મારુ GST ચોરીનું બિલ શૂન્ય કરી નાખો નહિતર ખોટા ગુનામાં ફિટ કરાવી દઇશ
મોબાઈલ વેપારી જીગર અનડકટ અને તેની પત્ની જીજ્ઞા સામે નોંધાઈ ફરિયાદ
ખાસ-ખબર ન્યૂઝ રાજકોટ, તા.4
- Advertisement -
રાજકોટના શ્રોફ રોડ પર ગવર્નમેન્ટ કવાર્ટરમાં રહેતા અને બહુમાળી ભવનમાં આવેલ સંયુક્ત રાજ્ય વેરા કમિશનરની કચેરીમાં રાજ્યવેરા અધિકારી તરીકે નવ માસથી ફરજ બજાવતા પ્રિયંકાબા વિક્રમસિંહ જાડેજા (ઉ.32)એ પ્ર.નગર પોલીસ મથકમાં શારદાનગરના જીગર નરેન્દ્ર અનડકટ અને તેની પત્ની જીજ્ઞાબેન સામે પ્ર.નગર પોલીસમાં નોંધાવેલી ફરિયાદમાં જણાવ્યું હતું કે તેઓ હાલ ગર્ભવતી છે, અધિકારીની સૂચનાથી અમીન માર્ગ, ગુજરાત હાઉસીંગ બોર્ડ નજીક જય એન્ટરપ્રાઈઝ નામની મોબાઈલની દુકાન ધરાવતા જીગર અનડકટની દુકાનમાં જીએસટી નંબર ના હોય અને ત્યાં જીએસટી ચોરીને લગતી તપાસમાં ગયેલ હતા દરમ્યાન તપાસની કાર્યવાહીમાં માલસામાનના સ્ટોકનો તફાવત મળી આવેલ તેમજ દુકાનમાંથી રિટેલમાં કરેલ મોબાઈલના વેચાણનો કોઈ હિસાબ ચોપડે દર્શાવેલ ન હોય જેથી રૂા.14.95 લાખની કરચોરી ધ્યાને આવી હતી.
ત્યારે જીગર અનડકટે જણાવેલ કે પોતાની આર્થિક પરિસ્થિતિ નબળી હોય જેથી પોતે કરચોરીની રકમ હપ્તે હપ્તે ભરી આપશે તેવી બાંહેધરી આપી હતી. તેમના દ્વારા રૂા. 4.95 લાખ વેરો તથા દંડ જીએસટી વિભાગમાં 23-10-23ના ભરપાઈ કરવામાં આવેલો તેમજ બાકીની રકમ ભરપાઈ કરવામાં આવતી ન હોય જેથી તેમને રકમ ભરવા માટે કહેતા તેણે કહેલું કે હું ભરપાઈ કરી આપીશ છએક મહિના પહેલા તે ઓફિસે હાજર હતા ત્યારે જીગર અનડકટનો ફોન આવેલ અને કહેલું કે મારે જીએસટી ચોરીની રકમ ભરપાઈ કરવાની બાકી છે તે શૂન્ય કરાવી આપો તેમ કહેતા તેણીએ જણાવેલું કે મારી બદલી બહુમાળી ભવન ખાતે આવેલી કચેરીમાં થયેલ છે તેથી તમે લાગુ પડતી કચેરીમાં જવા માટે કહેતા આરોપીએ કહેલ કે રકમ શૂન્ય કરાવી આપો નહીતર તમને તકલીફ પડશે. બાદમાં ગઈ તા.30-4ના બપોરના સમયે તેણી ઓફિસમાં હતા. ત્યારે આરોપી દંપતી જીગર અને જીજ્ઞા અનડકટ ધસી આવેલા અને જીગરે કહેલ મારી દુકાનમાં જીએસટી ચોરી પકડેલી રકમ તમે શૂન્ય કરાવી આપો તેમ કહેતા તેણે કહેલ કે તમારી લાગુ પડતી કચેરીએ વાત કરજો અને તમારી ભરપાઈ કરવાની રકમ ભરી આપજો.
કહેતા દંપતિ ઉંચા અવાજે બુમો પાડી ખોટી ફરિયાદ કરીને તમોને સંડોવી દેશુ અને અમારી એસીબી કચેરીમાં ઓળખાણ છે જેથી તેમાં ખોટા કેસમાં ફીટ કરી દેશું તેવુ કહી દેકારો કરતા કચેરીના અન્ય સ્ટાફ આવી જતા દંપતિ જતુ રહ્યું હતું.
- Advertisement -
આરોપી જીગર ફોનમાં ખરાબ વર્તન કરતો હોય જેથી તેના ફોન ઉપાડવાના બંધ કરી દીધા હતા ત્યારબાદ ગઈ તા.11-6ના બપોરના સમયે દંપતી ઓફિસે ધસી આવેલું અને કહેવા લાગેલું કે તમે કેમ અમારા ફોન ઉપાડતા નથી કહી ગાળો આપી જીગરના હાથમાં રહેલી ઓફિસની ફાઈલ ખેંચીને ટેબલની નીચે ફેંકી દીધેલી અને ફાઈલ લેવા તેણી નીચે નમતા આરોપી દંપતીએ ધકકો મારી નીચે પછાડી દીધા હતા અને દંપતીએ કહેલ કે સરકારી બાકી લેણુ શૂન્ય કરાવી આપો નહી તો તમને મારી નાંખીશુ અને તમારા વિરુદ્ધ મીડીયા તથા એસીબીમાં ફરિયાદ કરીશું અને પાછા આવીશુ ત્યારે ઉભા પણ નહી રહી શકો તેવી હાલત કરશુ તેવી ધમકી આપી હતી.
બાદમાં તેણી 100 નંબરમાં ફોન કરતા જીગરે તેણીના હાથમાંથી ચાલુ ફોન ખેંચીને કાપી નાંખતા તેણીએ રાડારાડી કરતા અન્ય સ્ટાફ દોડી આવ્યો હતો અને આરોપી દંપતિ નાસી છુટયા હતા. બનાવ અંગે ફરિયાદ પરથી પ્રનગર પોલીસે ગુનો નોંધી આરોપી દંપતીને પકડવા ચક્રો ગતિમાન કર્યા હતા.
