ફરી વાર આરજેડી સાથે ગઠબંધન કરી શકે તેવી ઉડેલી અફવા પર નીતિશ કુમારે કરી સ્પષ્ટતા

તેજસ્વી યાદવને મળતાં ચર્ચા વહેતી થઈ

નીતિશ કુમારનું આ નિવેદન મહત્વનું છે કારણ કે તાજેતરમાં જ તેઓ આરજેડી નેતા તેજસ્વી યાદવને મળ્યા હતા. ત્યારથી એવી અટકળો લગાવવામાં આવી રહી હતી, કે બિહારના રાજકારણમાં ફરી કંઈક થયું હશે. આ મુલાકાત અચાનક થઈ અને બંને વચ્ચે લગભગ અડધો કલાક વાત થઈ. હવે નીતીશ કુમારે આ અટકળોને દૂર કરવાનો પ્રયાસ કર્યો છે. તેમણે કહ્યું કે એનડીએ સાથે તેમનું સ્વાભાવિક ગઠબંધન છે અને હવે તે કાયમ રહેશે.

નડ્ડા સૌથી પહેલા પટના આવીને નીતિશને મળ્યાં

હકીકતમાં નીતિશ કુમાર આરજેડી નેતા તેજસ્વી યાદવને મળતાં ભાજપને ટેન્શન થયું હતું અને કદાચ નીતિશ કુમાર ફરી પાટલી બદલશે તો શું થશે, તેવી બીક લાગતાં જેપી નડ્ડા તાબડતોબ નીતિશને મળવા પટના દોડી આવ્યાં હતા અને નીતિશ પાસે સ્થિતિ ક્લિયર કરાવી દીધી હતી. નડ્ડા બિહારના બે દિવસીય પ્રવાસ પર છે અને શનિવારે તેઓ દરભંગામાં એક કાર્યક્રમમાં હાજરી આપવાના છે. જેપી નડ્ડા સીધા પટના જવા રવાના થયા, ત્યારે એવી અટકળો ચાલી રહી હતી કે શું તેનો નીતિશ કુમાર અને તેજસ્વીની મુલાકાત સાથે કોઈ સંબંધ છે. કેન્દ્રમાં એનડીએ સરકારની વાપસી બાદ પણ નીતિશ કુમારે પીએમ નરેન્દ્ર મોદીને કહ્યું હતું કે અમે છોડવામાં ભૂલ કરી છે. હવેથી અમે તમારી સાથે જ કામ કરીશું.