હિરાસર એરપોર્ટમાં રૂા.1240 કરોડનો ખર્ચ, ઈન્ટરનેશનલ ફ્લાઈટનું શિડ્યુલ નથી

ખાસ-ખબર ન્યૂઝ રાજકોટ

રાજકોટના ઈન્ટરનેશનલ એરપોર્ટ પરથી વિદેશોની ફલાઈટો શરૂ ન કરાતી હોવાના વિવાદ વચ્ચે સંસદમાં કેન્દ્ર સરકારે એવો જવાબ આપ્યો હતો કે હિરાસર એરપોર્ટનો ખર્ચ અંદાજ કરતા ઓછો થયો છે. રૂા.1405 કરોડના અંદાજ સામે રૂા.1240 કરોડનો ખર્ચ કરાયો છે. કોંગ્રેસનાં રાજયસભાનાં સાંસદ શકિતસિંહ ગોહીલે હિરાસર એરપોર્ટ સંબંધી માહિતી માંગતો પ્રશ્ર્ન પૂછયો હતો તેના લેખીત જવાબમાં ઉડ્ડયન રાજયમંત્રી મૂરલીધને જણાવ્યું હતું કે, એરપોર્ટ ઓથોરીટીના ગુજરાત સરકારે રૂા.1405 કરોડના અંદાજીત ખર્ચ સાથેનો હિરાસર એરપોર્ટ પ્રોજેકટ હાથ ધર્યો હતો જુન મહિનાના અંત સુધીમાં તેમાં રૂા.1240 કરોડનો ખર્ચ થયો છે. હિરાસર એરપોર્ટ માટેની જમીનનું સંપાદન ગુજરાત સરકારે કર્યું હતું અને તે પછી એરપોર્ટ ઓથોરીટીને મફતમાં આપી હતી. એરપોર્ટથી ઈન્ટરનેશનલ ફલાઈટનાં કોઈ શિડયુલ ન હોવાનું પણ જવાબમાં સ્પષ્ટ કરવામાં આવ્યું હતુ. અત્રે ઉલ્લેખનીય છે કે, આ હિરાસર એરપોર્ટથી માત્ર ડોમેસ્ટીક વિમાનોનાં જ ઉડાન રહેવાનું એરપોર્ટ ઓથોરીટીની મીટીંગમાં નકકી થયાનું જાહેર થતા જબરો વિવાદ સર્જાયો હતો. ત્યારે કદાચ ઓકટોબરથી વિદેશી ફલાઈટ શરૂ થવાની શકયતા દર્શાવવામાં આવી હતી. વાસ્તવમાં ઈન્ટરનેશનલ ફલાઈટ ઓપરેશન માટે કોઈ ઈન્ફ્રાસ્ટ્રકચર જ નથી.

ઈન્ટરનેશનલ ફલાઈટ શરૂ કરવા ઈમીગ્રેશન કસ્ટમ, એરલાઈન્સોની ઓફીસ વગેરે અનિવાયર્ં છે અને તે માટે નવુ ટર્મીનલ બિલ્ડીંગ બાંધવુ પડે અત્યારે એક ટર્મીનલનું નિર્માણ ચાલુ છે તે ચાલુ માસમાં પૂર્ણ થઈ શકે તેમ છે.આ બિલ્ડીંગમાં અનિવાર્ય સુવિધાઓને સામેલ કરી શકાય તેમ નથી.

ઈન્ટરનેશનલ ઓપરેશન માટે વિદેશોની ફલાઈટના મુસાફરો માટે એન્ટ્રી-એકઝીટ ગેટ અલગ રાખવો પડતો હોય છે. રાજકોટના હિરાસર એરપોર્ટથી ઓકટોબરથી ઈન્ટરનેશનલ ફલાઈટ શરૂ કરવાની શકયતા દર્શાવીને વિવાદ થાળે પાડવાનો પ્રયાસ કરાયો હતો.

પરંતુ ઈરીગેશન-કસ્ટમ જેવી સુવિધાની પ્રક્રિયા શરૂ થવા કે અન્ય કોઈ વિગતોનો ફંડ પાડવામાં આવ્યો નથી. તાજેતરમાં પૂર્વ ઉડ્ડયનમંત્રી અને ભાજપના સાંસદ રાજીવ પ્રતાપ રૂડી રાજકોટની મુલાકાત દરમ્યાન એવુ વિધાન કરી ગયા હતા કે ઈન્ટરનેશનલ એરપોર્ટ હોય તો આંતર રાષ્ટ્રીય વિમાનો ઉડાન ભરે તે જરૂરી નથી.
આંતર રાષ્ટ્રીય ઉડાનોનો વિવાદ વચ્ચે વેપારી મહામંડળ રાજકોટ ચેમ્બર ઓફ કોમર્સે પણ ઈન્ટરનેશનલ ફલાઈટ વહેલીતકે શરૂ કરવા સરકારને પત્ર પાઠવ્યો છે. દુબઈ, મલેશીયા તથા સિંગાપોરની ફલાઈટ માટે સારો ટ્રાફીક મળી શકે તેમ હોવાનું પણ દર્શાવ્યુ છે.