સ્ટેટ વિજિલન્સની ઐસી-તૈસી, મીડિયાની એક, બે ને સાડા ત્રણ
લાલો બાવાજી અને તેનો પરિવાર વર્ષોથી ગાંજો વેંચે છે, કોઈ વાળ પણ વાંકો કરી શકતું નથી!
મહિલા બુટલેગર ઝિન્નતનાં દારૂ-જુગારનાં અડ્ડા અંગે ‘ખાસ-ખબર’એ વિસ્તૃત અહેવાલ પુરાવાઓ સાથે પ્રકાશિત કર્યો હતો પરંતુ તેની વિરૂદ્ધ અસરકારક પગલાં લેવાયા નહીં અને તેનો અડ્ડો ફરી ધમધમતો થઈ ગયો. છેવટે સ્ટેટ વિજિલન્સ દ્વારા તેને ત્યાં રેઈડ કરાઈ અને અનેક જુગારીઓ, રોકડ તથા માલ-સામાન ત્યાંથી જપ્ત થયો. ડી. જી. સ્કવોડ, સી.આઈ.ડી. ક્રાઈમ વગેરેની રેઈડ ગાંધીનગરથી આવે અને દરોડા કરે એ ઘટના સ્થાનિક પોલીસ માટે શરમજનક ગણાય, ઢાંકણીમાં પાણી લઈને ડૂબી મરવા જેવી કહેવાય. પરંતુ રાજકોટમાં કોઈને એવી પડી નથી. દેશી દારૂ, જુગાર, ગાંજા વિરૂદ્ધ ‘ખાસ-ખબર’એ શ્રેણીબદ્ધ અહેવાલો છાપ્યા પરંતુ ભાગ્યે જ આવાં તત્વો વિરૂદ્ધ કશાંક પગલાં લેવાયા છે. એ પણ મને-કમને.
- Advertisement -
પરંતુ ફળની ચિંતા કર્યા વગર ‘ખાસ-ખબર’ પોતાની ઝુંબેશ પર અડગ, અડીખમ છે. આ શ્રેણીમાં જ આજે અમે કેસરી પૂલ (કૈસર-એ હિન્દ પૂલ)ની નીચે નરસંગ પરા વિસ્તારમાં ખુલ્લેઆમ ગાંજો વેંચતા લાલો બાવાજી નામના શખ્સનાં પરિવારનો ભાંડાફોડ કરી રહ્યાં છીએ. આ પરિવાર અહીં આજકાલનો નહીં, વર્ષોથી ગાંજો વેંચે છે. બી ડિવિઝન પોલીસ સ્ટેશનનાં તાબામાં આવતાં આ વિસ્તારમાં તેઓ કોઈ જાતનો ડર રાખ્યા વગર ગાંજો વેંચે છે.
આ પરિવાર 100 રૂપિયાની એક પડીકી લેખે ગાંજો વેંચે છે. તેમનો ધંધો જૂનો હોવાથી ઘરાકી રાત-દિવસ રહે છે. સવાલ એ છે કે, આ વિસ્તારની શેરી-ગલીનાં લોકો પણ ગાંજાનાં આ વેપારથી માહિતગાર છે, પરંતુ પોલીસ પાસે માહિતી કેમ પહોંચી નથી? શું આ ધંધો પોલીસની મંજૂરીથી જ ચાલે છે? એ પણ સવાલ છે.
આ વિસ્તારમાં ઘરે-ઘરે લોકો ‘લાલા’નાં ધંધા વિશે બધું જ જાણે છે, માત્ર પોલીસને જ ખબર નથી!
- Advertisement -
દારૂ-જુગાર અને ગાંજાની બદીને ડામવા રાજકોટમાં સ્ટેટ વિજિલન્સની વધુ રેઈડની જરૂર
લાલા બાવાજીનાં પરિવારજનો પણ સામેલ
લાલાનાં ગાંજાનાં ધંધામાં તેનો આખો પરિવાર પણ સામેલ છે. એટલું જ નહીં આ વિસ્તારમાં તેનાં અનેક સગા-સંબંધીઓ ગાંજો વેંચે છે. આટઆટલાં લોકો વર્ષોથી ગાંજો વેંચતા હોવા છતાં પોલીસની નજર તેમનાં પર પડી નથી કે પછી પોલીસની મીઠી નજર તળે જ આ બધું ચાલી રહ્યું છે તેવો સવાલ લોકોમાં ચર્ચાઈ રહ્યો છે.
ગોડાઉન રોડ પર લીલાનો દારૂ નો કાળો કારોબાર હજુ પણ ધમધમે છે!
ગોડાઉન રોડ પર ધમધમતા દારૂનાં કારોબાર અંગે ‘ખાસ-ખબર’એ વિગતવાર અહેવાલ પ્રકાશિત કર્યો હતો. લીલાબેનનાં આ ધંધામાં પુત્ર અલ્પેશ અને જમાઈ હિરેન પણ સંડોવાયેલા છે. લીલાએ દેશીનો મોરચો સંભાળ્યો છે તો અલ્પેશ અને હિરેને ઈંગ્લિશ દારૂનો વેપાર સંભાળ્યો છે. ‘ખાસ-ખબર’નાં અહેવાલ બાદ માત્ર દેખાડા ખાતર તેમનાં પર પગલાં લેવાયા હતાં પરંતુ એ જ રાત્રિથી ત્યાં ફરી દેશી-વિદેશી દારૂનો ધંધો ધમધમી રહ્યો છે.અહીં લાલો અને તેનો પરિવાર ગાંજો વેંચે છે
પવલા કોળીનો ધંધો હજુ ચાલું: કોઈ રોકનાર નથી!
સંતકબિર રોડ પર ચાલતી દેશી દારૂની કલબ વિશે ‘ખાસ-ખબર’માં વિગતવાર અહેવાલ પ્રકાશિત થયો હતો. આ પછી પોલીસને મદદરૂપ થવા ‘ખાસ-ખબર’એ પોલીસને તારીખ-વારનાં પુરાવા સહિતનાં વિડીયો ફુટેજ આપ્યાં હતાં. પરંતુ પવલા કોળીએ એવું બહાનું કાઢ્યું હતું કે, આ વિડીયો જૂનો છે! જો કે, વિડીયો નવો જ હતો, તેનો ઓરિજિનલ સોર્સ પણ ‘ખાસ-ખબર’એ પોલીસને આપ્યો હતો, જેમાં સ્પષ્ટ થતું હતું કે, વિડીયો આગલી રાતનો જ હતો. પણ, પોલીસને કદાચ પવલા કોળી પર વધુ ભરોસો હતો, તેથી આ ઘટનામાં એફ.આઈ.આર. જ ન થઈ! સવાલ એ છે કે, પવલા પર આટલી બધી મહેરબાની શા માટે? બીજો: શું જૂનો વિડીયો હોય તો પોલીસ એકશન ન લઈ શકે? આ મામલો તો ત્યાં પૂરો થઈ ગયો. હવે પવલા કોળીએ આ મહેરબાનીને લીધે જ ફરીથી ધંધો શરૂ કરી દીધો છે. જો કે, તેણે સ્થળ ફેરવી નાખ્યું છે. અને નજીકનાં વાડી જેવાં વિસ્તારમાં ધંધો ચાલુ કરી દીધો છે.
થોરાળા વિસ્તારમાં ચાલતો વર્લી-મટકાનો અડ્ડો ફરી ચાલું
થોરાળા પોલીસ સ્ટેશન નજીક ચાલતાં વર્લી-મટકાનાં અડ્ડા અંગે ‘ખાસ-ખબર’એ વિસ્તૃત અહેવાલ પ્રકાશિત કર્યો હતો. આ અહેવાલ વાઈરલ કરતાં પહેલાં અમે થોરાળા પોલીસ સ્ટેશનનાં અધિકારીને તમામ પુરાવાઓ મોકલી આપ્યા હતાં, જેથી ત્યાં દરોડો કરી શકાય. આટઆટલો સહકાર આપવા છતાં પોલીસે ત્યાં જઈને તપાસનું ફિંડલું વાળી દીધું હતું અને માત્ર જાહેરનામા ભંગ, માસ્ક વગેરેનાં કેઈસ જ નોંધ્યા હતાં! આશ્ર્ચર્ય એ વાતનું છે કે, વિડીયો સહિતનાં પુરાવાઓ હોવા છતાં એ અડ્ડાનાં સંચાલક પર કેસ કેમ નોંધાયો નહીં?
સ્ટેટ વિજિલન્સે રાજકોટ પર સતત વૉચ રાખવી જરૂરી
દારૂ-જુગાર બાબતે સજ્જડ પુરાવાઓ આપ્યાં હોવા છતાં સ્થાનિક પોલીસ દ્વારા કાર્યવાહી થતી નથી એ વાસ્તવિકતા છે. રાજકોટમાં ઝિન્નતનાં વર્ષોથી ચાલતાં અડ્ડા પ્રત્યે સ્થાનિક પોલીસે સતત આંખ આડા કાન કર્યા એટલે નાછૂટકે સ્ટેટ વિજિલન્સે દરોડા કરવા પડ્યા હતાં અને એ દરોડામાં સાબિત થયું હતું કે, તેનો ધંધો ધમધોકાર ચાલે છે. સ્ટેટ વિજિલન્સને ત્યાંથી રોકડ સાથે અનેક પુરાવાઓ પણ મળી આવ્યા હતા. હકીકતે રાજકોટની સ્થિતિ જોતાં એવું લાગે છે કે, વિજિલન્સે રાજકોટમાં હજુ આઠ-દસ રેઈડ કરવાની જરૂર છે.
