IDનો જુગાર : પંટરો પાયમાલ, બુકી અને પોલીસ માલા-માલ

શહેરના કરણપરાથી વર્લીમાં ઝંપલાવનાર આજે એશિયામાં સટ્ટાના ધંધામાં ટોચ પર

ક્રિકેટ, ફૂટબોલ, ટેનિસ, વર્લી-મટકા, અંદર-બહાર, કસીનો સહિતની રમતોનો IDમાં સમાવેશ: સેક્ધડ્સમાં લાખોની આવક 

શહેરના કરણપરા વિસ્તારમાં બે દાયકા પહેલાં ખુલ્લેઆમ વર્લી-મટકાનો જુગાર ચાલતો હતો. આ જુગાર શરૂ કરનાર વ્યક્તિને આવક ખૂબ જ સારા પ્રમાણમાં હોવાથી તેના પુત્ર આરઆરએ પણ આ ધંધામાં ઝંપલાવ્યું હતું અને એક સ્વપ્ન જોયું હતું કે શહેર, રાજ્ય કે રાષ્ટ્ર નહિ પરંતુ સમગ્ર સટ્ટાની કોઈ પણ પ્રકારની રમતના જુગારમાં ગ્રાહકો તેના પાસે હાર-જીત કરવા માટે આવે. સમય જેમ-જેમ પસાર થતો ગયો તેમ-તેમ આરઆરએ જોયેલું સ્વપ્ન શહેર, રાજ્ય, રાષ્ટ્ર અને એશિયા લેવલે કઠોર મહેનત બાદ સાકાર થયું અને એટલે તો કહેવાય છે કે શહેરના કરણપરાએથી વર્લી ચાલુ કરનાર એશિયામાં સટ્ટાના ધંધામાં ટોચ પર તેની તૂલના થઈ રહી છે. આ ભેજાબાજે શરૂ કરેલી સટ્ટા માટેની ઓનલાઈન આઈડીમાં ક્રિકેટ, ફૂટબોલ, ટેનિસ, વર્લી-મટકાં, અંદર-બહાર, તીનપત્તી, કસીનો વગેરે સહિતની રમતનો સમાવેશ થાય છે. જેની આવક પર સેક્ધડની લાખો રૂપિયાને પાર છે. જેમાં દરરોજના અનેક પંટરો લાખો કરોડો રૂપિયાની હાર-જીત કરી રહ્યા છે. આઈડીમાં જે કસીનોમાં લાઈન જુગાર રમાડવામાં આવે છે. તે એક ચીટીંગવાળો જુગાર છે. જેના લીધે પંટરો હરહંમેશને માટે હારે છે અને આવા ચીટીંગવાળા જુગાર કે સટ્ટો ચલાવવા માટે બુકીઓ પાસેથી પોલીસના નિમ્ન સ્તરથી લઈને ઉચ્ચ અધિકારીઓ સુધી બધાને સેકસન આપવું પડે છે જેથી હરહંમેશને માટે સટ્ટાના જુગારમાં પંટર પાયમાલ હોય છે. જ્યારે બુકી અને પોલીસ માલા-માલ હોય છે.

સટ્ટો પણ હવે APP પર!

ભેજાબાજે સટ્ટા માટેની એપ્લિકેશન બનાવી, હવે સ્માર્ટ ફોન થકી જ રોજ લાખો-કરોડો રૂ પિયાની હારજીત!

સટ્ટા બજારે અનેક લોકોને બરબાદ કરી ઘર વગરના કરી નાખ્યા છે. આપણા દેશમાં વસ્તીનું પ્રમાણ પહેલાથી જ વધુ હોવાને લીધે 50થી 60 ટકા ગ્રેજ્યુએટ યુવાઓ બેરોજગારીના લીધે આમ-તેમ ભટકી રહ્યા છે ત્યારે આવા સટ્ટાબજારના બુકીઓ આવા યુવાનોને લલચાવી ટૂંક સમયમાં કરોડપતિ બનાવવાની લાલચ આપી સટ્ટાનો જુગાર રમવા માટે પ્રેરિત કરે છે. અંતે તો આ યુવાનો કરોડપતિ બનવાને બદલે રોડપતિ બને એ તો ચોક્કસ છે. જ્યારે કેટલાય તો લાંબી હાર થઈ જવાને લીધે આત્મહત્યા પણ કરી લે છે ત્યારે રાજકોટ શહેરના કરણપરા વિસ્તારમાં આજથી ઘણાં વર્ષો પહેલાં એક વ્યક્તિએ ખુલ્લેઆમ વર્લીમટકાંનો જુગાર રમાડવાનું શરૂ કર્યું હતું અને તેમાં કોઈ પણ પ્રકારની રૂકાવટ ન આવે તે માટે તે વ્યક્તિએ ચોક્કસ પ્રકારની વહિવટી ગોઠવણ કરી હતી. જેમાં સ્થાનિક પોલીસ અને અમુક રાજકિય પાર્ટીને ફંડ પેટે રૂપિયા ચૂકવતો હતો. બાદમાં આ વર્લીના ધંધામાં પિતા કરતાં દોઢેક કદમ આગળ જવાના ઇરાદાથી તેના લાડકવાયા પુત્રએ ઝંપલાવ્યુ અને પોતાનું ભેજુ લગાવી માત્ર શહેર, રાજ્ય કે રાષ્ટ્ર લેવલે નહીં પરંતુ સટ્ટાની બજારમાં સમગ્ર એશિયામાં તેનું નામ ટોપ બુકીના લિસ્ટમાં આવવા માંડ્યુ અને આ ભેજાભાજે ઓનલાઈન સટ્ટા માટેની એક એપ્લીકેશન બનાવી જે દરેક પંટર તેના સ્માર્ટ ફોન મારફત સહેલાઈથી રમી શકે.

આ ઓનલાઈન એપ્લીકેશન આઈડીમાં ક્રિકેટ, ટેનિસ, ફૂટબોલ, લાઈવ તીનપત્તી, લાઈવ અંદર-બહાર, લાઈવ વર્લીમટકા વગેરે સહિતની રમતોનો સમાવેશ કરી વધુ ને વધુ પંટરોને પોતાની તરફ આકર્ષવામાં સફળતા મળી. જેમાં પંટરોનું હાર-જીતનું વલણ પ્રતિદિન અથવા સપ્તાહના પ્રથમ સોમવારે આપવાનું હોય છે. હકિકત તો એ છે કે આઈડીના જુગારમાં પંટર એક રમતમાં પૈસા કમાઈ તો બીજી દસ રમત એવી છે કે જે કમાયેલા નાણા અન્ય રમતમાં રમીને પંટર પાયમાલ થઈ જાય છે. આ ધંધાને વધુ પ્રમાણમાં ફેલાવવા માટે શેરી-વિસ્તાર, સીટી, જિલ્લા અને રાજ્ય લેવલના બુકીઓને 90 ટકા સુધીની ભાગીદારીની ઓફર કરી કરણપરાનો આર.આર. હાલમાં એશિયાના ટોપ ધંધાર્થીઓમાં તેનું સ્થાન છે. આઈડીમાં જે કસીનો લાઈવ ચલાવવામાં આવે છે તે નેપાલથી ઓપરેટ થાય છે. હકિકતમાં લાઈવ કસીનોની રમતમાં કશું જ લાઈવ જેવુ હોતું નથી. માત્ર લાઈવના નામે ચીટીંગ કરી પંટરોને પાયમાલ કરવામાં આવે છે.

મંજૂરીવાળા બુકીઓ અને તેના પંટરોને પોલીસ દ્વારા ‘નો-રોકટોક’
ક્રિકેટ, ફૂટબોલ જેવી રમત પર સટ્ટો રમાડવા માટે બુકીઓ પોલીસના વહિવટદારને ધંધા આધારિત પાંચ લાખથી લઈને 50 લાખ સુધીનું સેકશન આપે છે. જેમાં શહેરની કોઈપણ બ્રાન્ચ કે અન્ય પોલીસ સ્ટેશનના કર્મચારી તે બુકી તેમજ તેની અંદર રમતા પંટરોને હેરાન-પરેશાન કરતા નથી. મંજૂરી સિવાયના કોઈ બુકી કે પંટર રમતા ઝડપાઈ જાય ત્યારે પોલીસ તેના પાસેથી લાંબી મલાઈ ઉતારે છે અને કોઈ પંટર રંગેહાથે સટ્ટો રમતા ઝડપાઈ જાય ત્યારે તેને બુકીનું નામ પૂછવામાં આવે છે, તે મંજૂરીવાળુ હોય તો તેને જવા દેવાય છે.

આઈ.ડી. આવતા લાઈનનું ચલણ ઘટ્યું
પંટરો ક્રિકેટ મેચમાં સટ્ટો રમવો હોય ત્યારે સ્થાનિક બુકીએ આપેલા ફોન નંબર પર ફોન કરી મેચની હાર-જીતનો સટ્ટો રમતાં હોય છે પરંતુ જ્યારથી બજારમાં આઈ.ડી. આવી ત્યારથી બુકીને ફોન કરી સટ્ટો રમવાના ચલણમાં ઘટાડો થયો તેનું મુખ્ય કારણ એ પણ છે કે એક આઈ.ડી.માં અનેક ક્રિકેટ મેચ, ફૂટબોલ, ટેનિસ અને કસીનો જેવી રમતો પર સટ્ટો રમાતો હોવાથી 95 ટકા પંટરો આઈ.ડી. વાપરતા થઈ ગયા અને તેનો મુખ્ય ફાયદો એ પણ છે કે પંટર ઓફિસ કે ઘરમાં બેઠા-બેઠા સોદા પાડી શકે છે અને તેની પ્રાઈવસી પણ જળવાઈ રહે છે.

ટેક્નોલોજીનો દુરૂપયોગ કરી બૂકીઓ બન્યાં કરોડપતિ

IDની કુંડળી 

ID કેવી રીતે મળશે?
પંટરો પોતાની આસપાસના સ્થાનિક બુકી પર વિશ્ર્વાસ રાખતા હોવાથી તેની સાથે કેટલા રૂપિયાની લિમિટની આઈ.ડી. અને વલણ પ્રતિદિન અથવા સપ્તાહના પ્રથમ સોમવારે કરવું તે નક્કી કરે છે. ત્યારબાદ ગ્રાહકના નામ પરથી આઈ.ડી. બનાવી બુકી ગ્રાહકને વ્હોટ્સએપના માધ્યમથી યુઝરનેમ, પાસવર્ડ અને આઈ.ડી. માટેની લીંક મોકલે છે જે લીંક પર ગ્રાહક ક્લિક કરી યુઝરનેમ અને પાસવર્ડ દાખલ કરી આઈ.ડી. ઓપન કરી સટ્ટો રમવાની શરૂઆત કરે છે.

બુકીની પ્રથમ પસંદગી ડાયમંડ ID
લોટ્સ, વ્હાઈટ હોર્સ, બેટફેર વગેરે જેવી અનેક આઈ.ડી.ઓમાં ભેજાબાજ પંટરો હેકરની મદદથી આઈ.ડી. હેક કરી મોટાપાયે નાણાં જીતી બુકીઓનું કામ ઉતારતા હોય છે ત્યારે ડાયમંડ આઈ.ડી.ને કોઈપણ હેકર હેક કરી શકતું ન હોવાથી તે બુકીની પ્રથમ પસંદગી બની છે. ડાયમંડ આઈ.ડી.ની પેટા આઈ.ડી. તરીકે ડાયમંડ99, ડાયમંડ999, બેટ એક્સચેંજ વગેરે સહિતની ચાલે છે. ડાયમંડવાળા માલિકની થોડા સમય પહેલાં અન્ય રાજ્યમાં આઈ.ડી. અને હવાલાની ઓફિસમાં પોલીસના દરોડા પડતાં તેને થોડા સમય માટે ડાયમંડ આઈ.ડી.નું નામ બદલી 777 આઈ.ડી. કરી નાખ્યું હતું.

ID એટલે ચિટીંગનું શસ્ત્ર
આઈ.ડી.માં સોદા કરતી વખતે જ્યારે કોઈપણ મેચમાં ઘોડો ઉડે એટલે રોમાંચક મેચ થાય તે દરમિયાન પંટર તાત્કાલિક સોદા પાડે ત્યારે બફરીંગ થયા કરે છે ત્યારે પંટરના બદલે માત્ર બુકી ફ્રેન્ડલી સોદા જ સ્વીકારવામાં આવે છે તેમજ લાઈવ કસીનોમાં કશું જ લાઈવ જેવું હોતું નથી લાઈવના નામે પંટરોને બેવકુફ બનાવી પૈસા પડાવી લેવાનો ગોરખધંધો જ ચાલે છે.

IDમાં કઈ – કઈ રમતો પર સટ્ટો?
આઈ.ડી.માં ક્રિકેટ, રાજકારણ, ફૂટબોલ, ટેનિસ, લક્કીસેવન, તીનપત્તી, વર્લીમટકાં, અંદરબહાર વગેરે સહિતની કસીનોની લાઈવ રમતો પર સટ્ટો રમવામાં આવતો હોય છે.

IPL અને બિગબેશ પોલીસ અને બુકીઓ માટે કમાઈ (લણી) લેવાની સિઝન
આઈ.પી.એલ. બાદ ક્રિકેટ જગતમાં બીજી વિશ્ર્વસનીય અને પ્રતિષ્ઠિત લીગ તરીકે ઓસ્ટ્રેલિયામાં રમાતી બીગબેશ લીગ છે. ભારતમાં તો આઈ.પી.એલ.ને ભારતનું તહેવાર ગણવામાં આવે છે. આ બંને લીગમાં બિલાડીના ટોપની માફક શેરીએ-શેરીએ બુકીઓ ફૂટી નીકળે છે. જેમાં મંજૂરી વિનાના બુકીઓને ઝડપી પાડવા પોલીસ અને તેના પાયદળિયાઓ કામે લાગી જાય છે અને આવા નવા નિશાળિયા બુકી પાસેથી પાંચથી છ આંકડા સુધીનો તોડ કરવામાં આવે છે.

પોલીસ તેના પાઈદળિયાઓ થકી બુકીઓનું કામ ઉતારે છે
શહેરમાં કેટલાય ભ્રષ્ટ અને લાલચુ પોલીસ અધિકારી અને કર્મચારી તેના પાયદળિયાઓને મંજૂરીવાળા ધંધાર્થીઓની યાદી આપી કહે છે કે આ સિવાયના અન્ય બુકી સટ્ટો રમાડતા હોય તેવામાં તમારે સટ્ટો રમવાનો રહેશે અને જીતમાં પોલીસને 60થી 70 ટકા રકમ આપવાની રહેશે અને હાર થાય અને ઉઘરાણી માટે બુકી ફોન કરે તો અમારી પાસે દોડી આવવાનું રહેશે ત્યારબાદ આવા ભ્રષ્ટ પોલીસવાળા પોતાની સત્તાનો દુરુપયોગ કરી ખાખીની બહાદુરી બતાવી બુકીને ફોન કરી ડરાવી, ધમકાવી તું સટ્ટો રમાડશ તારા વિરૂદ્ધ ગુનો નોંધવાનો છે કહી મોટો તોડ કરે છે.