ફૂલ જેવી કુમળી બાળા પર સગીર વયના કિશોરનું દુષ્કર્મ

 શાપર વેરાવળમાં આવેલા કારખાના વિસ્તારમાં કિશોરે ટીવી જોવાના બહાને ઓરડીમાં લઈ જઈ દુષ્કર્મ આચર્યું

ખાસ-ખબર સંવાદદાતા
રાજકોટમાં વધુ એક વખત 4 વર્ષની બાળકી પર દુષ્કર્મની ઘટના સામે આવી છે. શાપર-વેરાવળમા આવેલ કારખાના વિસ્તારમા મજૂરી કામ કરતા પરિવારની 4 વર્ષની માસુમ બાળકી પર સગીર વયના કિશોરે ટીવી જોવા બહાને કારખાનામાં આવેલ ઓરડીમાં લઇ જઇ દુષ્કર્મ આચર્યું હતું. હાલ પોલીસે આરોપી વિરુદ્ધ ગુનો નોંધી તેને હસ્તગત કરી વધુ તપાસ હાથ ધરી છે. આ અંગેની પ્રાપ્ત વિગતો અનુસાર મજૂરી કામ કરી પોતાના ઘરનું ગુજરાન ચલાવવા પરિવાર શાપરમાં આવ્યો હતો. જ્યાં તેઓ મજૂરી કામ માટે શાપરના ઇન્ડસ્ટ્રીયલ ઝોનમાં જતા હતા. એ સમયે 4 વર્ષની માસુમ બાળકી પર નજીકમાં જ રહેતા સગીર વયના કિશોરે કારખાનાની અંદર ઓરડીમાં ટીવી જોવા બહાને બોલાવી દુષ્કર્મ આચર્યું છે.

બાળકી સાથે દુષ્કર્મ થયાની જાણ થતાં બાળકીનો પરિવાર સ્તબ્ધ થઇ ગયો હતો અને બાળકીને તાત્કાલિક સારવાર અર્થે રાજકોટ સિવિલ હોસ્પિટલ ખસેડવામાં આવી હતી. બાદમાં પરિવારે શાપર પોલીસ મથકમાં દુષ્કર્મ આચરનાર સગીર વયના કિશોર વિરુધ્ધ ફરિયાદ નોંધાવી કડક સજાની માંગ કરી છે.