પોલીસ-પ્રજા વચ્ચે સુમેળભર્યું વાતાવરણ સ્થાપિત થાય-એ માટે પૂરતાં પ્રયત્નો કરીશું
પ્રજાનાં પ્રશ્નોને ત્વરિત વાચા મળે એ માટે પોલીસ સતત પ્રયત્નશીલ છે અને કાયમ રહેશે
- Advertisement -
ક્રાઈમ બ્રાન્ચનાં પી.આઈ. જે.વી. ધોળા ‘ખાસ-ખબર’ની શુભેચ્છા મુલાકાતે
‘પોલીસ પ્રજાનો મિત્ર છે’ તે સૂત્ર સાર્થક કરીશ : પી.આઈ. ધોળા
ખાસ-ખબર સંવાદદાતા
- Advertisement -
પોલીસ અને પ્રજા વચ્ચે સુમેળભર્યું વાતાવરણ રહે, પ્રજાનાં પ્રશ્ર્નોનો ત્વરિત નિકાલ આવે અને સમયમર્યાદામાં લોકોનાં કામ થાય તે માટે અમે સતત પ્રયત્નશીલ રહીશું, તેમ ક્રાઈમ બ્રાન્ચનાં પી.આઈ. જે. વી. ધોળાએ આજે ‘ખાસ-ખબર’ને જણાવ્યું હતું. તેઓ આજે ‘ખાસ-ખબર’ની શુભેચ્છા મુલાકાતે આવ્યા હતાં અને એ દરમિયાન તેમણે અનેક મહત્ત્વપૂર્ણ વાતો કરી હતી.
પી.આઈ. ધોળાએ જણાવ્યું હતું કે, ટૂંક સમયમાં જ ‘પોલીસ આપને દ્વાર’ કાર્યક્રમ અમે હાથ ધરી રહ્યાં છીએ, કમિશનર ખુરશીદ અહેમદની પ્રેરણાથી હાથ ધરવામાં આવનાર આ નવતર કાર્યક્રમ હેઠળ પોલીસ સ્વયં લોકો વચ્ચે જઈને તેમની સમસ્યા જાણશે અને એમાંથી વાજબી મુદ્દા ઉકેલવા તમામ પ્રયત્નો કરશે. આ માટે જે-તે બિટ સંભાળનાર બિટ ગાર્ડને, કોન્સ્ટેબલ વગેરે તમામ ટીમને વિવિધ જવાબદારી સોંપવામાં આવશે.
અગાઉ રાજકોટ પોલીસ પર એવો આક્ષેપ થતો કે, ફરિયાદોને બદલે માત્ર અરજી જ સ્વીકારવામાં આવે છે. પરંતુ હવે એ ફરિયાદ પણ દૂર થઈ છે. પી.આઈ. ધોળા કહે છે કે, ‘અરજી સ્વીકારવાની સત્તા માત્ર પોલીસ કમિશનર પાસે જ છે. એમને જે યોગ્ય લાગે તે અરજી અમને ફોરવર્ડ કરે!’
પી.આઈ. ધોળાએ જણાવ્યું હતું કે, ‘ચૂંટણીનું વર્ષ છે. અસામાજિક તત્ત્વો સમાજ પર હાવી ન થઈ જાય અને વાતાવરણ બગડે નહીં- તે માટે અમે પ્રતિબદ્ધ છીએ. આ માટે અમારી ટીમ દરેક પ્રકારે સજ્જ છે. આ ઉપરાંત પ્રજા-પોલીસ વચ્ચે સુમેળભર્યા સંબંધોનો સેતૂ રચાય, લોકોનો પોલીસ પર વિશ્વાસ પુન:સ્થાપિત થાય એ દિશામાં અમે સતત પ્રયત્ન કરી રહ્યાં છીએ!’
શહેર ક્રાઈમ બ્રાન્ચના પી.આઈ. તરીકે મહત્ત્વની જવાબદારી રાજકોટ તાલુકા પોલીસ સ્ટેશનના પી.આઈ. જે. વી. ધોળાને સોંપાઈ છે. શહેર ક્રાઈમ બ્રાન્ચના પી.આઈ. જે. બી. ધોળાએ કારકિર્દીની શરૂઆતમાં સાબુના કારખાનામાં સાત વર્ષ નોકરી કરી હતી. બાદમાં સેલટેક્સ કલાર્ક તરીકે સરકારી નોકરી મળી હતી. પરંતુ નાનપણથી જ તેમને ખાખી પ્રત્યે ખૂબ જ પ્રેમ હતો અને સપનું હતુ કે એક દિવસ ખાખી પહેરીને જ રહીશ, જેથી સેલટેક્સ કલાર્ક હતા ત્યારે તેમણે પીએસઆઈ માટેની તૈયારી છોડી ન હતી. અંતે તેમનુ સ્વપ્ન સાકાર થયુ અને તેઓ પીએસઆઈની પરીક્ષામાં પાસ થયા અને પ્રથમ પોસ્ટિંગ મોરબીમાં થયું. જ્યાં તેમને પોલીસ કારકિર્દીની શરૂઆતમાં જ ક્રાઈમ બ્રાન્ચના પીએસઆઈ તરીકેની જવાબદારી સોંપાઈ ત્યાર બાદ તેમણે એલ.આઈ.બી., એસ.ઓ.જી. જેવી મહત્ત્વની બ્રાન્ચોમાં પી.એસ.આઈ. તરીકે નોકરી કરી હોવાથી બહોળો અનુભવ ધરાવે છે અને ટેકનોલોજીનો મહત્તમ ઉપયોગ કરી ડિટેકશનમાં પણ જે. વી. ધોળા માહેર છે ઉપરાંત રાજકોટ શહેર ક્રાઈમ બ્રાન્ચના પી.આઈ. તરીકે તેમણે ચાર્જ સંભાળ્યો ત્યારે ‘ખાસ-ખબર’ સાથેની ખાસ મુલાકાતમાં તેમણે જણાવ્યું હતું કે શહેર ક્રાઈમ બ્રાન્ચની ખરડાયેલી છબી સુધારી પોલીસ પ્રજાનો મિત્ર છે તે સૂત્ર સાર્થક કરીશ.
બોટાદના ઝીંઝાવદર ગામના વતની જે. વી. ધોળા 1997 એસ.એસ.સી.ની તૈયારી કરી રહ્યા હતા ત્યારે આત્મનિર્ભર બનવા માટે તેઓએ સાબુના કારખાનામાં સાત વર્ષ નોકરી કરી હતી. બી.એ., એલએલ.બી. સુધી તેમણે અભ્યાસ કર્યો અને સાથેસાથ સરકારી નોકરીની તૈયારી કરી રહ્યા હતા તે દરમિયાન તેમની પસંદગી સેલટેક્સના કલાર્ક તરીકે થઈ હતી. પરંતુ નાનપણથી તેમનું સ્વપ્ન ખાખી પહેરવાનું હતું. સેલટેક્સ કલાર્ક તરીકેની નોકરીની સાથે-સાથે તેઓએ પોલીસ માટેની તૈયારીઓ શરૂ રાખી હતી અને અંતે તેમનું નાનપણથી જોયેલુ સ્વપ્ન સાકાર થયું. પોલીસ ખાતામાં તેમની પી.એસ.આઈ. તરીકેની પસંદગી થઈ અને પ્રથમ પોસ્ટીંગ મોરબી જિલ્લામાં થયુ જ્યાં તેમની એલ.સી.બી.ના પી.એસ.આઈ. તરીકે પસંદગી થઈ ત્યાર બાદ તેઓ ગીર સોમનાથ જિલ્લામાં બે વર્ષ માટે એસ.ઓ.જી. પી.એસ.આઈ., અમદાવાદમાં સોલા પોલીસ સ્ટેશનમાં એક વર્ષ નોકરી કરી તે દરમિયાન તેમને પી.આઈ. તરીકે બઢતી આપવામાં આવી અને દેવભૂમિ દ્વારકા બદલી કરવામાં આવી અને ત્યારબાદ રાજકોટ તાલુકા પોલીસ સ્ટેશનના પી.આઈ. તરીકે તેમણે અઢી વર્ષ નોકરી કરી અને હાલમાં તેમની શહેરની મહત્ત્વની બ્રાન્ચ ગણાતી શહેર ક્રાઈમ બ્રાન્ચના પી.આઈ. તરીકે તેમના નામની પસંદગી કરવામાં આવી હતી.
