નવો ઘટસ્ફોટ: મણીપુરમાં વધુ પાંચ મહિલાઓ ઉપર અત્યાચાર

મણીપુરના 10 ધારાસભ્યોએ કર્યો ચોંકાવનારો ખુલાસો: સીબીઆઇ તપાસની માંગણી

બે મહિલાઓ સાથે થયેલી ક્રુરતા સંદર્ભે 4 આરોપીની ધરપકડ: મુખ્ય આરોપીનું ઘર ફુંકી મારતા લોકો

ખાસ-ખબર સંવાદદાતા
મણિપુરમાં છેલ્લા બે મહિનાથી વધુ સમયથી હિંસા ચાલી રહી છે. દરમિયાન બે મહિલાઓનો ન્યૂડ પરેડનો વીડિયો સામે આવ્યા બાદ રાજયમાં ફરી તણાવ વધી ગયો છે. આ ઘટનાને લઈને સમગ્ર દેશ ગુસ્સામાં છે અને લોકો કાર્યવાહીની માંગ કરી રહ્યા છે. આ દરમિયાન મણિપુરના 10 ધારાસભ્યોએ ચોંકાવનારો ખુલાસો કર્યો છે. આ ધારાસભ્યોએ નિવેદન જારી કરીને દાવો કર્યો છે કે વધુ 5 મહિલાઓ સાથે આવી ઘટનાઓ બની છે. આમાંથી ત્રણ મહિલાઓ એવી છે, જેમની સાથે અલગ-અલગ સમયે બળાત્કારનો દાવો પણ કરવામાં આવ્યો છે. છેલ્લા અઢી મહિનાથી ચાલી રહેલી હિંસા દરમિયાન આ ઘટનાઓ બની છે.

નિવેદન જારી કરનારા ધારાસભ્યોમાંના એક લાલિયાંગ માંગ ખૌતેએ પણ પુષ્ટિ કરી કે આવી ઘટનાઓ બની છે. અન્ય એક ધારાસભ્ય, લેટપાઓ હાઓકીપે આવી ઘટનાઓ વિશે વાત કરી છે. તેણે કહ્યું કે અમારી પાસે આવી ઘટનાઓનો વીડિયો નથી. પરંતુ છેલ્લા બે મહિનામાં રાજયમાં આવી ઘટનાઓ બની છે. અમે આ અંગે પીડિતાના પરિવારજનો સાથે વાત કરી છે અને તેના આધારે નિવેદન બહાર પાડ્યું છે. જોકે, ધારાસભ્યોએ તેમના દાવાના સમર્થનમાં કોઈ વિગતવાર માહિતી આપી નથી. પોલીસ દ્વારા પણ આવા કિસ્સાઓની પુષ્ટિ કરવામાં આવી નથી.

ધારાસભ્યોએ સરકાર પાસે માંગ કરી છે કે આ કેસોની તપાસ સીબીઆઈ દ્વારા કરવામાં આવે. દરમિયાન, વીડિયો સામે આવ્યા બાદ રાજયમાં નવેસરથી રોષ ફાટી નીકળ્યો છે. બદમાશોએ શુક્રવારે નગ્ન પરેડના મુખ્ય આરોપીના ઘરને આગ લગાવી દીધી હતી. સરકારે રાજયમાં ઈન્ટરનેટ પર પ્રતિબંધ લગાવી દીધો છે જેથી કોઈ ખલેલ ન પડે. એટલું જ નહીં, કેન્દ્ર સરકારે કોઈપણ સોશિયલ મીડિયા પ્લેટફોર્મ પર તેનો વીડિયો શેર કરવા પર પ્રતિબંધ લગાવી દીધો છે.

મણિપુરમાં હિંસા વચ્ચે બર્બરતાની ઘટનાથી આખો દેશ શરમમાં છે. બે મહિલાઓની નગ્ન પરેડ બાદ આખો દેશ ગુસ્સામાં જોવા મળી રહ્યો છે. આ મહિલાઓ પર સામૂહિક બળાત્કાર પણ કરવામાં આવ્યો છે. સંસદમાં મનસૂત્ર સત્રના પ્રથમ દિવસે થયેલી કાર્યવાહી પણ હંગામાનો શિકાર બની છે. સુપ્રીમ કોર્ટ અને રાષ્ટ્રીય મહિલા આયોગે આ મામલાની સ્વત: સંજ્ઞાન લીધી છે. વડાપ્રધાન નરેન્દ્ર મોદીએ પણ આ ઘટના પર દુખ વ્યકત કર્યું છે અને કડક કાર્યવાહીનું આશ્ર્વાસન આપ્યું છે.