રાજકોટ પોલીસે કુલ 3.53 લાખનો મુદ્દામાલ કબ્જે કર્યો
ખાસ-ખબર સંવાદદાતા
શ્રાવણ મહિનાની શરૂઆત થાય એટલે સૌરાષ્ટ્રમાં જાણે જુગારની મોસમ ખીલી રહી હોય તેમ રોજ બરોજ અલગ અલગ જગ્યાએ જુગાર રમતા જુગારીઓ પોલીસના હાથે ઝડપાતા હોય છે ફરી રાજકોટ શહેર પોલીસ દ્વારા શહેરની આશ્રય ગ્રીન સોસાયટી, તક્ષશીલા એપાર્ટમેન્ટ, આભુષણ કોમ્પલેક્ષ સહિત જુગારના પાંચ જગ્યાએ દરોડા પાડી 28 શખ્સોને ઝડપી પાડી કુલ રૂ. 3.53 લાખનો મુદામાલ કબ્જે કરી કાર્યવાહી હાથ ધરી હતી.
- Advertisement -
રાજકોટ તાલુકા પોલીસ ટીમે આશ્રય ગ્રીન સોસાયટી પાર્થ વિદ્યાલયની બાજુમાં ફલેટ નં.સી-103માં રહેતા નિલેશ લક્ષ્મીદાસ ગામીના મકાનમાં ચાલતા જુગારધામમાં દરોડો પાડી 8 લોકોને પકડી પાડી કુલ રોકડ રૂ. 58,500નો મુદામાલ કબ્જે કર્યો હતો. જ્યારે સર્કિટ હાઉસની સામેની શેરીમાં આવેલ તક્ષશીલા એપાર્ટમેન્ટમાં બ્લોક નં. બી-221માં રહેતા સાતને ઝડપી પાડી રોકડ અને મોબાઇલ મળી રૂ.2.70 લાખનો મુદામાલ કબ્જે કર્યો હતો. સોની બજાર મેઇન રોડ પર આવેલ આભુષણ કોમ્પલેક્ષના ત્રીજા માળે દુકાન નં. 59માં ચાલતા જુગારધામમાં એ ડીવીઝન પોલીસે દરોડો પાડી અલગ અલગ આંગડીયા પેઢીયાના કર્મચારીઓને ઝડપી પાડ્યા હતા.
જેમાં રૂ.33,600ની રોકડ મળી આવી હતી. જ્યારે ચોથા દરોડામાં નટરાજનગરમાં સ્ટ્રીટ લાઇટના અજવાળે જાહેરમાં પતા રમતા કાના હાજા ઓડેદરા, કેયુર ચીમન પારેખ, પ્રદિપ ભાઇજી જોશી અને નિલેશ મનોહર પાટડીયાને દબોચી 16,680ની રોકડ કબ્જે કરી હતી. જ્યારે અન્ય એક દરોડામાં સરધારથી ખારચીયા રોડ પર આવેલ શ્રીરામ ફેકટરીની બાજુમાં જાહેરમાં જુગાર રમતા મહેશ હંસરાજ ખુંટ, જયેશ બાબુ સાયજી, કનુ બચુ પરમાર, નિકુંજ ભરત ખોરીયા, કૌશિક રમેશ ઢાંકેચા અને મહેશ સરદાર બારૈયાને ઝડપી પાડી 13,900ની રોકડ સાથે ધરપકડ કરી કાયદેસરની કાર્યવાહી હાથ ધરી હતી.
