ATS અને SOG ટીમની મોટી કાર્યવાહી
ખાસ-ખબર ન્યૂઝ સુરત
- Advertisement -
રાજ્યમાં કૂદકેને ભૂસકે ડ્રગ્સનો વેપલો વધી રહ્યો છે. ત્યારે વાપીના ચલા વિસ્તારમાં આવેલા એક બંગલામાં એમડી ડ્રગ્સનું કારખાનું ઝડપાયું છે. પેરોલ જમ્પના આરોપી અને તેના પુત્ર સહિત પાંચ આરોપીઓની ધરપકડ કરવામાં આવી છે.
એટીએસ અને એસઓજી ની ટીમે પાડેલા દરોડામાં 5 કિલોથી વધુનું એમડી ડ્રગ્સ પકડાયું છે, જેની બજાર કિંમત આશરે રૂપિયા 25 કરોડ જેટલી આંકવામાં આવી રહી છે.
પોલીસના પ્રાથમિક તપાસમાં ખુલાસો થયો છે કે આ કારખાનામાં ડ્રગ્સ તૈયાર કરીને અલગ-અલગ જગ્યાએ સપ્લાય કરવામાં આવતું હતું. પોલીસે સમગ્ર મામલે વધુ તપાસ હાથ ધરી છે.
ગુજરાત એટીએસને મળેલી બાતમીને આધારે ટીમે વલસાડ એસ.ઓ.જી પોલીસને સાથે રાખીને આ કાર્યવાહી કરી હતી. વાપીના ચલા વિસ્તારમાં આવેલા બંગલામાં વહેલી સવારે રેડ કરવામાં આવી હતી. આ રેડ દરમિયાન આ બંગલામાંથી પાંચ કિલોથી વધુ માત્રામાં એમડી ડ્રગ્સ મળી આવ્યું હતું. આ સાથે જ પ્રાથમિક માહિતી મુજબ, આ બંગલામાંથી ડ્રગ્સ વાપી અને આસપાસના વિસ્તારમાં સપ્લાય કરવામાં આવી રહ્યું હતું. અત્યારે પાંચ આરોપીઓની અટકાયત છે. જોકે આગામી તપાસમાં અનેક ચોંકાવનારા ખુલાસા થઈ શકે છે. પોલીસના હાથે ઝડપાયેલા આરોપીઓનો ગુનાહિત ભૂતકાળ પણ બહાર આવી રહ્યો છે. આગામી તપાસમાં આ રેકેટનો રેલો મોટા માથા સુધી પહોંચી શકે છે.
- Advertisement -
ઉલ્લેખનીય છે કે ગુજરાતમાં નશાબંધી કાનૂન નામશેષ થઈ રહ્યો છે અને દારૂની બંધી રોકવા માટે સરકાર પાસે કોઈ એક્શન પ્લાન નથી. પરંતુ તેનાથી પણ વધુ ખતરનાક હદે ડ્રગ્સનો કારોબાર વધી રહ્યો છે. આખા દેશમાં ગુજરાતનો દરિયા કિનારો જ એવો છે કે જ્યાંથી સાત વર્ષમાં 40 હજાર કરોડ રૂપિયાનું ડ્રગ્સ પકડાયું છે. એટલે કે પ્રતિદિન સરેરાશ 15 કરોડ રૂપિયાનું ડ્રગ્સ ગુજરાતમાંથી પકડાય છે. નશાખોરીના ગુજરાત મોડલને છતાં શાંત અને સુરક્ષિત માનવામાં આવે છે. ગુનેગારો ગુના કરવામાં, દુષ્કર્મ આચરવામાં, નશાખોરી કરવામાં, ડ્રગ્સ વેચવામાં વ્યસ્ત છે.
