કેનેડામાં ઓટાવો ખાતે હજારો વિરોધીઓએ સરકાર વિરુદ્ધ પ્રદર્શન કર્યું હતું, અને સંસદ હિલની આસપાસ ટ્રાફિકને જાણી જોઈને રોકી દીધો હતો. કેટલાક વિરોધીઓએ નેશનલ વોર મેમોરિયલ પર પેશાબ પણ કર્યો હતો. કોરોના મહામારી સામે રક્ષણ મેળવવા રસીકરણને કેનેડિયન સરકારે ફરજિયાત બનાવતા કેનેડાની રાજધાની ઓટાવામાં સંસદ ભવનની સામે નાગરિકોએ ઉગ્ર વિરોધ નોંધાવ્યો છે.
અહીં એક અજાણ્યા વ્યક્તિએ સૈનિકની કબર પર ડાન્સ પણ કર્યો હતો. કેનેડામાં અત્યાર સુધીની સૌથી મોટી કોરોના મહામારીમાં 80% થી વધુ રસીકરણ કરવામાં આવ્યું છે તેમ છતાં પણ વિરોધીઓએ ઉત્પાત મચાવ્યો છે.
- Advertisement -
આ વિરોધ પ્રદર્શનના કારણે પીએમ જસ્ટિન ટ્રુડોને પરિવાર સાથે સુરક્ષિત ગુપ્ત જગ્યાએ લઈ જવામાં આવ્યા હતા. તેમના બંને બાળકોએ કોરોના ટેસ્ટ કરાવ્યો હતો, અને તેનું પરિણામ પોઝિટિવ આવ્યું હતું.
પીએમએ આ અંગે કહ્યું કે, તેઓ ઠીક છે અને દૂરથી કામ કરી રહ્યા છે. ઓટાવાના મેયર જિમ વોટસને પ્રદર્શન પર કહ્યું કે, લોકોને સરકાર સામે વિરોધ કરવાનો અધિકાર છે, પરંતુ અન્ય લોકોને પણ સામાન્ય જીવન જીવવાનો અધિકાર છે. તે તમામને ધ્યાનમાં રાખીને વહીવટીતંત્રને જરૂરી પગલાં લેવા જણાવાયું છે. તેમણે એમ પણ કહ્યું કે, હવે આગળ વધવાનો અને શહેરને તેના રહેવાસીઓને પરત આપવાનો સમય આવી ગયો છે.
- Advertisement -
પ્રદર્શનકારીઓએ કહ્યું છે કે, જ્યાં સુધી કોરોના વિરુદ્ધ રસીના તમામ આદેશો અને અન્ય પ્રતિબંધો હટાવવામાં ન આવે ત્યાં સુધી તેઓ પરત જશે નહીં. આ દરમિયાન કેટલાક વિરોધીઓએ કોરોના પ્રતિબંધોની તુલના ફાસીવાદ સાથે કરી હતી, અને કેનેડાના ધ્વજ સાથે નાઝી પ્રતીકો પ્રદર્શિત કર્યા હતા. કેટલાક વિરોધીઓએ કેનેડાના વડા પ્રધાન જસ્ટિન ટ્રુડોની તીવ્ર ટીકા કરી તેમને નિશાન બનાવ્યા હતા.
મોન્ટ્રીયલના નાગરિક ડેવિડ સાન્તોસે કહ્યું કે, તેઓ માને છે કે રસીકરણ ફરજિયાત બનાવવું એ સ્વાસ્થ્ય સંબંધિત નથી, પરંતુ સરકાર દ્વારા ‘વસ્તુઓને નિયંત્રિત કરવા’ માટેની યુક્તિ છે. વિરોધ પ્રદર્શનના આયોજકોએ તમામ કોવિડ- 19 પ્રતિબંધો અને રસીકરણને ફરજિયાત બનાવવાના નિર્ણયને પાછો ખેંચવાની અને વડા પ્રધાન ટ્રુડોના રાજીનામાની માંગ કરી હતી.
ટ્રક ચાલકોએ સરહદ પાર કરવા રસીકરણનો પુરાવો દર્શાવવો જરૂરી છે –
કેનેડિયન સરકારના આદેશ મુજબ, ગત તા. 15 જાન્યુઆરીથી ટ્રક ચાલકોએ સરહદ પાર કરવા માટે રસીકરણનો પુરાવો દર્શાવવો જરૂરી છે. કોરોના રસી વિનાના ટ્રક ડ્રાઇવરોને અમેરિકાથી પરત ફરતી વખતે આઇસોલેટ થવું પડશે અને કોરોના ટેસ્ટ કરાવવો પડશે. ટ્રક ડ્રાઈવરો માટે પણ આવો જ નિયમ અમેરિકામાં ગત તા. 22 જાન્યુઆરીથી લાગુ કરવામાં આવ્યો હતો. આ નિયમોને કારણે બંને દેશોમાં સપ્લાય ચેઈન ખોરવાઈ રહી છે અને ખાદ્યપદાર્થોના ભાવમાં નોંધપાત્ર વધારો થયો છે.
