ઉનાળાના પ્રારંભે જ પારાયણ: હંસરાજનગરમાં ગંદા પાણીની સમસ્યાથી લોકો હેરાન-પરેશાન

છેલ્લા દોઢેક વર્ષથી ગંદુ પાણી આવતું હોવાનો સ્થાનિકોનો આરોપ

ખાસ-ખબર ન્યૂઝ રાજકોટ, તા.11
રાજકોટ શહેરમાં ઉનાળાનાં પ્રારંભે પાણીની પારાયણ શરૂ થયાનું સામે આવ્યું છે. જેમાં જંકશન પ્લોટ પાછળ આવેલા હંસરાજનગર વિસ્તારમાં લોકો ગંદા પાણીની સમસ્યાથી ત્રસ્ત બન્યા છે. છેલ્લા દોઢેક વર્ષથી અહીં ગંદુ પાણી આવતું હોવાનો સ્થાનિકોએ આરોપ લગાવ્યો છે. તેમજ વારંવાર રજૂઆતો કરવા છતાં સમસ્યાનો કાયમી ઉકેલ આવતો ન હોવાનું જણાવ્યું છે. નેતાઓ મત લેવા આવે છે પણ કામ કરતા નહીં હોવાનો આક્રોશ પણ આ વિસ્તારની મહિલાઓએ ઠાલવ્યો હતો. તેમજ વર્ષો જૂની પાણીની લાઇન બદલી સમસ્યાનો કાયમીમી ઉકેલ લાવવા માગ કરવામાં આવી હતી. આ વિસ્તારમાં રહેતા મીનાબેન રાવલે જણાવ્યું હતું કે, અમારા વિસ્તારમાં ગટર કે ડ્રેનેજનું પાણી ભળી જવાને કારણે છેલ્લા દોઢ વર્ષ કરતા વધુ સમયથી ગંદા પાણીની સમસ્યા છે. અહીં દરરોજ પાણી આવે છે પરંતુ ખૂબ જ દુર્ગંધયુક્ત અને મેલુ હોવાને કારણે વાપરવા લાયક પણ હોતું નથી. તો પીવામાં ઉપયોગ કરવાનો સવાલ જ નથી. ગંદા પાણીને કારણે અવારનવાર અમારા બાળકો બીમાર પડે છે. આ કારણે છેલ્લા દોઢેક વર્ષ કરતા વધુ સમયથી આ પાણી પીવાનું બંધ કરવું પડ્યું છે. આ મામલે અમારા દ્વારા સ્થાનિક કોર્પોરેટરોને રજૂઆત કરીએ ત્યારે સફાઈ કરવા આવે છે. જેના કારણે એક-બે દિવસ સારું પાણી આવે છે. પરંતુ પછી ફરીથી એ જ સ્થિતિ થાય છે. મનપા તંત્રના લોકો આવીને પાણીનાં નમુના લઈ જાય છે પરંતુ બાદમાં કાઈ પ્રોબ્લેમ નહીં હોવાનો રિપોર્ટ આવી જાય છે. મત જોતા હોય ત્યારે બધા આવી જાય છે કે અમને આપજો અમને આપજો પણ અમારે જરૂર છે, ત્યારે કોઈ જવાબ આપતું નથી. અમારી સ્પષ્ટ માંગ છે કે તંત્ર જાગે અને જો લાઇનને બદલવી પડે તેમ હોય તો બદલીને અમને આ સમસ્યા માંથી કાયમી છુટકારો અપાવે તે જરૂરી છે.

ધર્મેશભાઈ વિસાણી નામના સ્થાનિકે જણાવ્યું હતું કે, અમારા વિસ્તારમાં ઘણા લાંબા સમયથી ગંદા પાણીની સમસ્યા છે. પાણીમાં એટલી દુર્ગંધ આવે છે કે પીવાનું તો દૂર ન્હાવાનાં ઉપયોગમાં પણ લઈ શકાતું નથી. અનેકવાર રજૂઆતો કરવા છતાં સમસ્યાનો કાયમી ઉકેલ આવતો નથી. જેને લઈને ભારે હાલાકી ભોગવવી પડી રહી છે. આ વિસ્તારમાં લગભગ 38-40 જેટલા મકાનો તેમજ 500 જેટલા લોકો ગંદા પાણીની સમસ્યાથી ત્રાહિમામ પોકારી ઉઠ્યા છે. આ મામલે સ્થાનિક કોર્પોરેટરો અને અધિકારીઓને રજુઆત કરવા છતાં સમસ્યાનો કાયમી ઉકેલ આવતો નથી. ત્યારે તાત્કાલિક આ મામલે જરૂરી પગલાં લેવામાં આવે તેવી અમારી માંગ છે.