હિંદુઓની વર્ષો જૂની પરંપરાને કોરાણે મૂકી માત્ર એક જ સંપ્રદાયની વાહવાહી કરવાથી સનાતન ધર્મ ખતરામાં આવી જશે; સાધુ-સંતો
સૌરાષ્ટ્ર યુનિવર્સિટી આગામી શૈક્ષણિક વર્ષથી દરેક કોલેજમાં બીએપીએસનો કોર્સ શરૂ કરવા જઈ રહી છે ત્યારે સૌરાષ્ટ્રના સાધુ-સંતોએ તેની સખત શબ્દોમાં ઝાટકણી કાઢી છે. ગિરનાર મંડળના પ્રમુખ અને પંચદશનામ જૂના અખાડાના ઉપાધ્યક્ષ ઈન્દ્રભારતીબાપુએ જણાવ્યું હતું કે, આ બાબતે રાજ્ય સરકાર અને શિક્ષણ વિભાગને પણ પત્ર લખીને રજૂઆત કરવામાં આવશે. તેઓએ કહ્યું હતું કે, ધર્મના માધ્યમથી મૂલ્યનિષ્ઠ શિક્ષણ આપવું હોય તો સનાતન ધર્મમાંથી શીખવાડો જેથી કરીને હિંદુઓની હજારો વર્ષ જૂની પરંપરા જળવાઈ રહે જો આમ કરવામાં નહિ આવે તો સનાતન ધર્મ ખતરામાં આવી જશે.
- Advertisement -
ઈન્દ્રભારતીબાપુએ વધુમાં જણાવ્યું હતું કે, ‘બીએપીએસ સંસ્થાનો કોર્સ અને શિક્ષણ સાથે જોડવાની સૌરાષ્ટ્ર યુનિવર્સિટીએ જે પેરવી કરી છે અને ગુજરાતની કેટલીક કોલેજોમાં આ આખા વિશ્વની અંદર માત્ર પ્રમુખ સ્વામી મહારાજ જ સર્વેસર્વા હોય તેવું ભણાવવામાં આવી રહ્યું છે ત્યારે અમે આ કોર્સનો સખતમાં સખત વિરોધ કરીએ છીએ અને જો આ કોર્સ કોલેજોમાંથી હટાવવામાં નહિ આવે તો આગામી દિવસોમાં તેના ગંભીર પ્રત્યાઘાતો પડશે. શિક્ષણમાં જો ધર્મ ભણાવવો જ હોય તો સનાતન ધર્મ ભણાવવો જોઈએ.
વિશ્વમાં જો કોઇ સાચો ધર્મ હોય તો તે માત્રને માત્ર સનાતન ધર્મ
પ્રમુખ સ્વામી મહારાજની આ વર્ષે જન્મ શતાબ્દી ઉજવવામાં આવી રહી છે એટલે તેઓને હજુ તો 100 વર્ષ જ થયા છે પરંતુ સનાતન ધર્મ તો આદિ અનાદિ કાળથી શરૂ થયો છે અને આખા વિશ્વમાં જો કોઇ સાચો ધર્મ હોય તો તે માત્રને માત્ર સનાતન ધર્મ જ છે. બાકીના તમામ સંપ્રદાયો છે અને તે લોકોએ બનાવેલા છે અને લોકોએ જ તેના નીતિ નિયમો નક્કી કર્યા છે. આપણા ભારતની સંસ્કૃતિ પણ સનાતન ધર્મ પર ટકી રહી છે અને સનાતન ધર્મના કારણે જ આપણે વિશ્વગુરુ બનીશું. આથી આપણે ભારતના બાળકોને જો શિક્ષણમાં ધર્મ અંગે સમજણ આપવી હોય તો તે સનાતન ધર્મની આપવી જોઈએ માત્ર એક વ્યક્તિની નહીં.
શ્રીરામએ કેવી રીતે રાજ કર્યું તે શીખવવું જોઈએ
આપણા સૌરાષ્ટ્રની જ વાત કરીએ તો જૂનાગઢમાં સંત નરસિંહ મહેતા થઈ ગયા આ ઉપરાંત મીરાંબાઈ કે જેણે કૃષ્ણ ભગવાનની ભક્તિ કરીને આખા જગતને સંદેશો આપ્યો છે કે, ભક્તિ કેવી રીતે અને કેટલી પવિત્રતાથી કરી શકાય છે તેમજ જો ધર્મ વિશે વિદ્યાર્થીઓને જ્ઞાન આપવું હોય તો નિરંતર, નિરાકારી વિશ્વના નાથ ભોળાનાથ અંગે સમજ અને શિક્ષણ આપવું જોઈએ. મર્યાદા પુરુષોત્તમ ભગવાન શ્રીરામએ કેવી રીતે રાજ કર્યું અને ભાઈચારાની ભાવના કેવી હોવી જોઈએ, લોકોનું કલ્યાણ કેવી રીતે કરવું તે શીખવવું જોઈએ. ભગવાન શ્રીકૃષ્ણએ મહાભારતના યુદ્ધમાં જે શીખવ્યું તે કૂટનીતિ વિદ્યાર્થીઓને શીખવવી જોઈએ.
- Advertisement -
સંહાર કરનારી જગદંબાઓ વિશે શીખવવું જોઈએ
આ ધરતી ઉપર રાક્ષસોનો ઉપદ્રવ થયો ત્યારે તેનો સંહાર કરનારી જગદંબાઓ વિશે શીખવવું જોઈએ. આપણા સૌરાષ્ટ્રમાં જ બાપા બજરંગદાસ, જલારામબાપા સહિતના અનેક સુપાત્ર સંત થઈ ગયા તેઓએ આપેલા પરચા અંગેનું જ્ઞાન વિદ્યાર્થીઓને શીખવવું જોઇએ.ઈન્દ્રભારતીબાપુએ ઉલ્લેખ કર્યો હતો કે, 2500 વર્ષ પહેલા જગદગુરુ શંકરાચાર્ય થયા જેમણે દેશ-વિદેશમાં ધર્મ પ્રચાર કર્યો તેમના વિશે કશું નહીં? આવા વિશ્વના સંતો થયા તેને બદલે ઉપજાવી કાઢેલા અને ભૂકંપ બાદ પ્રમુખ સ્વામી ગયા અને સહાય કરી તેવા મહિમામંડન કરાવાઈ રહ્યાં છે.
સનાતન ધર્મની રક્ષા કાજે પગલાં લેવા જોઈએ
યુનિવર્સિટીમાં પર્સનાલિટી ડેવલપમેન્ટ કોર્સના નામે પ્રમુખ સ્વામી મહારાજ, સંપ્રદાયના મંદિરો અને તેમના સંતોના ઉદાહરણો કેસ સ્ટડી તરીકે લઈને યુવાનોને આ સંપ્રદાય તરફ વાળવા માટેનો દુષ્પ્રચાર કરશે તો તે સાંખી લેવામાં નહિ આવે. સરકારને પણ અમારી અપીલ છે કે, જો આ કોર્સ યુનિવર્સિટીમાંથી દૂર કરવામાં નહિ આવે તો સાધુ-સંતો લડત ચલાવશે અને સરકારને પણ અમારી અપીલ છે કે, આ મામલે તેઓએ પગલાં લઈને સનાતન ધર્મની રક્ષા કાજે પગલાં લેવા જોઈએ.
એક વ્યક્તિના નામે ધર્મનું શિક્ષણ ન આપવું જોઈએ
જો સ્વામિનારાયણ સંપ્રદાયના સંતો આ રીતે જ શિક્ષણમાં ધર્મપ્રચારની કુચેષ્ઠા કરશે તો અમે અમારા તમામ સનાતન ધર્મના અનુયાયીઓને અપીલ કરી કરીને કહેશું કે, તમારા બાળકોને આવી શાળા અને કોલેજો કે યુનિવર્સિટીઓમાં અભ્યાસ માટે મોકલે નહિ અને કોર્સમાંથી નામ કઢાવી નાખે. અંતમાં એમ પણ જણાવાયું હતું કે સ્વામિનારાયણ સંપ્રદાય સામે કોઈ વાંધો નથી પણ કોઈ એક વ્યક્તિના નામે ધર્મનું શિક્ષણ ન આપવું જોઈએ.
