પર પ્રેઝન્ટેશન રજૂ કર્યું હતું. જેમાં રાજકોટ જિલ્લામાં વિકાસને વેગ આપનારા મહત્ત્વપૂર્ણ પ્રકલ્પો જેમ કે હિરાસર આંતરરાષ્ટ્રીય ગ્રીનફિલ્ડ એરપોર્ટ, રાજકોટ એઈમ્સ, ગઢકા પાસેનો અમૂલ પ્રોજેક્ટ, જીઆઈડીસી રાજકોટ કાનાલૂસ પ્રોજેક્ટ, જનઆરોગ્ય કેન્દ્રો તથા આંગણવાડીઓના કાર્યને ગતિ આપવા માટે પીએમ ગતિશક્તિ પોર્ટલનો કઈ રીતે ઉપયોગ કરવામાં આવે છે તેની રજૂઆત કરવામાં આવી હતી. રાજકોટ એ દેશનો એવો પહેલો જિલ્લો છે, જે વિવિધ પ્રકલ્પોના સંચાલન માટે પીએમ ગતિશક્તિ પોર્ટલનો પ્રતિભાશાળી રીતે ઉપયોગ કરે છે તેમ જણાવ્યું હતું. આ વર્ચ્યુઅલ બેઠક કેબિનેટ સેક્રેટરી રાજીવ ગૌબાની ઉપસ્થિતિમાં યોજાઈ હતી. જેમાં તમામ જિલ્લા કલેકટર્સ, મ્યુ. કમિશનર્સ, જિલ્લા પરિષદના તમામ સીઈઓ, રાજ્ય સરકારના વિવિધ ખાતાઓના પ્રતિનિધિઓ, રાજકોટના પ્રાંત અધિકારી સંદીપ વર્મા તેમજ વિવેક ટાંક હાજર
રહ્યા હતા.
