ભાજપે ગુજરાત પ્રદેશ પ્રમુખ અને રાષ્ટ્રીય પરિષદના સભ્યો માટે ચૂંટણી પ્રક્રિયાની જાહેરાત કરી

ગુજરાત ભાજપના નવા પ્રમુખ કોણ તે અટકળોની અંત નજીક છે. કારણકે ગુજરાત ભાજપને પ્રમુખની પસંદગી માટેની પ્રક્રિયા શરૂ કરી દીધી છે. આવતીકાલે 3 ઓક્ટોબરના રોજ ગુજરાત રાજ્યના પ્રદેશ પ્રમુખ અને રાષ્ટ્રીય પરિષદના સભ્યોની ચૂંટણીની પ્રક્રિયા કરવામાં આવશે. સવારે 11:00 વાગ્યાથી 2:00 વાગ્યા સુધી ફોર્મ સ્વીકારવાની પ્રક્રિયા થશે. બપોરે 3:00 વાગ્યાથી 4:00 વાગ્યા સુધી ફોર્મ ચકાસણીની પ્રક્રિયા હાથ ધરવામાં આવશે અને સાંજે 5 વાગ્યાથી 5:30 વાગ્યા સુધી ફોર્મ પરત ખેંચવાની પ્રક્રિયા કરવામાં આવશે.

4 ઓક્ટોબરના રોજ સવારે 10થી 11 વાગ્યા સુધીમાં મતદાન થશે. મતગણતરી અને પ્રદેશ પ્રમુખની જાહેરાત 12 વાગ્યાની આસપાસ કરવામાં આવશે. ભાજપના સૂત્રોમાંથી મળતી માહિતી મુજબ OBC નેતાને પ્રદેશ પ્રમુખ તરીકે નિમણૂક મળી શકે છે. OBC નેતા જગદીશ વિશ્વકર્મા પ્રમુખપદની રેસમાં અગ્રેસર હોવાની રાજકીય વર્તુળોમાં ચર્ચા છે. ઉલ્લેખનીય છે કે પ્રદેશ પ્રમુખની ચૂંટણી માટે યોજાનાર મતદાન પ્રક્રિયામાં કેન્દ્રીય ગૃહ અને સહકારીતા મંત્રી અમિત શાહ, કેન્દ્રીય મંત્રી મનસુખ માંડવિયા, મુખ્યમંત્રી ભૂપેન્દ્ર પટેલ અને ધારાસભ્યો સહિત 250થી વધારે લોકો મતદાન કરશે.

અમદાવાદના નિકોલ વિધાનસભા બેઠકના ધારાસભ્ય જગદીશ વિશ્વકર્મા (પંચાલ) ભારતીય જનતા પાર્ટી (BJP) ના એક અગ્રણી નેતા છે. તેમની રાજકીય સફર નીચે મુજબ છે:

રાજકીય સફરના મુખ્ય તબક્કાઓ

પ્રારંભ: તેમણે તેમની રાજકીય કારકિર્દીની શરૂઆત વર્ષ 1998 માં ઠક્કરબાપાનગર વિસ્તારમાં બૂથ ઇન્ચાર્જ તરીકે કરી હતી.

ધારાસભ્ય: તેઓ નિકોલ વિધાનસભા બેઠક પરથી સતત ત્રણ વખત ધારાસભ્ય તરીકે ચૂંટાયા છે:

2012: પ્રથમ વખત ગુજરાત વિધાનસભાના સભ્ય બન્યા.

2017: બીજી વખત ચૂંટણી જીતી.

2022: ત્રીજી વખત આ બેઠક પરથી જીત મેળવી.

સંગઠન: પાર્ટી સંગઠનમાં પણ તેમણે મહત્વની ભૂમિકાઓ ભજવી છે:

વર્ષ 2013માં તેઓ ભારતીય જનતા પાર્ટી ગુજરાતના ઉદ્યોગ સેલના કન્વીનર હતા.

તેઓ કર્ણાવતી BJP અમદાવાદ શહેરના પ્રમુખ તરીકે પણ સેવા આપી ચૂક્યા છે.

મંત્રીમંડળમાં સ્થાન: સપ્ટેમ્બર 2021 માં, તેમને રાજ્ય સરકારના મંત્રીમંડળમાં સ્થાન મળ્યું. તેમણે વિવિધ મહત્વપૂર્ણ વિભાગોના રાજ્ય કક્ષાના મંત્રી તરીકે જવાબદારી સંભાળી છે:

પ્રથમ કાર્યકાળ (સપ્ટેમ્બર 2021 – ડિસેમ્બર 2022):

કાયદા, વન, પર્યાવરણ અને આબોહવા પરિવર્તન, માર્ગ અને મકાન વિભાગ, ઉદ્યોગ, કુટીર ઉદ્યોગ, સહકાર, મીઠા ઉદ્યોગ, પ્રોટોકોલ (સ્વતંત્ર હવાલો) અને મુદ્રણ તથા લેખન સામગ્રી (રાજ્ય મંત્રી).

વર્તમાન કાર્યકાળ (ડિસેમ્બર 2022 થી):

સહકાર, મીઠા ઉદ્યોગ, મુદ્રણ અને લેખન સામગ્રી, અને પ્રોટોકોલ (સ્વતંત્ર હવાલો).

સૂક્ષ્મ, લઘુ અને મધ્યમ ઉદ્યોગો (MSME), કુટીર, ખાદી અને ગ્રામ્ય ઉદ્યોગ, નાગરિક ઉડ્ડયન (રાજ્ય મંત્રી).

જગદીશ વિશ્વકર્મા (પંચાલ) વ્યવસાયે બિઝનેસમેન છે અને તેઓ ગુજરાત યુનિવર્સિટીમાંથી સ્નાતક (BA) થયેલા છે. તેમની રાજકીય કારકિર્દીમાં તેઓ પાયાના કાર્યકરથી લઈને રાજ્યના મંત્રી સુધી પહોંચ્યા છે.