‘સંજલા હવે તારૂ આવી બન્યું છે, તારા ખોડલધામને કહેજે તને બચાવી લે કહી’ ધમકી આપી હતી સરદારધામના ઉપપ્રમુખએ કાંઠલો પકડી પીઆઇને લાત મારી હતી
ખાસ-ખબર ન્યૂઝ રાજકોટ
રાજકોટના પૂર્વ કોર્પોરેટર અને સરદારધામના ઉપપ્રમુખ તેમજ ખોડલધામના ટ્રસ્ટી જયંતિ સરધારા પર પીઆઇ પાદરીયાએ હુમલો કર્યાના કેસમાં હવે સરધારાની મુશ્કેલીમાં વધારો થયો છે. કારણ કે પીઆઇ પાદરીયાએ જયંતિ સરધારા સામે રાજકોટ તાલુકા પોલીસ સ્ટેશનમાં ફરિયાદ નોંધાવી છે. સરધારા દ્વારા ખોડલધામ સંસ્થાને ગાળો આપી પોલીસવાળા બધા ચોર છે, પૈસા ખાયને માલદાર થઈ ગયા છે તેવા ખોટા આક્ષેપો કરતા ધાર્મિક સંસ્થા અને પોલીસ ડિપાર્ટમેન્ટ વિશે ન બોલવા કહેતા ઉશ્કેરાઈ મારો કાંઠલો પકડી લાત મારી હતી. હાલ પીઆઇ પાદરીયાની ફરિયાદ પરથી જયંતિ સરધારા સામે ગુનો નોંધી તાલુકા પોલીસે વધુ તપાસ હાથ ધરી છે.
પીઆઇ સંજય પાદરીયાએ ફરિયાદમાં જણાવ્યું હતું કે, હથિયારી પોલીસ ઈન્સપેકટર તરીકે જૂનાગઢ જિલ્લાના ચોકી (સોરઠ) ખાતે ફરજ બજાવું છું. ગઈ તા.25/11/2024ના રોજ લગ્ન પ્રસંગે કણકોટ રોડ ઉપર આવેલા શ્યામ પાર્ટી પ્લોટમાં ગયો હતો.
- Advertisement -
ત્યારે રાત્રિના જયંતિભાઈ સરધારા મને મળ્યા હતા અને મારી સાથે ઉભા હતા, સરધારા સામાન્ય વાતચીતમાં જ ઉશકેરાઇ ગયા અને ખોડલધામ વિશે ખરાબ બોલવાનું ચાલુ કર્યું અને ખોડલધામમાં બધા ચોર જ છે અને ખોડલધામ સંસ્થાને ગાળો દેવા લાગ્યા હતા તેથી મેં તેમને કોઈની ધાર્મિક લાગણી દુભાય તેવુ ન બોલે તેમ સમજાવતા તે વધુ ઉશ્કેરાય ગયા અને પોલીસવાળા બધા ચોર છે, પૈસા ખાય છે અને માલદાર થઈ ગયા છે તેવું પોલીસ ડિપાર્ટમેન્ટ વિશે બોલવા લાગ્યા હતા તેમને સમજાવતા તે વધુ ઉશ્કેરાઈ ગયા હતા અને મારો કાઠલો પકડી મને ધક્કો મારી અને પાટા પણ માર્યા હતા જેથી હું તરત જ ત્યાંથી ચાલ્યો ગયો હતો ત્યાર બાદ હું ચાલીને પાર્ટી પ્લોટના પાર્કિંગમાં જતો હતો, ત્યારે જયંતિભાઈ પોતાની ગાડી લઈને ત્યાંથી પસાર થતા હતા અને મને જોઈને ઉભા રહ્યા અને મને ગાળો દેવા લાગ્યા હતા તેમજ ખોડલધામમાં બધા ચોર જ છે તથા તારા પોલીસ ડિપાર્ટમેન્ટવાળા કટકી બાજો અને લુટારા છે તેમ કહી ગાળો આપી મારી સાથે ઝપાઝપી કરવા લાગ્યા હતા તેવામાં જયંતિભાઈએ પહેરેલા રૂદ્રાક્ષની માળા તેમને જ લાગી ગઈ હતી તેઓએ મને ખોટી રીતે ફસાવવા જાતે માથા ઉપર ઈજા કરી હોવાનો ખોટો આક્ષેપ અને ફરિયાદ હોય તેવું મારૂ સ્પષ્ટ માનવું છે. તેઓ જાતા જાતા ગાડીમાં બેસતી વખતે સંજલા હવે તારૂ આવી બન્યું છે, તારા ખોડલધામને કહેજે તને બચાવી લે અને હવે તારૂ મોત નિપજાવીને જ હું શાંતિથી બેસીશ તેમ કહી જતા રહ્યા હતા બનાવના દિવસે સંસ્થાનું નામ બદનામ ન થાય તેથી મેં ફરિયાદ કરવાનું ટાળ્યું હતું પરંતુ જયંતિભાઈએ મારા વિરૂધ્ધ તદ્દન ઉપજાવી કાઢેલી અને ખોટી ફરિયાદ આપી હતી મારી સામે ખોટી ફરિયાદ કરવા સબંધે સરધારાએ અન્યો સાથે મળી ગુનાહીત કાવતરૂ કર્યું હોવાનું મારૂ માનવું છે. હાલ રાજકોટ તાલુકા પોલીસે જયંતિ સરધારા વિરૂદ્ધ ભારતીય ન્યાય સહીતાની કલમ-299, 115(2), 351(3), 352, 61 મુજબ ફરિયાદ નોંધી વધુ તપાસ હાથ
ધરી છે.
જયંતિ સરધારાએ DGP પાસે પોલીસ રક્ષણ માગ્યું
રાજકોટના પૂર્વ કોર્પોરેટર અને સરદારધામના ઉપપ્રમુખ જયંતિ સરધારાને પી.આઈ. પાદરીયાએ મારી નાખવાની ધમકી આપતાં જયંતિ સરધારાએ ગાંધીનગર ઉૠઙ પાસે પોલીસ રક્ષણ આપવાની અરજી કરી છે. અરજીમાં જયંતિ સરધારાએ જણાવ્યું કે સંજય પાદરીયાએ અમને જાનથી મારી નાખવાની પૂરેપૂરી તૈયારી કરી લીધી છે. અમને કોઈપણ સંજોગોમાં જીવતા નહીં રહેવા દે તેવું આરોપી પાદરીયા લોકોને જણાવી રહ્યા છે. માથાભારે સંજય પાદરીયાથી અમારા જીવને પૂરેપૂરું જોખમ છે અને અમે દહેશતમાં જીવી રહ્યા છીએ જેથી તાત્કાલિક પોલીસ રક્ષણ આપવાની માંગ કરવામાં આવી છે.
