ક્રાઈમ, સસ્પેન્સ ડ્રામાથી ભરપૂર ફિલ્મ ’31 St તા. 20 ડિસેમ્બરના સિનેમાઘરોમાં થશે રિલીઝ

‘ખાસ-ખબર’ની મુલાકાત લેતાં 31St મૂવીના સ્ટાર કાસ્ટ

‘31St” ફિલ્મ એવી છોકરી કે જેની પીડા માત્ર એક વાર્તા નથી પણ એક ખરાબ સ્વપ્ન જેવું છે

આજે રાત્રે બાલભવન ખાતેથી અમદાવાદના બીજલ જોષી દુષ્કર્મ પ્રકરણ અનુસંધાને રેપિસ્ટો વિરૂદ્ધ રેલી યોજાશે

ખાસ-ખબર ન્યૂઝ રાજકોટ, તા.16
ડર અને ક્રૂરતા, સસ્પેન્સથી ભરપૂર ફિલ્મ ’31St કે જે સમાજને એક સંદેશો આપશે. ’31St ફિલ્મ તા. 20 ડિસેમ્બરના રોજ શહેરના સિનેમા ઘરોમાં રિલીઝ થવા જઈ રહી છે. ’31St ફિલ્મમાં એક એવી છોકરી કે જેની પીડા માત્ર એક વાર્તા નથી પણ એક ખરાબ સપના જેવું છે. આ ફિલ્મ 2003માં અમદાવાદના બીજલ જોષી દુષ્કર્મ પ્રકરણ અનુસંધાને બનાવવામાં આવી છે. એ જ અનુસંધાને આજરોજ રેસકોર્સ બાલભવનથી અંડરબ્રિજ સુધી રેપિસ્ટો વિરુદ્ધ એક રેલી કાઢવામાં આવશે. આ રેલીમાં ’31St મૂવીના સ્ટાર કાસ્ટ હિતુ કનોડીયા, હેમાંગ દવે, પરીકિષિત તમાલીયા અને પ્રાચી ઠાકર સહિતના જોડાશે અને સમાજને એક મેસેજ આપશે. આજરોજ ‘ખાસ-ખબર’ની મુલાકાતે ’31St મૂવીના સ્ટાર કાસ્ટ આવ્યા હતા. આ તકે મૂવી અંગેની ચર્ચા પણ કરી હતી. જેમાં જણાવ્યું હતું કે 31 ડિસેમ્બરની રાત બધા માટે ન્યુ યર સેલિબ્રેશનનો બહુમૂલ્ય મોકો હોય છે.

આખી દુનિયા મ્યુઝિકના તાલે થરકીને જ્યારે નવા વર્ષનું સ્વાગત કરતી હોય ત્યારે અમદાવાદમાં એક હોટલના રૂમમાં એક યુવતીનો એના જ બોયફ્રેન્ડ અને અન્ય મિત્રો દ્વારા ગેંગરેપ થયો હોવાનો આરોપ લગાવવામાં આવે છે. આરોપીઓ ઘણા વગવાળા ફેમિલીથી આવતા હોવાથી શરૂઆતમાં આ કેસને રફેદફે કરવા પોલીસ પ્રશાસન દ્વારા પીડિતા તેમજ એની મોટી બહેનને કેસ ડ્રોપ કરવા માટે ધાકધમકી અને જરૂર પડે ત્યારે પ્રલોભનો આપવામાં આવે છે. ન્યાય મળવાની આશા ધૂંધળી દેખાતા ઘટના થયાના એક અઠવાડિયા પછી પીડિતા આત્મહત્યા કરી લે છે છતાં પણ પીડિતાની મોટી બહેન હિંમત દાખવી એકલા હાથે આરોપીઓને કોર્ટમાં લલકારે છે અને પોતાની બહેનને ન્યાય આપવાની પૂરજોર કોશિશ કરે છે. એની આ હિંમતને તોડવા માટે આરોપીઓના વકીલો તરફથી પીડિતા અને એની બહેન ઉપર વ્યભિચારી અને પૈસાની લાલચી હોવાના લાંછન પણ ખુલ્લેઆમ લગાવવામાં આવે છે.

આ બધા અવરોધો છતાં શું મોટી બહેન મૃતક પીડિતાને ન્યાય અપાવી શકશે? ક્રાઈમ, સસ્પેન્સ, પોલીસ ઈન્વેસ્ટીગેશન તેમજ કોર્ટ રૂમ ડ્રામાથી ભરપૂર ગુજરાતી ફિલ્મ ’31St આપના નજીકના સિનેમા ઘરોમાં 20 ડિસેમ્બરના રોજ રિલીઝ થવા જઈ રહી છે. આ ફિલ્મના નિર્માતા ભૌમિક પટેલ, જયેશ પટેલ તેમજ જયેશ પરમાર છે. આ ફિલ્મના લેખક તથા દિગ્દર્શક પ્રણવ પટેલ છે. આ ફિલ્મ ક્લાઉન્ડલેન્ડ એન્ટરટેનમેન્ટના બેનર હેઠળ બનાવવામાં આવી છે. આ ફિલ્મમાં ગુજરાતી સિનેમા જગતના ખ્યાતનામ એકટર હિતુ કનોડીયા તેમજ નેશનલ એવોર્ડ વિનર શ્રદ્ધા ડાંગર મુખ્ય ભૂમિકામાં છે. આ સાથે પરીક્ષિત તમાલીયા, પ્રાચી ઠાકર, ચેતન દૈયા, વિપુલ વિઠલાણી, હેમાંગ દવે અને અન્ય કલાકાર મિત્રોએ પણ અભિનય આપ્યો છે તો નજીકના સિનેમા ઘરોમાં તા. 20 ડિસેમ્બરના જોવાનું ચૂકશો નહીં ફિલ્મ 31St.