હિમાચલની રાજ્યસભા બેઠક પરથી નડ્ડાનું રાજીનામું: ગુજરાતમાંથી રાજ્યસભાના સાંસદ રહેશે

ખાસ-ખબર સંવાદદાતા
બીજેપી અધ્યક્ષ જેપી નડ્ડાએ સોમવારે સાંજે હિમાચલ પ્રદેશની રાજ્યસભા બેઠક પરથી રાજીનામું આપી દીધું છે. નડ્ડા 2012થી રાજ્યસભાના સાંસદ છે. ગયા મહિને 20 ફેબ્રુઆરીએ, તેઓ ગુજરાતમાંથી રાજ્યસભાના સાંસદ તરીકે બિનહરીફ ચૂંટાયા હતા. આવી સ્થિતિમાં તેમણે હિમાચલ સીટ પરથી રાજીનામું આપી દીધું છે. ગુજરાતમાંથી રાજ્યસભા સાંસદ રહેશે.

તેઓ લોકસભાની ચૂંટણી લડશે તેવી પણ ચર્ચા છે. બીજી તરફ ભાજપની બીજી યાદી બુધવારે (6 માર્ચ) આવી શકે છે. બીજેપી સંસદીય બોર્ડના સભ્ય અને કર્ણાટકના પૂર્વ મુખ્યમંત્રી બીએસ યેદિયુરપ્પાએ આજે આ વાતનો સંકેત આપ્યો છે.

યેદિયુરપ્પાએ કહ્યું- તેઓ કેન્દ્રીય ચૂંટણી સમિતિની બેઠકમાં ભાગ લેવા બુધવારે દિલ્હી જઈ રહ્યા છે. સંભવત: આ દિવસે બીજી યાદીને અંતિમ સ્વરૂપ આપવામાં આવી શકે છે. હું માનું છું કે આવતીકાલે આ યાદીને અંતિમ સ્વરૂપ આપવામાં આવશે. જો કે આખરી નિર્ણય વરિષ્ઠ નેતાઓ જ લેશે.