સંરક્ષણ પ્રધાન રાજનાથ સિંહે ટ્વિટર પર પોસ્ટ કર્યું હતું કે ભારતે એક મુખ્ય સંરક્ષણ આયાતકારમાંથી મુખ્ય સંરક્ષણ નિકાસકાર બનવા તરફ એક મહત્વપૂર્ણ પગલું ભર્યું છે, પ્રથમ વખત, ભારતે નાણાકીય વર્ષ 2023-24માં 21,083 કરોડ રૂપિયાની સંરક્ષણ નિકાસ કરી છે.
ખાસ-ખબર ન્યૂઝ નવી દિલ્હી, તા.2
- Advertisement -
દેશની રક્ષા નિકાસમાં પ્રથમ વખત ઝડપથી વધારો થયો છે. સ્વતંત્ર ભારતના ઈતિહાસમાં સંરક્ષણ નિકાસ 21 હજાર કરોડ રૂપિયાના આંકડાને પાર કરી ગઈ છે. રક્ષા મંત્રી રાજનાથ સિંહે ઈન્ટરનેટ મીડિયા પર દેશની મોટી સફળતાની જાહેરાત કરી અને કહ્યું કે ભારતે 84 દેશોને પોતાના સંરક્ષણ ઉત્પાદનો વેચીને આ ચમત્કારિક લક્ષ્યાંક હાંસલ કર્યો છે. આ દિશામાં માત્ર એક નાણાકીય વર્ષમાં 32.5 ટકાનો ઉછાળો આવ્યો છે.
સંરક્ષણ પ્રધાન રાજનાથ સિંહે સોમવારે ટ્વિટર પર પોસ્ટ કર્યું હતું કે ભારતે એક મુખ્ય સંરક્ષણ આયાતકારમાંથી મુખ્ય સંરક્ષણ નિકાસકાર બનવા તરફ એક મહત્વપૂર્ણ પગલું ભર્યું છે. પ્રથમ વખત, ભારતે નાણાકીય વર્ષ 2023-24માં 21,083 કરોડ રૂપિયાની સંરક્ષણ નિકાસ કરી છે. વડા પ્રધાન નરેન્દ્ર મોદીના નેતૃત્વમાં સંરક્ષણ મંત્રાલયે આવા ઘણા પગલાં લીધા જે ફળીભૂત થયા.તેમણે કહ્યું કે સંરક્ષણ નિકાસ વધારવા માટે, ભારતના સંરક્ષણ ઉત્પાદન ક્ષેત્રને માત્ર પ્રોત્સાહન આપવામાં આવ્યું નથી પરંતુ તકનીકી આધુનિકીકરણ માટેની સુવિધાઓ પણ વધારવામાં આવી છે. આનાથી સરકારી અને ખાનગી ક્ષેત્રની કંપનીઓ માટે પ્રોત્સાહક વાતાવરણ ઊભું થયું છે. લગભગ 50 ભારતીય કંપનીઓએ ભારતની સંરક્ષણ નિકાસની આ સફળતાની ગાથાને સફળ બનાવવા માટે મહત્વપૂર્ણ યોગદાન આપ્યું છે. આ કંપનીઓએ નવીનતા, અસરકારકતા અને ગુણવત્તા પર વિશેષ ધ્યાન આપીને ભારતના સંરક્ષણ સાધનો અને ટેક્નોલોજીના વિશ્વસનીય સપ્લાયર તરીકે વિશ્વ મંચ પર પોતાને સ્થાપિત કર્યા છે.
ભારતના સંરક્ષણ નિકાસકારો ભૌગોલિક રીતે વિશ્વના દરેક ખૂણે પહોંચી ગયા છે. દેશની નિકાસ થતી પ્રોડક્ટ્સ ઈટાલી, માલદીવ, શ્રીલંકા, રશિયા, યુએઈ, પોલેન્ડ, ફિલિપાઈન્સ, સાઉદી અરેબિયા, ઈજીપ્ત, ઈઝરાયેલ, સ્પેન, ચિલી અને અન્ય ઘણા દેશોમાં પહોંચી રહી છે. વૈશ્વિક સ્તરે ભારતીય સંરક્ષણ ઉત્પાદનોની માંગ વધી રહી છે.
- Advertisement -
સુરક્ષાના ક્ષેત્રમાં ભારતની ક્ષમતાઓને વૈશ્વિક સ્વીકૃતિ મળી છે. જે ભારતીય સંરક્ષણ ઉત્પાદનોની વધુને વધુ નિકાસ થઈ રહી છે તેમાં પર્સનલ પ્રોટેક્ટીવ ઇક્વિપમેન્ટ, ઓફશોર પેટ્રોલ વ્હીકલ, એએલએચ હેલિકોપ્ટર, એસયુ એવિઓનિક્સ, કોસ્ટલ સર્વેલન્સ સિસ્ટમ, લાઇટ એન્જિનિયરિંગ મિકેનિકલ પાર્ટ્સ, આર્મર ખઘઉ અને અન્ય ઘણા સંરક્ષણ સાધનોનો સમાવેશ થાય છે. આ અત્યાધુનિક સંરક્ષણ સાધનો અને તકનીકોને કારણે આંતરરાષ્ટ્રીય ખરીદદારો ભારતીય ઉત્પાદનોમાં વિશેષ રસ ધરાવે છે.
