દક્ષિણ-સૌરાષ્ટ્રમાં વરસાદનું ઝાપટું, રાજકોટમાં તાપમાન 10 ડિગ્રી ઘટ્યું

 ત્રણ દિવસ થંડર સ્ટ્રોમ : રાજ્યનાં મોટા ભાગનાં શહેરોમાં તાપમાન 40 ડિગ્રીથી નીચે

ખાસ-ખબર સંવાદદાતા
રાજ્યભરમાં મંગળવારે તેજ પવનો સાથે કેટલાક વિસ્તારોમાં વરસાદનાં ઝાપટાં નોંધાયાં હતાં. જેના કારણે અમદાવાદ, સુરેન્દ્રનગર તથા ઉત્તર ગુજરાતનાં કેટલાંક સ્થળોને બાદ કરતા મોટાભાગનાં શહેરોમાં 40 ડિગ્રીથી નીચે તાપમાન નોંધાયું હતું. દક્ષિણ ગુજરાતમાં વાપી, વલસાડમાં તેજ પવનો સાથે ઝાપટાં નોંધાયાં હતાં. જેના કારણે ગરમીમાં રાહત મળી હતી. જ્યારે રાજકોટમાં પણ અડધાથી બે ઇંચ સુધી વરસાદ પડતા માત્ર એક કલાકમાં તાપમાનમાં 10 ડિગ્રી સુધીનો ઘટાડો થયો હતો. વલસાડમાં મંગળવારે સવારે 8થી 8.30 વાગ્યાના સુમારે ઝાપટાં થતાં વાતાવરણમાં ઠંડક પ્રસરી હતી. તેજ પવનના કારણે તિથલ બીચ પર સ્ટોલ્સના મંડપો પણ તૂટી પડ્યા હતા. હવામાન વિશેષજ્ઞના મત મુજબ આ ચોમાસાનો વરસાદ નથી પરંતુ વેસ્ટર્ન ડિસ્ર્ટબન્સની અસરથી વરસાદ થયો છે. નવસારી સ્થિત એગ્રીકલ્ચર યુનિવર્સિટીના કૃષિ નિષ્ણાત ડો.સી.કે.ટીમ્બડિયાએ જણાવ્યું હતું કે વરસાદી વાતાવરણના કારણે પાક પર માઠી અસર જોવા મળશે.

ખાસ કરીને કેરી લગભગ જે 20 ટકા આંબા પર જોવા મળતી હતી તે પણ હવે કદાચ જોવા નહીં મળે. જૂનાગઢ કૃષિ યુનિવર્સિટીના સહ વિસ્તરણ શિક્ષણ નિયામક ડો.જી.આર.ગોહિલે જણાવ્યું હતું કે અત્યારે ખેતરમાં તલ ઉભા હોય છે. જેનો નિકાલ કરતા 15 દિવસનો સમય લાગતો હોય છે. જો તેના પર અડધો ઈંચ વરસાદ પડે તો તલનો પાક પણ બગડી જાય. રાજકોટમાં સાંજે 6 કલાકે વરસાદ શરૂ થયો હતો અને જોત-જોતામાં 10 મિનિટમાં અડધો ઈંચ અને પ્રદ્યુમ્નપાર્ક ઝૂમાં દોઢ કલાકમાં બે ઈંચ વરસાદ નોંધાયો હતો. શહેરના રાજકોટના અલગ- અલગ વિસ્તારમાં 5 કલાક સુધી 37 ડિગ્રી તાપમાન નોંધાયું હતું અને સાંજે વરસાદ થયા બાદ 6 કલાક પછી 27 ડિગ્રી તાપમાન નોંધાયું હતું. ચોમાસા સુધી આવું જ વાતાવરણ રહેશે.