રાજકોટમાં સતત બીજા દિવસે હેલ્મેટ ડ્રાઈવ

મનપા અને બહુમાળી સહિત સરકારી કચેરીઓ બહાર પોલીસનું સઘન ચેકિંગ, અનેક કર્મચારીઓ દંડાયા

ખાસ-ખબર ન્યૂઝ રાજકોટ, તા.22
ગુજરાત સરકાર દ્વારા સરકારી કર્મચારીઓ માટે હેલ્મેટ અને સીટ બેલ્ટનો ફરજિયાત અમલ કરવાનો આદેશ કરવામાં આવ્યો છે. જે અંતર્ગત ગઈકાલે વિવિધ સરકારી કચેરીઓ બહાર પોલીસ દ્વારા ચેકિંગ કરવામાં આવ્યું હતું. ત્યારે આજે સતત બીજા દિવસે શહેરની કોર્પોરેશન અને બહુમાળી સહિતની સરકારી કચેરીઓ બહાર પોલીસ દ્વારા સઘન ચેકિંગ કરવામાં આવ્યું હતું. આ દરમિયાન ખાસ હેલ્મેટનાં નિયમનો ભંગ કરવા બદલ અનેક સરકારી કર્મચારીઓ દંડાયા હતા.

પ્રાપ્ત વિગત મુજબ, શહેરની કોર્પોરેશન અને બહુમાળી કચેરી તેમજ કલેકટર ઓફિસ સહિતના સ્થળે સવારથી ટ્રાફિક પોલીસ અને ટ્રાફિક બ્રિગેડની ટીમો તેમજ છઝઘ દ્વારા ચેકિંગ હાથ ધરવામાં આવ્યું હતું. જેમાં હેલ્મેટ પહેર્યા વિના જ આવેલા અનેક સરકારી કર્મચારીઓને સ્થળ પર રૂ. 500 દંડ ફટકારવામાં આવ્યો હતો. પોલીસની આ કામગીરી દરમિયાન કેટલાક કર્મચારીઓ પોતાના વાહન બહાર જ પાર્ક કરવા લાગ્યા હતા. જ્યારે દરરોજની જેમ કચેરીમાં પ્રવેશ કરનારાઓએ દંડ ભરવો પડતાં કચવાટ જોવા મળ્યો હતો. મનપા કચેરી ખાતે તૈનાત આરટીઓ ઇન્સપેક્ટર એચ. એ. પટેલે જણાવ્યું હતું કે, ગુજરાત સરકારનાં સામાન્ય વહીવટ વિભાગ દ્વારા જાહેરનામું બહાર પાડવામાં આવ્યું છે. જે અંતર્ગત કોઈપણ સરકારી કચેરીઓમાં ફરજ બજાવતા અને દ્વિચક્રી વાહનોનો ઉપયોગ કરતા કર્મચારીઓ માટે હેલ્મેટ ફરજિયાત કરવામાં આવ્યું છે. જેને લઈને આજે સતત બીજા દિવસે વિવિધ સરકારી કચેરીઓ બહાર પોલીસ અને આરટીઓની જુદી-જુદી ટીમો દ્વારા ચેકિંગ હાથ ધરવામાં આવ્યું છે અને હેલ્મેટ પહેર્યા વિના આવનારા તમામ કર્મચારીઓ પાસેથી દંડ વસુલ કરવામાં આવી રહ્યો છે. ઉલ્લેખનીય છે કે, રાજકોટ પોલીસ કમિશનર કચેરીએ તેમજ પોલીસ હેડ ક્વાર્ટરમાં ઘણા સમયથી પોલીસનાં કર્મચારીઓ સહિત મુલાકાતીઓ માટે પણ ફરજિયાત હેલ્મેટનાં કાયદાનો અમલ કરવામાં આવી રહ્યો છે. પોલીસ કમિશનર કચેરીમાં હેલ્મેટ પહેર્યા વિના આવતા તમામ લોકોને ઇ-મેમો દ્વારા દંડ ફટકારવામાં આવી રહ્યો છે. ત્યારે આગામી સમયમાં અન્ય તમામ સરકારી કચેરીઓમાં પણ સીસીટીવી કેમેરાનાં માધ્યમથી દંડનો પ્રારંભ કરવામાં આવે તેવું લાગી રહ્યું છે.

વેલનાથ પરાનાં પૂલ પાસે તથા જૂની મામલતદાર કચેરી ખાતે હેલ્મેટ ડ્રાઇવ

ટોટલ રોકડ કેસ 72
ટોટલ રોકડ દંડ- 32800
ટોટલ ઈ ચલણ કેસ- 121
ટોટલ ઈ ચલણ દંડ- 61300
ટોટલ ડ્રાઇવ કેસ- 193
ટોટલ ડ્રાઇવ દંડ- 94100

CP ઑફિસ તથા SP ઑફિસ ખાતે ડ્રાઇવ

ટોટલ રોકડ કેસ- 45
ટોટલ રોકડ દંડ- 20,900
ટોટલ ઈ ચલણ કેસ- 38
ટોટલ ઈ ચલણ દંડ-24,500
ટોટલ ડ્રાઇવ કેસ- 83
ટોટલ ડ્રાઇવ દંડ- 45,400
ડિટેન- 00

કોર્પોરેશન તથા મામલતદાર કચેરી ખાતે હેલ્મેટ ડ્રાઇવ

રોકડ કેસ- 69
રોકડ દંડ- 29,700
ચલણ- 50
ચલણ દંડ- 24,500
કેસ- 111
દંડ- 54,200