પાર્કિંગના નામે પૈસા ખંખેરવા RK પ્રાઈમ-2ના બિલ્ડરની ડાયરી સિસ્ટમ

 ટેરેસ પાર્કિંગના નામે પણ બિલ્ડરોએ ઓફિસ ધારકોને છેતર્યા, વાહન લઈ જવા માટેની વ્હીક્યુલર લિફ્ટ પણ ન આપી

ખાસ-ખબર સંવાદદાતા
રાજકોટના પોશ એરીયા ગણાતા 150 ફૂટ રીંગ રોડના મહાપૂજાધામ ચોક આવેલા આર. કે. પ્રાઈમ-2ના ઓફીસ ધારકો સાથે બિલ્ડરોએ પાર્કિંગના નામે પૈસા ઉઘરાવતા હોવાનુ સામે આવ્યું છે. રેરા અને મહાનગરપાલિકાના નિયમો મુજબ બિલ્ડરો પાર્કિંગના પૈસા ઉઘરાવી શકતા નથી. જ્યારે આર. કે. પ્રાઈમ-2ના બિલ્ડરોએ પાર્કિંગના નામે ઓફિસ ધારકો પાસેથી અઢી લાખ ઉઘરાવ્યાનું સામે આવ્યું છે. જ્યારે બિલ્ડરોએ પાર્કિંગના પૈસા ઉઘરાવવા માટે હપ્તાની સિસ્ટમ પણ ગોઠવી આપી છે. જો કોઈ ઓફિસ ધારક એક સાથે અઢી લાખ રૂપિયા આપી ન શકે તો તેના માટે ડાયરી સિસ્ટમ ગોઠવવામાં આવી છે અને તે પણ કાચી ડાયરી. ઓફિસ ધારકોએ બિલ્ડર પર એવા પણ આક્ષેપ કર્યા છે કે, જેટલી રકમ લીધેલી હોય તેનાથી ઓછી રકમ ડાયરીમાં લખવામાં આવે છે. જેમકે, 50 હજાર રૂપિયા આપ્યા હોય તો ડાયરીમાં 500 જ લખે છે. જ્યારે આ ડાયરી આર. કે. પ્રાઈમ-2ના સર્વાનંદ સોનવાણીના ભત્રીજા ગૌરવ સોનવાણી પાસે હોય છે અને તે વહીવટ ચલાવે છે.

આર.કે. પ્રાઈમના બિલ્ડરો સરેઆમ ટાઉન પ્લાનિંગના નિયમોનો ઉલાળિયો કર્યો છે. આર. કે. પ્રાઈમ-2ના પ્લાન મુજબ પાર્કિંગ ટેરેસ પર પણ દર્શાવ્યું છે. પરંતુ હકીકતમાં ટેરેસ પર પાર્કિંગ કરવામાં આવ્યું નથી. ઓફિસ ધારકોની રજૂઆત મુજબ બેઝમેન્ટ-1ના ઓફિસ ધારકો પાસેથી બિલ્ડરોએ રૂ.2,50,000 રૂપિયાની માંગ કરી છે જ્યારે કેટલાક ઓફિસ ધારકોએ આપ્યા છે જ્યારે કેટલાકને ડાયરી કરી આપી છે.

બિલ્ડરના ભત્રીજાએ હપ્તેથી પાર્કિંગના પૈસા ઉઘરાવ્યા, વધુ રૂપિયા લઈ ડાયરીમાં ઓછા રૂપિયાની એન્ટ્રી પાડી!

ગૌરવ સોનવાણી અને એક ઑફિસ ધારકની ઑડિયો ક્લિપ વાયરલ
પાર્કિંગના પૈસા ઉઘરાવવા માટે ગૌરવ સોનવાણીએ હપ્તા ઉઘરાવવા માટે ડાયરી સિસ્ટમ કરી છે. જેની એક ઓડિયો ક્લિપ પણ વાયરલ થઈ છે. જેમાં સ્પષ્ટપણે માલૂમ પડે છે કે, પાર્કિંગના નામે બિલ્ડરો ઓફિસ ધારક પાસેથી પાર્કિંગનો ચાર્જ ઉઘરાવે છે.

ડાયરી નષ્ટ કરવા બિલ્ડરની સલાહ
ઓફિસ ધારકે બિલ્ડર પર એવો આક્ષેપ કર્યો હતો કે, દર મહિને પૈસા ઉઘરાવ્યા બાદ આ ડાયરીને નષ્ટ કરવાની સલાહ પણ આપી હતી. જ્યારે આ સમગ્ર મામલો બહાર આવતા અન્ય ઓફિસ ધારકોએ પણ પાર્કિંગના પૈસા આપવાની ના પાડી હતી.

ટી.પી. શાખાના અધિકારી એમ.ડી. સાગઠિયાનો ઉડાઉ જવાબ

પાર્કિંગ મુદ્દે રાજકોટ મહાનગરપાલિકાના ટાઉન પ્લાનિંગ શાખાના અધિકારી એમ.ડી. સાગઠિયા સાથે વાત કરતા ઉડાઉ જવાબ આપ્યો હતો કે, જે તે સમયે પ્લાન પાસ કરવા સમયે એકસ્ટ્રા બતાવ્યો હોય તેથી કમ્પ્લીશન સર્ટિફિકેટ મળી ગયું હોય જ્યારે તમારે તપાસ કરવી હોય તો અમારા આસિસ્ટન્ટ સાથે આવીને સ્થળ તપાસ પણ કરશે.