સરધાર અને ત્રંબામાં PGVCLની વીજચેકિંગ ડ્રાઈવમાં 18.35 લાખની વીજચોરી પકડાઈ
ખાસ-ખબર સંવાદદાતા
રાજકોટ સહિત સૌરાષ્ટ્ર-કચ્છના ગ્રામ્ય વિસ્તારોમાં સતત વીજચેકિંગ ચાલુ છે અને કાયદાનો ડર ન હોય તેમ બેફામ બનેલા વીજચોરો સામે તંત્ર દ્વારા તવાઈ હાથ ધરતા ફફડાટ વ્યાપી જવા પામ્યો છે. વીજચોરીના દુષણથી પીજીવીસીએલને વર્ષે દહાડે કરોડો રૂપિયાનું નુકસાન ભોગવવાનો વારો આવે છે. નિયમિત ગ્રાહકોને ગુણવત્તાયુક્ત અને સાતત્યપૂર્ણ વીજપુરવઠો પૂરી પાડવાની કટિબદ્ધતા આડે આવા વીજચોરો અંતરાય બનીને ઊભા રહી જાય છે. પરિણામે વીજતંત્રને તેની રોજિંદી કામગીરી ઉપરાંત આવા તત્ત્વો સામે ઝઝૂમવામાં સમય આપવો પડે છે. સરવાળે, નિયમિત ગ્રાહકોને પણ ક્યારેક તેમના કામોમાં સમયનો વિલંબ થતો હોવાનું અનુભવાયા વગર રહેતું નથી. વીજચોરીના આ સામાજિક દૂષણને ડામવા પીજીવીસીએલ દ્વારા સતત આકરી કામગીરી કરવામાં આવી રહી છે. એટલું જ નહિ, વધુ વીજલોસ ધરાવતા ફીડરો પર આયોજનબદ્ધ ચેકિંગ કરવામાં આવી રહ્યું છે. આજરોજના મળતા પ્રાથમિક અહેવાલો મુજબ પીજીવીસીએલ તંત્ર દ્વારા રાજકોટ જિલ્લાના ગ્રામ્ય વિસ્તારોમાં સતત ચેકિંગ કરીને વીજચોરીઓ પકડી પાડવામાં આવી રહી છે. જેના ભાગરૂપે સરધાર અને ત્રંબા પંથકના ગ્રામ્ય વિસ્તારોમાં તા: 31-01-2024માં સઘન વીજચેકિંગ કરી વીજચોરોને રંગેહાથ પકડી લેવામાં આવ્યા હતા. એસ.આર.પી. સ્ટાફ તથા પોલીસ સ્ટાફના ચુસ્ત બંદોબસ્ત હેઠળ પીજીવીસીએલના કાર્યક્ષમ ઈજનેરોની કુલ 35 જેટલી વીજચેકિંગની ટુકડીઓ ત્રાટકી હતી. જેમાં રહેણાંક, વાણિજ્યિક, ખેતીવાડી વગેરે મળીને કુલ 622 જેટલા વીજજોડાણો ચકાસવામાં આવ્યાં હતા, જે પૈકી 76 વીજજોડાણોમાં જુદાજુદા પ્રકારની ગેરરીતિ માલૂમ પડતાં એક જ દિવસમાં કુલ રૂા. 18.35 લાખ રકમની વીજચોરી પકડી પાડવામાં સફળતા પ્રાપ્ત થયેલ છે. ઉલ્લેખનિય છે કે રાજકોટ નજીકના ગ્રામ્ય વિસ્તારો જેવા કે ગોંડલ, વાસાવડ, કોટડાસાંગાણી, સરધાર, આટકોટ, ત્રંબા, ધોરાજી વગેરેમાં જાન્યુઆરી મહિનામાં વીજચેકિંગ કરવામાં આવેલ હતું અને સતત ત્રીજા દિવસે થયેલી ઉપરોક્ત વીજચેકિંગ ડ્રાઈવમાં તંત્રને કાબિલેદાદ સફળતા પ્રાપ્ત થઈ છે તેમજ તેવું પુરવાર કર્યું છે કે વીજતંત્ર વીજચોરીના દૂષણને સમાજમાંથી હટાવવા માટે કટિબદ્ધ છે. વધુમાં જણાવવાનું કે જાન્યુઆરી-2024માં અંદાજે રૂા. 2 કરોડ 55 લાખની વીજચોરી પકડી પાડવામાં તંત્રને સફળતા મળી છે. હવે પકડાયેલ વિજચોરીઓના અંદાજીત દંડનીય આકારણીના બીલો ફટકારવામાં આવશે.
