તડકામાંથી આવીને તરત ફ્રીજનું પાણી ના પીશો: હાઇડ્રેટેડ રહેવા ઓછામાં ઓછુ આટલા ગ્લાસ પાણી પીવો

હાઇડ્રેટેડ રહેવા માટે ઓછામાં ઓછું 10 ગ્લાસ પાણી પીવું જરૂરી છે. ગરમીમાં લોકો ફ્રીજનું પાણી પીવે છે પણ પાણી પીતી વખતે તેનું તાપમાન યોગ્ય હોવું પણ જરૂરી છે.

ગરમીની સિઝનમાં લોકો ઠંડું પાણી પીવાનું વધુ પસંદ કરે છે. ઠંડું પાણી ગરમીથી રાહત તો આપે છે, પરંતુ તેનાથી નુકસાન પણ એટલું જ થાય છે. ગરમીમાં હાઇડ્રેટ રહેવા માટે લોકો લિક્વિડનું સેવન વધુને વધુ કરે છે. લોકો પાણીની સાથે લસ્સી, જ્યુસ, નારિયેળ પાણી સહિતના ડ્રિંક્સનું સેવન કરે છે. હાઇડ્રેટેડ રહેવા માટે કમસે કમ ૧૦ ગ્લાસ પાણી પીવું જરૂરી છે.

ગરમીમાં લોકો ફ્રીજનું પાણી પીવાનું વધુ પસંદ કરે છે, પરંતુ પાણી પીતી વખતે તેનું તાપમાન યોગ્ય હોવું પણ જરૂરી છે. પાણીનાં તાપમાનની અસર શરીર પર પણ થાય છે. થાક દૂર કરવા માટે લોકો ઠંડું પાણી પી તો લે છે અને તે ગરમીમાંથી રાહત પણ આપી દે છે, પરંતુ તેનું નુકસાન પણ એટલું જ છે. આયુર્વેદમાં ઠંડા પાણીને આરોગ્ય માટે નુકસાનકારક માનવામાં આવ્યુ છે. ખાસ કરીને ફ્રીજનું ચિલ્ડ વોટર બિલકુલ ન પીવુ જોઇએ. ખાસ કરીને તડકામાંથી આવીને, એક્સર્સાઇઝ કર્યા બાદ અથવા જમ્યા બાદ ઠંડુ પાણી અવોઇડ કરવું જોઇએ.

પાચન પર પડે છે પ્રભાવ
શરીર કોઇ પણ પદાર્થને પોતાના તાપમાન પર લાવે છે અને તેને પાચન માટે આગળ મોકલે છે, પરંતુ બહુ ઓછા તાપમાનની વસ્તુઓનું સેવન કરવાથી તેને પોતાના તાપમાન મુજબ કરવામાં શરીરને વાર લાગે છે અને તેના કારણે ડાઈજેશનની પ્રક્રિયા ધીમી થઇ જાય છે. પેટમાં ઠંડુ પાણી ડાઇજેશનને પ્રભાવિત કરે છે.

ગળામાં દુખાવો
ઘણી વખત ગળું ખરાબ થવા પર કે અવાજ બદલાવા પર વડીલો કહેતા હોય છે કે ઠંડું પાણી પીતા હશો. ઠંડા પાણીના લીધે ગળામાં ખરાશ થઇ જાય છે. ફ્રીજમાંથી કાઢીને ઠંડું પાણી પીવાના લીધે આવી સમસ્યાઓ થતી રહે છે. ભોજન બાદ પણ તમે ઠંડું પાણી પી લેશો તો કફ જેવું લાગશે અને શ્વાસ લેવાનો રસ્તો બ્લોક થઇ શકે છે. તાવ કે શરદી પણ થઇ શકે છે.

હાર્ટ રેટ પર અસર
ઠંડા પાણીના સેવનથી તમારા શરીરનો હાર્ટ રેટ ઘટી જાય છે. એક અભ્યાસ મુજબ ફ્રીજનું વધુ ઠંડું પાણી પીવાથી વેગસ નર્વ સ્ટિમ્યુલેટ થઇ જાય છે. શરીરની સાથે અનૈચ્છિક કાર્યોને નિયંત્રિત કરવાનું કામ નર્વ કરે છે. ઓછા તાપમાનના પાણીની અસર સીધી વેગર નર્વ પર થાય છે, તેનાથી હાર્ટ રેટ પણ ઘટે છે.

માથાના દુઃખાવાની સમસ્યા
તડકામાંથી તરત આવીને તમે બહુ ઠંડું કે બરફનું પાણી પી લેશો તો બ્રેઇન ફ્રીજ થઇ શકે છે. ઠંડાં પાણીનાં સેવનથી તમારી નસો પણ ઠંડી થઇ શકે છે. તેની અસર મગજ પર થાય છે અને માથાનો દુખાવો થવા લાગે છે. સાઇનસની સમસ્યાથી ગ્રસિત લોકો માટે આ સ્થિતિ મુસીબત વધારી શકે છે.

વેઇટ લોસમાં પણ મુસીબત
જે લોકો પોતાનું વજન ઘટાડવા ઇચ્છતા હોય તેમણે ઠંડાં પાણીનું સેવન ન કરવું જોઇએ. ઠંડાં પાણીના કારણે શરીરમાં રહેલી ફેટ બર્ન થવામાં સમસ્યા સર્જાય છે. ફ્રીજનાં પાણીથી શરીરની ફેટ સખત થઇ જાય છે, જેના કારણે ચરબી ઘટવામાં સમસ્યા આવે છે અને વજન ઘટતું નથી.