મેઘરાજાએ હળવદમાં ત્રણ, મોરબીમાં અઢી, ટંકારામાં બે અને વાંકાનેરમાં સવા ઈંચ હેત વરસાવ્યું
ખાસ-ખબર સંવાદદાતા
ભાદરવાના પ્રારંભની સાથે જ સમગ્ર ગુજરાતમાં મેઘરાજાની ધમાકેદાર ઈનિંગ ચાલી રહી છે. છેલ્લા બે દિવસથી સૌરાષ્ટ્રના વિવિધ જિલ્લામાં વરસાદ વરસી રહ્યો છે. સોમવારે જિલ્લામાં સાર્વત્રિક વરસાદ પડ્યો હતો અને તેના કારણે ચોમાસુ પાકને નવજીવન મળ્યું છે. મોરબી જીલ્લામાં સોમવારે વરસાદી ઝાપટાંથી લઈ ચાર ઈંચ સુધી વરસાદ નોંધાયો હતો તો બીજા દિવસે પણ મેઘ સવારી યથાવત રહી હતી જેમાં મોરબી જિલ્લાના પાંચેય તાલુકામાં સવારના 6 વાગ્યાથી લઈને બપોરના 12 વાગ્યા સુધીમાં સવા ઈંચથી લઈને પોણા ચાર ઈંચ સુધીનો વરસાદ વરસ્યો હતો જેમાં તાલુકા મુજબ વરસાદ જોઈએ તો, માળીયા મિંયાણામાં પોણા ચાર ઈંચ, હળવદમાં ત્રણ ઈંચ, મોરબીમાં અઢી ઈંચ, ટંકારામાં બે ઈંચ અને વાંકાનેરમાં સવા ઈંચ વરસાદ નોંધાયો હતો.
- Advertisement -
ભારે વરસાદને પગલે નવા બસ સ્ટેન્ડની દિવાલ ધરાશાયી
મોરબીમાં સતત બે દિવસથી વરસી રહેલા વરસાદને પગલે નવા બસ સ્ટેન્ડ પાછળ છાત્રાલય રોડ ઉપર સુપર માર્કેટની બાજુમાં આવેલી દિવાલ ધરાશાયી થતાં મોરબી એસટી વિભાગે તાબડતોબ આ દીવાલના કાટમાળને હટાવીને રાહદારીઓનું જોખમ દૂર કર્યું હતું
કોઝવેના ધસમસતા પાણીના પ્રવાહમાં ટ્રક પલ્ટી મારી ગયો, ચાલકનો બચાવ
મોરબીના જુના ઘુંટુ રોડ ઉપર આવેલ સિમ્પોલો સિરામીકના ગોડાઉન સામેનો કોઝવે ભારે વરસાદને કારણે બે કાંઠે વહેતો હોય આજે કોઝવેના ધસમસતા પાણીના પ્રવાહમાં ટ્રક પલ્ટી મારી ગયો હતો. કોઝવે ઉપરથી પસાર થતી વખતે કેડ સમાણાં પાણીના પ્રવાહમાં ટ્રક તણાયને પલ્ટી મારી ગયો હતો જો કે ટ્રક ચાલકનો આબાદ બચાવ થયો હતો.
મચ્છુ 3 ડેમ ઓવરફ્લો, એક દરવાજો એક ફૂટ ખોલાયો
મોરબી જિલ્લામાં અને ઉપરવાસમાં સતત વરસાદને પગલે મોરબીના સાદુળકા ગામ પાસે આવેલ મચ્છુ-3 ડેમ ઓવરફ્લો થયો હતો જેથી આ ડેમનો એક દરવાજો એક ફૂટ ખોલવામાં આવ્યો છે. આ ડેમમાં 2050 ક્યુસેક પાણીની આવક સામે 939 ક્યુસેક પાણી છોડવામાં આવ્યું છે જેથી ડેમના હેઠવાસમાં આવતા મોરબી અને માળીયા તાલુકાના ગામોને એલર્ટ કરી મચ્છુ નદીના પટ્ટમાં અવરજવર નહીં કરવા સૂચના આપવામાં આવી છે.
