કાશ્મીર સરકારમાં કોંગ્રેસ હિસ્સો નથી : ઓમર અબ્દુલ્લા

કોંગ્રેસનું બહારથી સમર્થન છે : કલમ 370 વિશે વલણ સ્પષ્ટ
જમ્મુ-કાશ્મીરના મુખ્યમંત્રી ઓમર અબ્દુલ્લાએ સ્પષ્ટતા કરી હતી કે કોંગ્રેસ તેમની સરકારનો ભાગ નથી. આ વર્ષના મધ્યમાં યોજાયેલી જમ્મુ અને કાશ્મીર વિધાનસભાની ચૂંટણીમાં નેશનલ કોન્ફરન્સ અને કોંગ્રેસ ગઠબંધન કરીને લડ્યા હતા. ચૂંટણીમાં નેશનલ કોન્ફરન્સને સંપૂર્ણ બહુમતી મળી અને ઓમર અબ્દુલ્લાના નેતૃત્વમાં સરકાર રચાઈ હતી. પૂર્ણ રાજ્યનો દરજ્જો અને કલમ 370 પાછી ખેંચવા અંગે નેશનલ કોન્ફરન્સના ચૂંટણી વચન વિશે પૂછવામાં આવતા તેમણે કહ્યું, ‘પહેલા દિવસથી જ અમે જમ્મુ અને કાશ્મીરને રાજ્યનો દરજ્જો પાછો મેળવવાનો પ્રયાસ કરી રહ્યા છીએ. એવી કેટલીક બાબતો છે (કલમ 370ના સંદર્ભમાં) જે લોકો ઇચ્છે છે, પરંતુ અમે તેને પૂર્ણ કરી શકતા નથી. કારણ કે જમ્મુ-કાશ્મીર એક કેન્દ્રશાસિત પ્રદેશ છે.

તાજેતરમાં, નેશનલ કોન્ફરન્સે જમ્મુ અને કાશ્મીર વિધાનસભામાં એક ઠરાવ લાવ્યો હતો, જેમાં ‘વિશેષ દરજ્જો (કલમ 370) અને બંધારણીય ગેરંટી’ની પુન:સ્થાપનાની માંગણી કરવામાં આવી હતી. જ્યારે આ અંગે કોંગ્રેસના સ્ટેન્ડ વિશે પૂછવામાં આવ્યું ત્યારે સીએમ અબ્દુલ્લાએ કહ્યું, ‘અમારી સરકાર જમ્મુ-કાશ્મીર વિધાનસભામાં આ પ્રસ્તાવ લાવી છે અને ભાજપ સિવાય, કોંગ્રેસ સહિત મોટા ભાગના પક્ષોના ધારાસભ્યોએ તેનું સમર્થન કર્યું છે.

મહત્વની વાત એ છે કે દરખાસ્ત પસાર કરવામાં આવી હતી. એક દરવાજો ખુલ્યો છે. કોંગ્રેસ અમારી સરકારનો ભાગ નથી, તે અમને બહારથી સમર્થન આપી રહી છે.