રાજકોટના એકતાબેન ધકાણને પતિ જયેશ અને તેના ભાગીદાર હિતેષ સાગરે ઢોરમાર માર્યો

એકતાબેન સિનર્જી હોસ્પિટલમાં દાખલ: પતિ, ભાગીદાર વિરૂદ્ધ ફરિયાદ દાખલ

ખાસ-ખબર સંવાદદાતા
રાજકોટના યુનિવર્સિટી રોડ પર શિલ્પન નોવા ફ્લેટમાં રહેતી મહિલાને તેના પતિ અને પતિના ધંધાકીય ભાગીદારે માર મારતા ફરિયાદ નોંધાઈ છે. મળતી વિગત મુજબ શહેરના શિલ્પન નોવા વિંગ-એ-2 ફ્લેટ નં. 102માં રહેતાં એકતાબેન ધકાણ (ઉ.વ.46)એ યુનિવર્સિટી પોલીસ મથકમાં પતિ જયેશ ધકાણ અને તેના ધંધાકીય ભાગીદાર હિતેષ સાગર સામે ફરિયાદ નોંધાવી છે.
એકતાબેને ફરિયાદમાં અને ત્યારબાદ મીડિયા સમક્ષ જણાવ્યું છે કે, તેમણે પોતાના પતિ જયેશ પાસે ઘર ખર્ચના પૈસા માગ્યા હતા ત્યારે તેમના પતિએ કહેલું કે મારી પાસે પૈસા નથી. એ સમયે એકતાબેને પૂછ્યું કે, તમે હિતેષ સાગરના ધંધામાં પૈસાનું રોકાણ કરેલું છે તો તમને હિતેષ સાગર પૈસા આપતા નથી?
એકતાબેનને આટલું પૂછતાં પતિ જયેશે તમને ગાળો દઈ કહેલું કે, તું જાતે જ જઈને હિતેષ સાગરને પૂછી લેજે. આમ, એકતાબેને પોતાની પુત્રવધૂ સાથે બંને કારમાં કર્મચારી સોસાયટી શેરી નં. 3માં ‘આજ્ઞા’ બંગલા ખાતે રહેતો હિતેષ સાગરના ઘરે તપાસ કરવા ગયા હતા. જ્યાં હિતેષ સાગરની પત્નીને મળીને વાત કરેલી કે તમારા પતિના ધંધામાં મારા પતિએ પૈસાનું રોકાણ કર્યું છે તો તમારા પતિ મારા પતિને પૈસા આપે છે કે નહીં, તો તેમની પત્નીએ કહેલું કે મારા પતિ નીચે ઓફીસમાં બેઠા છે રૂબરૂ જ પૂછી લો, તેમ કહેતાં એકતાબેન અને તેમની પુત્રવધૂ અને હિતેષની પત્ની ત્રણેય ઓફીસમાં ગયા હતા.
ત્યાં ઓફીસમાં હિતેષ સાગર અને જયેશ ઘકાણ બંને બેઠા હતા. એકતાબેને હિતેષ સાગરને કહેલું કે તમારા ધંધામાં મારા પતિએ રોકાણ કર્યું છે તો તમે મારા પતિને પૈસા કેમ નથી આપતા? એકતાબેને આમ કહેતાં હિતેષ સાગરે કહેલું કે, તારી શું ઓકાત છે કે તું મારી પાસે પૈસા બાબતે પૂછે છે, મારી ઓફીસમાંથી નીકળી જા.. તેમ કહી હિતેષ સાગરે એકતાબેન અને તેની પુત્રવધૂ બંનેને ગાળો આપવાની શરૂ કરી દીધી હતી.
વધુ બોલાચાલી થતા હિતેષ સાગર ઉશ્કેરાઈ જતા એકતાબેનની સાથે ઝપાઝપી કરી લાફો મારી તેણે ટેબલ નીચેથી પાઈપ લઈ એકતાબેનને માથાના અને વાંસા ભાગે ફટકારી દેતાં ગંભીર ઈજા થઈ હતી. એકતાબેનબે માર મારતા હિતેષ સાગરે કહેલું હતું કે, હવે ફરીથી પૈસા બાબતે મને પૂછવા-લેવા મારા ઘરે કે ઓફીસે આવી તો તને જાનથી મારી નાખીશ. આખીયે ઘટનામાં એકતાબેનને ગંભીર ઈજા થતા તેમને કારમાં સિનર્જી હોસ્પિટલે સારવાર માટે ખસેડાયા હતા.
આરોપીઓ વિરૂદ્ધ આકરી કલમો ઉમેરવા પ્રયાસ થશે
એકતાબેન ધકાણે જણાવ્યા મુજબ આરોપીઓ વિરૂદ્ધ લગાડવામાં આવેલી કલમોથી તેમને સંતોષ નથી. એમનાં પતિ અને ભાગીદારે જે પ્રકારની હિંસા તેમનાં પર આચરી છે તેમાંથી તેમને ખૂબ ઈજા પહોંચી છે. તેથી આરોપીઓ વિરૂદ્ધ આકરી કલમો લગાડવા તેઓ કાનૂની સલાહ લઇ રહ્યાં છે.

ઢોરમાર માર્યા અંગે એકતાબેન ધકાણે હોસ્પિટલ બિછાનેથી સમગ્ર ઘટનાની વર્ણવેલી આપવીતિનો વિડીયો જોવા અહીં ક્લિક કરો…