60 ફૂટના મહાકાય રાવણના પૂતળાનું આજે દહન થશે
લેસર શો-આતશબાજીથી દિવાળી જેવો માહોલ સર્જાશે
ખાસ-ખબર ન્યૂઝ રાજકોટ
- Advertisement -
દર વર્ષે દશેરાના પર્વ નિમિત્તે વર્ષોની પરંપરા મુજબ વિ.હિ.5., બજરંગદળ – દુર્ગાવાહિની દ્વારા વિજયાદશમીની ભાવભેર ઉજવણી કરવામાં આવે છે. આ વર્ષે પણ તા. 12ને શનિવારે રેસકોર્સ મેદાન ખાતે સાંજે 7 કલાકે અનેકવિધ કાર્યક્રમો યોજાશે. આ વર્ષે પૂતળાદહન, શસ્ત્ર પૂજન, આતશબાજી સાથે નવીનતમ લેસર શોનું પણ આયોજન કરવામાં આવ્યું છે. આ વખતે ગુજરાતનો સૌથી ઊંચો 60 ફૂટનો રાક્ષસરૂપી રાવણ તથા અન્ય 30-30 ફૂટ ઊંચા પૂતળા બનાવવામાં આવ્યા છે. આ પૂતળાઓ બનાવવા માટે ખાસ આગ્રાથી તેના સ્પેશિયાલિસ્ટ કારીગરોને રાજકોટ બોલાવવામાં આવ્યા હતા. રાક્ષસ દહન વખતે અવનવા રંગબેરંગી પ્રકારના ફટાકડાઓની આતશબાજીથી કાર્યક્રમ સ્થળે દિવાળી જેવો માહોલ રચાશે.
લેસર શોમાં અદ્યતન લાઈટ એન્ડ સાઉન્ડ ઈફેકટ દ્વારા ધર્મભકિત અને રાષ્ટ્રશકિતનો સમન્વય યોજી ઉપસ્થિત તમામ લોકોને પસંદ પડે તેવો શો યોજાવાનો છે. આ શો જોવા દર વર્ષે વધુને વધુ લોકો જોડાતા જાય છે તેમજ આ શોમાં અનેકવિધ ગીતોનો સમાવેશ કરવામાં આવશે. દર વર્ષે પ્રજાજનો સ્વયંભૂ રીતે જ પૂતળાદહન અને આતશબાજી જોવા માટે ઉમટી પડે છે. આ વર્ષે તેમાં એક નવા નજરાણાનો સમાવેશ કરી લાઈટ એન્ડ સાઉન્ડ પર આધારિત થીમ બેઈઝ લેસર શોનું આયોજન કરવામાં આવ્યું છે. પ્રથમવાર સામાજિક જવાબદારીના ભાગરૂપે એક રક્તદાન શિબિરનું આયોજન કરાયું છે. રક્તદાતાઓ રાક્ષસ દહનના કાર્યક્રમ સ્થળે બનાવવામાં આવેલ એક વિશેષ મંડપમાં રકતદાન કરી શકે તેવી વ્યવસ્થા કરી છે.
તમિલનાડુથી 36 પ્રકારના ફટાકડા મગાવાયા
આ વર્ષે ખાસ તામિલનાડુથી મગાવવામાં આવેલ ફટાકડાની અવનવી વેરાયટીઓ જેવી કે 500 મલ્ટી શોટ, 240 રંગીન ફેન્સી શોટ, 240 રંગીન મલ્ટી મ્યુઝિક શોટ, 100 મ્યુઝિકલ કલર શોટ, 100 મલ્ટી મ્યુઝિકલ કલર શોટ, 100 કલરફુલ શોટ, 50 મ્યુઝિકલ ફેન્સી કલર શોટ, 50 ફેન્સી સાયરિંગ મ્યુઝિક શોટ તેમજ 2500 ફૂટ ઉપર ફૂટી શકે એવા હેવી શોટ જેમાં મીરચી હેવી શોટ, લીંબાગીડી, સ્કાય ફલોર, કેપેસીનો, ગોલ્ડ સ્ટાર, બઝી મ્યુઝીક, ગોલ્ડ રસ, કલરપીન જોર ડ્યુલક્સ, લક્કી ડ્રોસ, ગ્રાન્ડ માસ્ટર, રેડ રીવેરીય, ક્રિસ્ટોન હેવી શોટ સહિતના 36 પ્રકારના ફટાકડા મગાવ્યા છે. આતશબાજી જોઈને બાળકો -મોટેરા તમામ આનંદિત થઈને ઝુમી ઉઠશે.
