જૂનાગઢ તાલુકાના તોરણીયા ગામે પ્રેમપ્રકરણ મામલે બનેલી ઘટનામાં પોલીસની સફળતા
ફિલ્મી ઢબે અપહરણ અને મારપીટ કરનાર રાજપરાની ટોળકી પોલીસે ઝડપી પાડી
- Advertisement -
ચાલું ગાડીએ મોબાઈલ ઝૂંટવી લઈ માર માર્યો, વાડીમાં ગોંધી રાખી અત્યાચાર ગુજાર્યો
લૂંટ-અપહરણના ગુનામાં પકડાયેલાં આરોપીઓ
1. મિલનભાઇ લખુભાઇ મકવાણા (રહે. રાજપરા, તા. વિસાવદર)
- Advertisement -
2. સંજયભાઇ બાવકુભાઇ મકવાણા (રહે. રાજપરા, તા. વિસાવદર)
3. નિકુંજભાઇ દેવાયતભાઇ વાસીયા (રહે. રાજપરા, તા. વિસાવદર)
4. જમાલભાઇ અબુભાઇ સંધાર (રહે. રાજપરા, તા. વિસાવદર)
5. જયદીપભાઇ ઉર્ફે ભોલો લખુભાઇ મકવાણા (રહે. રાજપરા, તા. વિસાવદર)
ખાસ-ખબર ન્યૂઝ જૂનાગઢ, તા.9
જૂનાગઢ રેન્જના પોલીસ મહાનિરીક્ષક નિલેશ જાજડીયા તેમજ પોલીસ અધિક્ષક સુબોધ ઓડેદરા દ્વારા જિલ્લામાં કાયદો અને વ્યવસ્થાની સ્થિતિ જાળવવા અને ગુનાખોરી ડામવા આપવામાં આવેલી કડક સૂચનાઓ અન્વયે જૂનાગઢ તાલુકા પોલીસે એક સનસનાટીભર્યા અપહરણ અને લૂંટના ગુનાનો ભેદ ગણતરીની કલાકોમાં ઉકેલી નાખ્યો છે. તોરણીયા ગામેથી પિતા-પુત્રનું અપહરણ કરી, તેમને નિર્દયતાથી માર મારી લૂંટ ચલાવનાર પાંચ આરોપીઓને પોલીસે ઇકો ગાડી સાથે દબોચી લીધા છે. આ કેસની પોલીસ વિગત મુજબ આ ગુનાના મુખ્ય આરોપી મિલન લખુભાઇ મકવાણા રહે. રાજપરા, તા. વિસાવદરની સગાઈ જૂનાગઢ તાલુકાના તોરણીયા ગામે થયેલી છે. આરોપી મિલનને શંકા હતી કે ફરિયાદીનો દીકરો સંજય ધાંધુકીયા તેની મંગેતર (જેની સાથે સગાઈ થઈ છે તે છોકરી) સાથે વાતો કરે છે. આ પ્રેમપ્રકરણની શંકા અને તે બાબતના મનદુખને રાખીને આરોપીઓએ પૂર્વ આયોજિત કાવતરું ઘડ્યું હતું. ગત તારીખ 05/03/2026ના રોજ રાત્રિના સમયે આરોપીઓ એક સફેદ રંગની ઇકો ગાડી નંબર જીજે 38 ડિઈ 3581 લઈને તોરણીયા ગામે પહોંચ્યા હતા. ત્યાંથી ફરિયાદી અને તેના પુત્ર સંજયભાઈનું બળજબરીપૂર્વક ઇકો ગાડીમાં અપહરણ કરવામાં આવ્યું હતું. ચાલુ ગાડીએ આરોપીઓએ પિતા-પુત્રને ઢીકાપાટુનો ઢોર માર મારવાનું શરૂ કર્યું હતું. બિલખાથી આગળ વિરપુર ગામ પાસે પહોંચતા આરોપીઓએ સંજયનો મોબાઈલ ફોન ઝૂંટવી લીધો હતો અને ચાલુ ગાડીએ તેને રોડ ઉપર ફેંકી દીધો હતો. ત્યારબાદ ફરિયાદીના મોબાઈલ ફોનની પણ લૂંટ ચલાવી હતી. આરોપીઓ તેમને વિસાવદર પાસે આવેલા રાજપરા ગામની સીમમાં એક વાડી વિસ્તારમાં લઈ ગયા હતા. ત્યાં અંધારાનો લાભ લઈ એક કલાક સુધી પિતા-પુત્રને બંધક બનાવી રાખ્યા હતા અને આડેધડ માર માર્યો હતો. અત્યાચાર આટલેથી જ ન અટકતા, આરોપીઓ તેમને ફરીથી રાજપરાથી તોરણીયા લાવ્યા અને રસ્તામાં વિજાપુરના પાટીયા પાસે આવેલી દેવાંગી હોટલ નજીક ઉતારીને ફરીથી સંજયને બેરહેમીથી માર માર્યો હતો. અંતે પિતા-પુત્રને તોરણીયા ગામે ઉતારી આરોપીઓ નાસી છૂટ્યા હતા. આ અંગેની ફરિયાદ જૂનાગઢ તાલુકા પોલીસ મથકમાં નોંધાતા પોલીસે વિવિધ કલમો હેઠળ ગુનો રજીસ્ટર કર્યો હતો. જૂનાગઢ ગ્રામ્ય ડિવિઝનના ઇન્ચાર્જ નાયબ પોલીસ અધિક્ષક રવિરાજસિંહ પરમારના સીધા માર્ગદર્શન હેઠળ જૂનાગઢ તાલુકા પોલીસ ઇન્સ્પેક્ટર એફ.બી. ગગનીયા અને તેમની ટીમે તપાસના ચક્રો ગતિમાન કર્યા હતા. પોલીસે બનાવ વાળી જગ્યાના સીસીટીવી ફૂટેજ ચકાસ્યા હતા અને હ્યુમન સોર્સ (બાતમીદારો)ને કામે લગાડ્યા હતા. ટેકનિકલ સર્વેલન્સ અને બાતમીના આધારે પોલીસે ગણતરીની કલાકોમાં જ ગુનામાં વપરાયેલી ઇકો ગાડી શોધી કાઢી હતી અને રાજપરા ગામના પાંચેય આરોપીઓને ઝડપી પાડ્યા હતા. આ કામગીરીમાં તાલુકા પોલીસ ઇન્સ્પેક્ટર એફ.બી. ગગણીયાની સાથે એ.એસ.આઇ. નિલેશભાઇ ભેટારીયા, પો.હેડ કોન્સ. દેવેનભાઇ ચાવડા, ભનુભાઈ ઓડેદરા, પો.કોન્સ. રમેશભાઇ કરંગીયા, ચિરાગભાઈ બારૂ, ગોવિંદભાઇ પરમાર, વિપુલભાઇ બોરીચા અને કરશનભાઈ ભારાઈ સહિતના સ્ટાફે જહેમત ઉઠાવી હતી. જૂનાગઢ પોલીસે આ ગંભીર ગુનાના આરોપીઓને ઝડપી પાડી સમાજમાં કાયદાનો ડર પેદા કર્યો છે અને ભોગ બનનાર પરિવારને ન્યાય અપાવવાની દિશામાં મજબૂત કાર્યવાહી કરી છે.
